Kuhs-Siedlung
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27442 | |
| Vörwahl: | 04763 | |
| Geograafsche Laag: | Koordinaten:53° 23′ N, 8° 55′ O53° 23′ N, 8° 55′ O | |
|
| ||
Kuhs-Siedlung (hoochdüütsch Kuhstedt-Siedlung) is en Oort in de Gemeen Gnarrenborg in’n Landkreis Rodenborg, Neddersassen.
Geografie
[ännern | Bornkood ännern]De Oort liggt op de Oosterholter Geest, de hier so op 20 bet 30 Meter över NHN liggt. Deelwies slütt sik Moor un Forst an. Dat Water ut dat Rebeed flütt in’n Süden över’n Forstgraven na’n Giehler Beek un in’n Noorden över Gravens in de Ah un wieder in de Ooldwister Luun un de Luun.
De Naveröörd sünd Ooldwist in’n Noorden, Volkmarst un Brillit in’n Noordoosten, Kuhs in’n Oosten, Nee-Kuhs, Nee-Kuhstermoor un Giehl in’n Süüdoosten, Giehlermöhlen un Vollerso in’n Süden, Paddewisch un Steern in’n Süüdwesten, Ollendörp in’n Westen un Wellen un Ah in’n Noordwesten.
Historie
[ännern | Bornkood ännern]Dat Land in’n Westen von de Kuhster Feldmark weer fröher Heid un weer nich för de Bueree to bruken. Jüstso weer dat mit dat Land in Ah un Ooldwist, dat dor angrenzen dee. Al 1914 un 1919 harr dat Plaans geven, düt Land to kultiveren. In de Johren 1930 hett dat för korte Tied ok Plaans för en Flegerplatz geven. Dor is aver nix von worrn. 1938 weer dat denn aver so wied, dat de Heid deep plöögt worrn is un 1939 sünd twee Gebüüd boot worrn, in de toeerst de Verwaltung för de ne’e Siedlung in ween schull un de later an Siedlers afgeven warrn schullen. 1939 is dat eerste Maal Roggen seit worrn. In de Tied von’n Tweten Weltkrieg sünd de Arbeiden denn aver kuum vörangahn. Eerst na’n Krieg hett de Siedlung wedder Fohrt opnahmen. Organiseert hett dat nu de Hannöversche Siedlungssellschop. Dat hett 21 Siedlersteden geven un den Schoolplatz. De eersten Hüüs sünd 1947 boot worrn.
Verwaltungsgeschicht
[ännern | Bornkood ännern]Vör 1977 weer de Siedlung in’n Kreis Bremervöör. 1977 is se Deel von’n Landkreis Rodenborg worrn.
De Oort hett jümmer bi de Gemeen Kuhs mit bihöört, de an’n 1. März 1974 mit de Gemeenreform in Neddersassen Deel von de Gemeen Gnarrenborg worrn is.
Religion
[ännern | Bornkood ännern]Kuhs-Siedlung is evangeelsch-luthersch präägt un höört to dat Kaspel Kuhs.
För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.
Weertschop un Infrastruktur
[ännern | Bornkood ännern]För Kuhs-Siedlung is de freewillige Füürwehr Kuhs mit tostännig.
An dat Stroomnett von dat Överlandwark Noord-Hannover is de Oort 1951 anslaten worrn un fleten Water keem 1953. Dat Afwater warrt över Kleenkläranlagen reinigt. En zentrale Kanalisatschoon gifft dat nich.
Verkehr
[ännern | Bornkood ännern]Von Kuhs-Siedlung loopt lüttjere Straten na Kuhs, Ah un Ollendörp. In Kuhs is de Straat över de Landsstraat 122 anslaten an de Bundsstraat 74, de in’n Noordoosten över Kuhs un Basdaal na Bremervöör geiht un in’n Süüdwesten över Wallhöben, Hambargen, Oosterholt-Scharmbeek un Hu’e na Bremen-Noord. In Ollendörp is de Kreisstraat 23, de ünner annern an de L 128 ran föhrt, de in’n Noorden na Beverst löppt un in’n Süden na Hambargen. Över Ah kummt een na Ooldwist un dor an de B 71, de in’n Noordwesten na Bremerhoben föhrt.
De nächste Autobahn is de Autobahn 27 (Afsnidd Bremen–Bremerhoben). De Opfohrt 13 Uthleer liggt so 26 Kilometer in’n Süüdwesten von Kuhs-Siedlung an de K 48.
De nächste Bahnhoff is so bi 12 Kilometer wied weg in’n Noordwesten de Bahnhoff Stubben an de Bahnlien Bremen–Bremerhoben.
Scholen
[ännern | Bornkood ännern]Nadem de Oort anleggt worrn is, harr he von 1951 bet 1962 en egen Volksschool. Düsse School is 1962 dichtmaakt worrn un sietdem gaht de Kinner op de Grundschool Kuhs.