Victoria Peak (Belize)

Vun Wikipedia
Zur Navigation springen Zur Suche springen
Victoria Peak
Victoria-peak-2.jpg
Barggrupp: Maya-Bargen
Hööchd: 1.120 m över de See
Laag: Belize
Koordinaten:
Koordinaten:16° 48′ N, 88° 36′ W
16° 48′ N, 88° 36′ W

De Victoria Peak is en 1.120 m över de See hogen Barg in de Cockscomb Range von de Maya-Bargen in’n Distrikt Stann Creek von Belize. Dat is na’n Doyle’s Delight (1.124 m över de See) de tweethöögste Barg in de Maya-Bargen un in Belize.

Geografie[ännern | Bornkood ännern]

De Barg is Deel von de Cockscomb Range, de sik von Oost na West reckt un de Waterscheed billt twüschen Sittee Branch (flütt in’n South Stann Creek) in’n Noorden un Cockscomb Branch (flütt in’n South Stann Creek) un Middle Branch un Cockscomb Branch (fleet all beid in’n Mare’s Nest Branch) in’n Süden.

Ofschoonst de Barg in de Tropen liggt un mit siene 1.124 m över de See nich afsünnerlich hoog is, liggt de Topp dör de exponeerte Laag (ahn Massenerhebungseffekt) in de Region von’n Elfenholt, de dör temlich siede Bööm, veel Wind un hoge Fuchtigkeit präägt is (Nevelholt). De Lagen wieder ünnen an’n Foot von’n Barg sünd tropischen Regenwoold.

Historie[ännern | Bornkood ännern]

Bi gode Sicht is de Cockscomb Range von de Küst ut to sehn. De Bargen weren also bekannt, aver dör dat swore Gelänn temlich untogänglich.

1888 is en brietsche Expeditschoon ünner Leid von’n Guvernör von Brietsch-Honduras, Roger Goldsworthy, in dat Rebeed kamen, hett de Bargen kartografeert un hett den höögsten Topp bestegen.[1] De Naam för den höögsten Barg is to Ehren von de brietsche Königin Victoria utsöcht worrn, de to de Tied op’n Throon seten hett. Dat is aver nich ganz kloor, wat de Expeditschoon würklich op’n höögsten Topp weer oder op een von de annern högeren Toppen von de Cockscomb Range. De Naam Victoria Peak is op jeden Fall in de Tied achterna för den höögsten Punkt bruukt worrn.

De Barg un de Cockscomb Range ümto sünd siet 2. Mai 1998 as Victoria Peak Natural Monument schuult. Dat Rebeed in’n Noorden is as Sittee River Forest Reserve un dat in’n Süden as Cockscomb Basin Wildlife Sanctuary schuult. Na Westen to liggt de Chiquibul-Natschonaalpark.

De Barg is lange Tied as höögsten Barg von Belize ansehn worrn, aver bi Meetarbeiden in jüngere Tied is rutkamen, dat de Doyle’s Delight noch veer Meter höger is.

Footnoten[ännern | Bornkood ännern]

  1. Charles Henry Godden: Trespassers Forgiven: Memoirs of Imperial Service in an Age of Independence. The Radcliffe Press, 2009, Sied 278ff.