Commerce Bight Port

Vun Wikipedia
Zur Navigation springen Zur Suche springen

De Commerce Bight Port weer en Haven an de Commerce Bight bi de Stadt Dangriga (fröher Stann Creek Town nöömt) in’n Distrikt Stann Creek von Belize.

Vör 1908 is de Hannel in de Region över en Pier direkt an’n Strand in de Stadt Stann Creek Town lopen.[1] De Pier leeg vör de Sacred Heart Church.[1] Dör dat Wassdom von de Bananenprodukschoon in dat Achterland weer aver Bedarf för en Pier, an den ok Scheep mit grötteren Deepgang fastmaken kunnen.[1]

Dorüm is twüschen 1906 un 1908 veer Kilometer in’n Süden von Stann Creek Town an de Commerce Bight un bi de Gra Gra Lagoon en ne’en, 165 Meter langen Pier mit en Waterdeepd von acht Meter anleggt worrn.[1] Gliektiedig is ok de Stann Creek Railway in dat Achterland boot worrn, de bet an’n Pier föhren dee.[1]

Blangen Bananen sünd later ok Zitrusfrücht, Mahagoni un tiedwies ok Maniok exporteert worrn.[1] Nadem in Spanish Lookout Ööl funnen worrn is, is ok düt Ööl över Commerce Bight exporteert worrn.[1]

An’n 28. September 1941 is de Hurrikan Nr. 4 över Belize tagen un hett den Pier tweislahn.[1] För de Övergangstied is en Swemmpier anleggt worrn.[1]

In de Johren 1980 hett dat Plaans geven, in Belize en Deepwater-Haven antoleggen. Dorbi hett sik aver Belize-Stadt dörsett (Port of Belize) un in Dangriga hett sik nix daan.[1]

In dat Johr 2002 hett de Regeren von Belize den Haven von Commerce Bight an Ports of Belize Ltd. verpacht, de denn den Bedriev övernahmen hebbt.[1] 2013 is de Verdrag utlopen un de Regeren hett beslaten, den Haven ganz dichttomaken.[1] Den Worenhannel in’n Süden von Belize hett nu vör allen de Haven von Big Creek övernahmen.[1]

Footnoten[ännern | Bornkood ännern]

  1. a b c d e f g h i j k l m Commerce Bight Port (1908-2013)


Koordinaten:16° 56′ N, 88° 14′ W