Martin-Kark (Raben)

De Martin-Kark is de Kark von dat evangeelsch-luthersche Kaspel Raben (Karkenkreis Winsen, Sprengel Lümborg, Landskark Hannover). De Oort Raben liggt in de Gemeen Soosdörp in’n Landkreis Lümborg, Neddersassen. Ehren Naam hett se von’n Hilligen Marten.

Geschicht[ännern | Bornkood ännern]

De eerste Kark in Raben is woll üm 1200 boot worrn. In en Oorkunn ut de Johren twüschen 1250 un 1253 kummt se toeerst schriftlich vör. Dat weer in de eerste Tieden en bischöpliche Egenkark. De Minschen ut dat hüdige Kaspel Raben hebbt to düsse Tied noch to dat Kaspel von de Johannis-Kark in Solzhusen tohöört. Eerst na 1450 is ut de Egenkark en Parrkark mit egen Kaspel worrn.

De hüdige Kark stammt ut de Tied von 1400 bet 1420. De letzte kathoolsche Preester is 1529 ut Raben weg un dormit is de Reformatschoon in Raben intagen. De Karktoorn is üm 1600 anboot worrn.^[1]

To dat Kaspel höört de Öörd Raben, Rulfsen, Soosdörp, Swimmbeck, Thansen un Wetzen. De Oort Ebendörp hett dor fröher ok mit tohöört, is aver 1954 in dat Kaspel Äästörp wesselt.

Utstattung[ännern | Bornkood ännern]

De Altor is in dat 15. Johrhunnert boot worrn.
De Kanzel is ut dat 16. Johrhunnert.
De Empoor stammt ok ut dat 16. Johrhunnert.
De Örgel is 1965 von’n Örgelboer Klaus Becker boot worrn.

Klocken[ännern | Bornkood ännern]

In’n massiven Westtoorn von de Kark hängt twee ole Klocken. De grote Klock stammt ut de Tied von de Gotik un is woll de öllste dateerte Klock in’n Landkreis Lümborg. De lüttje Klock stammt ut de Tied von dat Barock.