Citrus Products of Belize
De Citrus Products of Belize Limited (CPBL) is en Ünnernehmen in Belize, dat ut Zitrusfrücht (vör allen Appelsienen un Pampelmusen) Saft un Saftkunzentraat herstellt. De Seet von dat Ünnernehmen is in Pomona.
De Anborebeden doot in dat Stann Creek Valley in’n Distrikt Stann Creek un in’n Distrikt Cayo liggen. Üm un bi 20 % von de Anborebeden doot direkt in de Hand von dat Ünnernehmen liggen un de Rest in de Hand von en Reeg lüttjere Farmers.[1]
Ut de Pülp warrt von dat Dochterünnernehmen Belize Citrus Feed Limited Vehfoder herstellt.
Dat Dochterünnernehmen Valley Manufacturing Co. Limited (VLC) is 1986 grünnt worrn un stellt Fruchtsaftgedränken för’n imheemschen Markt in Belize her.
Historie
[ännern | Bornkood ännern]1913 hebbt de Mediziner Smith Osborne Browne, de Manager Alfred Edward Vine (British Honduras Syndicate) un de Bananenplanter William Alexander Bowman 900 Pampelmusen-Planten ut Florida importeert un Plantaaschen in de Öörd Sarawee un Pomona in dat Stann Creek Valley anleggt.[2] De Frücht sünd toeerst frisch exporteert worrn, 1935 hett tosätzlich de Produkschoon von Pampelmusen-Saft anfungen.[2]
Besünners in de Johren 1940 un 1950 is de Anbo von Appelsienen utboot worrn.[2]
Üm de Frücht to verarbeiden sünd 1942 in Pomona (von de Citrus Company of Belize) un 1962 in Alta Vista (von Salada Foods) Warken anleggt worrn. De Warken sünd na en Reeg Besitterwessels siet 2002 all beid Deel von dat Ünnernehmen Citrus Products of Belize.
1955 weren 301 Farmers in de Citrus Growers Association tohoopslaten un hebbt op 600 Hektar Pampelmusen un op 906 Hektar Appelsienen anboot.[3]
1982 hebbt 324 Farmers op 4856 Hektar Zitrusfrücht anboot[3] un 1993 sünd op 27.977 Hektar Zitrusfrücht anboot worrn.[4]
De Produkten warrt vör allen över’n Haven von Big Creek exporteert.
Belize Food Products
[ännern | Bornkood ännern]1962 hett dat kanaadsche Ünnernehmen Salada Foods en Wark in Alta Vista boot.[2] Düt Wark is dör dat Salada-Dochterünnernehmen Belize Food Products bedreven worrn.
1969 hett Kellogg’s dat Wark övernahmen un 1979 Nestlé.[2] 1990 hett Nestlé dat Wark an lokale Besitters ut Belize verköfft un dat Wark hett de BHI Company billt.[2] 2002 hett de Citrus Growers Association dat Wark in Alta Vista övernahmen.[2] Sietdem höört Belize Food Products to dat Ünnernehmen Citrus Products of Belize.[2]
Citrus Company of Belize
[ännern | Bornkood ännern]De Citrus Company of Belize (CCB) is von de Familie Sharp grünnt worrn, de ut Jamaika inwannert is.
CCB is 1983 för 5 Milljonen Belize-Dollar von de Zitrus-Farmers un de Co-Operative Citrus Growers Association of Trinidad köfft worrn.[5] In düsse Tied is ok de US-amerikaansche Caribbean Basin Initiative in Gang kamen, de Ünnernehmens ut de Karibik en beteren Togang to’n US-Markt gifft.[6] Dat weer för de Zitrusindustrie en groten Vördeel bi’n Export von de Produkten. För en Tied weer Belize aver ok von’n US-Markt utsperrt, as de Middellandsche Fruchtfleeg sik in Belize breed maakt harr.[6]
In’n Dezember 1998 hett de Commonwealth Development Corporation (CDC) CCB övernahmen.[1] Tosätzlich hett dat Ünnernehmen in’n März 1999 de Barton Creek Farms Ltd. (BCF) köfft un in’n August 1999 de Belize Food Holdings Limited (BFH).[1] In’n Oktober 2000 hett CDC de dree Ünnernehmens in dat ne’e Ünnernehmen Del Oro Belize Limited tohoopföhrt.[1]
De Citrus Growers Association hett över ehr Dochter Belize Citrus Growers Association Investment Company Limited 2000 en Minnerheitsandeel an Del Oro Belize övernahmen un 2002 denn 99,78 % von de Andelen.[1] Kort later hett Del Oro Belize ümfirmeert in Citrus Products of Belize Limited.[1]
2002 hett de Citrus Growers Association dat Wark in Alta Vista övernahmen.[2] Sietdem billt de Warken tohoop dat Ünnernehmen Citrus Products of Belize.[2]
Citrus Growers Association
[ännern | Bornkood ännern]De Citrus Growers Association (CGA) is 1952 as Verband von de Zitrus-Farmers grünnt worrn.[3] 1967 hett de Verband dör dat Citrus (Processing & Production) Ordinance en offiziellen Rahmen kregen.[3]
De Verband hett in’n Oktober 2002 de Del Oro Belize Limited köfft un höllt opstunns 51 % von de Andelen an Citrus Products of Belize.[3]
Footnoten
[ännern | Bornkood ännern]- ↑ a b c d e f History of the Belize Citrus industry, Belize Chamber of Commerce and Industry
- ↑ a b c d e f g h i j The Citrus Industry of Belize (1913–Present)
- ↑ a b c d e About CGA, Citrus Growers Association
- ↑ Belize Agricultural Sector Study. IICA, 1994, Sied 45
- ↑ Laurie Kroshus Medina: Negotiating Economic Development: Identity Formation and Collective Action in Belize. University of Arizona Press, 2004, Sied 66ff.
- ↑ a b Tim Merrill: Belize: A Country Study. 1992: Citrus.
Weblenken
[ännern | Bornkood ännern]- Websteed von Citrus Products of Belize (engelsch)
- Websteed von de Citrus Growers Association (engelsch)
