Big Creek (Belize)
Big Creek (Port of Big Creek) is en Deepwaterhaven bi’n Oort Independence in’n Distrikt Stann Creek von dat Land Belize.
Geografie[ännern | Bornkood ännern]
De Haven liggt an dat Noordöver von de Münn von’n Big Creek in de Karibische See un an de Grenz na’n Distrikt Toledo. Op de Placencia-Halvinsel vör’n Haven liggt de Oort Placencia.
Historie[ännern | Bornkood ännern]
De Haven is 1990 anleggt worrn un mitfinanzeert von dat Ünnernehmen Fyffes, dat Bananen ut Belize na Grootbritannien importeert. Dat is de tweetwichtigste Haven von Belize na’n Port of Belize in Belize-Stadt un he versorgt vör allen dat Rebeed von Süüdbelize.
An’n 8. Oktober 2001 is de Hurrikan Iris över dat Rebeed tagen. Dorbi is dat Boot Wave Dancer kentert. 20 Lüüd (17 Dukers ut de USA un dree Krulüüd) sünd verdrunken.
Bet 2013 stünn de Haven in Kunkurrenz to’n Commerce Bight Port bi Dangriga. Nadem de Commerce Bight Port dichtmaakt hett, hett Big Creek en groten Deel von’n Worenhannel ut Dangriga övernahmen.
Anlagen[ännern | Bornkood ännern]
Dat gifft dree Anleggers (305, 305 un 213 Meter lang) un 14 Tanklagers.[1] Dor köönt Scheep anleggen, de en maximalen Deepgang von 6,5 Meter un en Längd över allens von maximal 155 Meter hebbt.[1]
Dat Havenbecken un de Fohrrinn na’n Haven warrt opstunns (Stand 2019) utbaggert, so dat in Tokumst Scheep mit en Deepgang bet 10,5 Meter un en Längd över allens von 225 Meter anleggen köönt.[1]
Weertschop un Infrastruktur[ännern | Bornkood ännern]
Ünner annern warrt de Haven von de Banana Growers Association un Citrus Products of Belize bruukt, üm Bananen un Zitrusfrücht von de Plantaaschen in’n Süden von Belize (ünner annern ut dat Stann Creek Valley) to verladen. Ok Shrimps ut de Aquakulturen in dat Rebeed un Eerdööl von dat Ünnernehmen Belize Natural Energy ut dat Rebeed von Spanish Lookout warrt verlaadt.
Verkehr[ännern | Bornkood ännern]
De Haven is över’n Southern Highway an dat Achterland anslaten. De Highway föhrt in’n Süüdwesten över Dump na Punta Gorda un in’n Noorden na Dangriga un an’n Hummingbird Highway.
De nächsten Flegerhavens sünd de havenegene Big Creek Airport direkt bi’n Haven un de Independence Airport, de veer Kilometer wied weg is.
Footnoten[ännern | Bornkood ännern]
Weblenken[ännern | Bornkood ännern]
- Websteed von’n Haven (engelsch)