Grundschool Kuhs

Grundschool Kuhs 2010

De Grundschool Kuhs is en Grundschool in dat Dörp Kuhs. Dreger is de Gemeen Gnarrenborg. Se liggt in de Giehler Straat 4, so bi een Kilometer buten dat Dörp an de Bundsstraat 74. De School hett veer Schoolmeesters, veer Klassenrüüm, 57 Schölers un een Klass för jeden Johrgang.

Historie

De eerste School in Kuhs weer dat Kösterhuus blangen de Kark. Dat is 1866 verköfft un afbraken worrn. In dat sülve Johr is en neet Kösterhuus boot worrn. Dat is toletzt 1911/1912 utboot worrn, weer aver bald to lütt.

De School is 1927 boot worrn, en beten rut ut dat Dörp, dat de Weg för de Kinner ut Nee Kuhs, Nee Kuhstermoor un Giehl nich so wied is. Kuhstermoor harr en egen School, dor sünd vör 1927 ok de Kinner ut Nee Kuhs hengahn.

Nadem na’n Tweten Weltkrieg Kuhs Siedlung anleggt worrn is, hett dat dor von 1951 af an ok en egen lüttje School geven. De School hett aver man blots bet 1962 bestahn un hett denn wedder dichtmaakt un de Schölers sünd na Kuhs op School kamen. 1962 is ok de 9. Klass tokamen. De Platz in de ole School mit dree Klassen hett denn nich mehr reckt. Dat hett Schichtünnerricht geven un de Ünnerricht för de Deerns in Huusweertschop un Handarbeid weer in dat Schoolmeesterhuus in de Schützenstraat. Denn sünd de 9. Klassen na Gnarrenborg op School kamen. De Schölertall weer nu 158. Dat weer jümmer noch to veel för dree Klassenrüüm, dorüm hett de School 1970 en Anbo kregen. In dat Johr hett ok de School in Kuhstermoor dichtmaakt un de School in Kuhs hett disse Schölers opnahmen.

Nadem in Gnarrenborg de Orientierungsstufe inföhrt worrn is, is ut de Volksschool en Grundschool worrn. 2000/2001 is een von de beiden Schoolmeesterwahnungen ümboot worrn to en Warkruum, en Computerruum un en Köök.

An’n 6. März 2014 hett de School von Kultusministerin Frauke Heiligenstadt den Titel Plattdüütsche School kregen.

Schoolbaas

• -Juli 2013: Jürgen Weiss
• opstunns: Anette Bode