Doyle’s Delight
| Doyle’s Delight | ||
|---|---|---|
| Barggrupp: | Maya-Bargen | |
| Hööchd: | 1.124 m över de See | |
| Land: | Belize | |
| Laag: | Toledo/Cayo | |
| Kuntinent: | Amerika | |
| Koordinaten: | Koordinaten:16° 30′ N, 89° 3′ W16° 30′ N, 89° 3′ W | |
| ||
Doyle’s Delight is en 1.124 m över de See hogen Barg in de Maya-Bargen an de Grenz von de Distrikte Toledo un Cayo von dat Land Belize. Dat is de höögste Barg von de Maya-Bargen un von dat Land Belize.
Geografie
[ännern | Bornkood ännern]He billt de Waterscheed twüschen de Stroomsystemen von’n Belize River in’n Noorden, Monkey River in’n Süüdoosten un Rio Grande in’n Süüdwesten. In’n Noordwesten flütt dat Water över’n Ceibo Grande af un in’n Noordoosten över’n Smoky Branch. Düsse twee Strööm fleet all beid in’n Chiquibul River un de wedder in’n Belize River. Dat Water in’n Süüdoosten flütt na’n Snake Creek, de ünnereerdsch in’n Bladen Branch flütt. In’n Süüdwesten flütt dat Water över’n Meerman Creek na’n Central River af, de ünnereerdsch mit’n Rio Grande verbunnen is.
De nächsten Öörd doot in Guatemala in’n Westen liggen (ünner annern Las Lajas), wat so bi üm un bi 17 Kilometer wied weg is. De nächsten Dörper in Belize doot an’n Southern Highway un an de San Antonio Road liggen un sünd so 20 bet 30 Kilometer wied weg. Dat Rebeed is as Chiquibul-Natschonaalpark un Bladen Nature Reserve schuult.
Historie
[ännern | Bornkood ännern]För lange Tied is de Victoria Peak för’n gröttsten Barg in Belize hollen worrn. Düsse Barg is düüdlich beter togänglich un kickt wied över de Ümgegend rut. Eerst in jüngere Tied sünd ok de Bargen in’n Süden von de Maya-Bargen beter utmeet worrn un dorbi is rutkamen, dat de Doyle’s Delight veer Meter höger is as de Victoria Peak.
De Naam is eerst 1989 vergeven worrn. En Expeditschoon ünner Leid von Sharon Matola hett dat Rebeed neger ünnersöcht. Matola harr in dat Book The Lost World von Arthur Conan Doyle dat Zitaat „Why shouldn’t somethin’ new and wonderful lie in such a country? And why shouldn’t we be the men to find it out?“ (Worüm schall in so en Land nich wat to finnen ween, dat nee un wunnervull is? Un worüm schöölt wi nich de Lüüd ween, de dat rutfinnt?, Kapittel VI) leest un dat op de Situatschoon betagen, dat se en ne’en höögsten Barg in Belize funnen harrn. Doyle’s Delight bedüüdt „Doyle sien Freid“.