Mairie Stood
De Mairie Stood weer in de Franzosentied (1810 bet 1813) een von de dree Mairien, in de de Kanton Stood indeelt weer. De Seet weer in Stood un de Maire Carl Gabriel Domeier. Se harr 6638 Inwahners.[1]
Historie[ännern | Bornkood ännern]
Stood hett vör de Franzosentied en Stadt mit en Magistraat in dat Hartogdom Bremen billt, wat in dat Kurförstendom Hannover leeg. Dat Kurförstendom Hannover weer in de Tied von de Koalitschoonskriege siet 1801 von Franzosen un Prüßen besett. To’n 1. März 1810 is dat Rebeed denn Deel von dat Königriek Westfalen worrn, wat en Satellitenstaat von Frankriek weer.
Binnen Westfalen weer de Mairie Stood een von de twee Mairien in’n Kanton Stood von’n Distrikt Stood, Departement von de Elv- un Wersermünnen.[2] Man al to’n 1. Januar 1811 harr dat wedder en Enn. Dat Königriek Westfalen müss dat Departement direkt an dat Franzöösche Kaiserriek afgeven. De Mairie Stood weer nu een von de dree Mairien in’n Kanton Stood, Distrikt Stood, Departement von de Elvmünnen. De Mairie weer nu düüdlich grötter, dor sünd Öörd in tohoopfaat worrn, de vörher in Westfalen to söss Mairien höört harrn: de Mairien Stood un Kamp ut’n Kanton Stood, de Mairien Hogenoh un Hammoh ut’n Kanton Himmelpoorten un de Mairien Gothenborg un Hagen ut’n Kanton Hornborg. Von de Mairie Hogenoh is aver blots de Oort Wiepenkathen in de Mairie Stood wesselt. De Rest is an de Mairie Olendörp fullen. Ok von de Mairie Hammoh sünd blots en Deel von de Öörd an de Mairie Stood wesselt. De Rest keem an de Mairie Himmelpoorten. Von ehr oold Rebeed in Westfalen hett de Mairie Stood den Oort Brunshusen an de Mairie Bützfleet afgeven.
1813/1814 hebbt de Russen de Franzosen slahn un dat Rebeed befreet. Dat Kurförstendom Hannover is denn wedder herstellt worrn un de ole Stand von vör 1810 wedder dor. Mit’n Wiener Kungress is 1815 ut dat Kurförstendom dat Königriek Hannover worrn.
Öörd[ännern | Bornkood ännern]
Dor hebbt düsse Öörd tohöört:
- Königriek Westfalen:[2]
- Stood mit de Vörstäder, Hogenwedel, de veer Doorwachen, de Slüsenwach, de Hüüs von Severin, Schütt un Hanken, twee Hüüs bi de Möhl un een Huus an’n Achterdiek, Brunshusen mit Brunshüser Butendiek
- Kaiserriek Frankriek:[1]
- Stood, Hogenwedel, de veer Doorwachen, de Slüsenwach, Severin, Schütt un Hanken-Goorn (tohoop 4736 Inwahners)
- Kamp, Thun, Barg, Riensföör (600 Inwahners), Wiepenkathen, Hahl, Parlbarg (381), Bockhorst, Villah, Steernbarg (151), Gothenborg, Dullern, Dullerner Möhl (442), Hagen, Hagener Möhl, Heidkroog, Deinst, Deinster Möhl (328)
Vondaag sünd düsse Öörd Deel von de Stadt Stood un de Samtgemenen Hornborg un Freenbeek.
Footnoten[ännern | Bornkood ännern]
- ↑ a b Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling 1813, Sied 62
- ↑ a b Bulletin des lois du Royaume de Westphalie. Königliche Bookdruckeree, Kassel 1810, Sied 8