Mairie Zeven
De Mairie Zeven weer in de Franzosentied (1810 bet 1813) een von de veer Mairien, in de de Kanton Zeven indeelt weer. De Seet weer in Zeven. Se harr 2322 Inwahners.[1]
Historie[ännern | Bornkood ännern]
De Ümgegend von Zeven hett vör de Franzosentied to dat Amt Zeven un de Amtsvaagdie Scheeßl von dat Amt Rodenborg in dat Hartogdom Bremen höört, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Zeven een von de negen Mairien in’n Kanton Zeven von’n Distrikt Stood, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Zeven weer nu een von de veer Mairien in’n Kanton Zeven, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to de veer Mairien Zeven, Heeßel, Jeem un Elsdörp (all veer in’n Kanton Zeven) höört harrn. Dorbi is von de westfäälsche Mairie Zeven aver blots de Oort Zeven sülvs an de ne’e Mairie gahn. De Rest keem an de Mairie Jeem. De westfäälsche Mairie Jeem hett dorför en poor Öörd an de Mairie Zeven afgeven.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Königriek Westfalen:[2]
- Kaiserriek Frankriek:[1]
- Zeven (600 Inwahners)
- Heeßel, Oosterheeßel, Hogenkamp, Wiersdörp, Wiertzen, Hanraad, Ahoff, Adiek, Bötzenbossel, Oosterbötzen, Bötzen, Sellhorn (582 Inwahners)
- Abbendörp, Wittkopsbossel, Olenhöben (312 Inwahners)
- Elsdörp, Poitzendörp, Badenhorst, Borg Elsdörp, Bockhorst, Borgwall, Ehsdörp, Hatz, Wist, Osenhorst, Frankenbossel (828 Inwahners)
Vondaag sünd düsse Öörd Deel von de Samtgemeen Zeven un de Gemeen Scheeßl.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 69
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 10