Aschwarden
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 10,99 km² | |
| Inwahners: | 408 (30. Juni 2012) | |
| Inwahnerdicht: | 37,1 Inwahners pro km² | |
| Hööchd: | 1 m över NHN | |
| Postleettall: | 28790 | |
| Vörwahl: | 04296 | |
| Geograafsche Laag: | Koordinaten:53° 17′ N, 8° 32′ O53° 17′ N, 8° 32′ O | |
|
| ||
Aschwarden (hoochdüütsch Aschwarden) is en Dörp in de Gemeen Swonewebel in’n Landkreis Oosterholt, Neddersassen. Binnen de Gemeen billt Aschwarden en egen polietsche Oortschop.
To de Oortschop höört ok de beiden Öörd Hassel un Brook mit to.
Geografie
[ännern | Bornkood ännern]De Oort liggt in de Masch von de Ünnerwerser. Dat Water ut dat Rebeed flütt över’n Aschwardener Floodgraven in’n Rechten Blangenarm von de Werser. An de Münn von’n Floodgraven in’n Werserarm liggt dat Schöppwark Aschwarden. Dat höört aver blots von’n Naam her to Aschwarden. Dat liggt op dat Rebeed von Rechtebe.
De Naveröörd sünd Wortfleet un Rechtebe in’n Noorden, Uthleer in’n Noordoosten, Brook in’n Oosten, Hinnebeck in’n Süüdoosten, Ne’enkarken, Rade un Hassel in’n Süden un Hammelwardersand un Harriersand in’n Westen.
Historie
[ännern | Bornkood ännern]Aschwarden kummt 1139 toeerst in en Oorkunn von’n Bremer Arzbischop Adalbert II. vör.
In dat Johr 1800 is in Aschwarden en Windmöhl boot worrn, de bet vondaag besteiht.
In’n Tweten Weltkrieg sünd 29 Soldaten ut Aschwarden (tohoop mit Hassel un Brook) fullen oder vermisst.[1]
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Aschwarden in’n Kanton Hagen höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Weersbe in’n Kanton Hagen.
De Oort hett vör 1885 to’n Bezirk Süüd-Oosterstood von dat Amt Hagen tohöört. Na 1885 is de Oort in’n Kreis Blomendal wesselt. 1932 is dat Deel von’n Kreis Oosterholt worrn.
De Oort hett fröher en egen Gemeen billt, de an’n 1. März 1974 mit de Gemeenreform in Neddersassen Deel von de Gemeen Swonewebel worrn is. Sietdem is Aschwarden binnen de Gemeen en Oortschop mit egen Oortsvörsteiher.
Inwahnertall
[ännern | Bornkood ännern]| Johr | Inwahners |
|---|---|
| 1791[2] | 56 Füürsteden |
| 1812[3] | 390 |
| 1824[4] | 60 Füürsteden |
| 1848[5] | 392 Lüüd, 60 Hüüs |
| 1. Dezember 1871[6] | 332 Lüüd, 53 Hüüs |
| 1. Dezember 1885[7] | 316 Lüüd, 54 Hüüs |
| 1. Dezember 1905[8] | 334 Lüüd, 51 Hüüs |
| 1. Dezember 1910[9] | 409* |
| 1925[10] | 386* |
| 1933[10] | 339* |
| 1939[10] | 306* |
- * tohoop mit Hassel un Brook
Religion
[ännern | Bornkood ännern]Aschwarden is evangeelsch-luthersch präägt un höört to dat Kaspel von de Nikolai-Kark in Brook.
För de Kathoolschen is de St.-Ansgar-Kark in Swonewebel tostännig.
De Doden ut Aschwarden warrt op’n Karkhoff von Brook begraven.
Wapen
[ännern | Bornkood ännern]Dat Wapen von Aschwarden wiest op blauen Grund en gollen Kahn mit een Mast un sülvern Segel, de op de sülvern See swemmt, de den Schildfoot billt. Vörn blangen den Kahn is en sülvern Kohlkopp mit Wuddel to sehn un achtern en gollen Ohr.
Dat Wapen is von 1956. De Ohr un de Kohlkopp staht för de Bueree, bi de besünners de Anbo von Kohl fröher en grote Rull speelt hett.
Oortsvörsteihers
[ännern | Bornkood ännern]- opstunns: Christian Meyer (CDU)
Kultur
[ännern | Bornkood ännern]En Denkmaal för de Fullenen ut’n Tweten Weltkrieg steiht in Brook bi de Kark.
Dat Dörpgemeenschopshuus is in’n November 1968 inwieht worrn.
Verenen
[ännern | Bornkood ännern]De Sportvereen Aschwarden un Ümgegend is an’n 16. November 1963 grünnt worrn un de Möhlenfrünn Aschwarden 1987.
Weertschop un Infrastruktur
[ännern | Bornkood ännern]Aschwarden hett en egene freewillige Füürwehr, de 1894 grünnt worrn is.
Verkehr
[ännern | Bornkood ännern]Dör Aschwarden löppt de Kreisstraat 2, de in’n Süden na Rade un Ne’enkarken an de Landsstraat 149 geiht un in’n Noordoosten (dor in’n Landkreis Cuxhoben as K 49) över Wortfleet un Rechtebe na Uthleer an de L 134. De L 134 geiht von Uthleer in’n Noordoosten na Hagen, Braamst, Bokel, Stubben un Beverst un in’n Süden över Meyenborg na Swonewebel un Blomendal.
De nächste Autobahn is de Autobahn 27 (Afsnidd Bremen–Bremerhoben). De Opfohrt 13 Uthleer liggt so söven Kilometer in’n Noordoosten von Aschwarden an de K 48.
De nächste Bahnhoff is so bi ölven Kilometer wied weg in’n Süden de Bahnhoff Farge an de Bahnlien Farge–Vesack. Dor föhrt de Lien RS1 von de Regio-S-Bahn Bremen/Neddersassen. De Bahnhoff Lübbs an de Bahnlien Bremen–Bremerhoben liggt 22 Kilometer in’n Noordoosten.
Scholen
[ännern | Bornkood ännern]De Kinner ut Aschwarden gaht na de Grundschool Ne’enkarken. De lüttje Volksschool in Aschwarden hett 1970 dichtmaakt. Düsse School is 1743 anleggt worrn.
Footnoten
[ännern | Bornkood ännern]- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 12
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 26
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 133
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 154
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 170
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 20
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
[ännern | Bornkood ännern]
Aschwarden | Beckdorp | Brundörp | Eggst | Harriersand | Hinnebeck | Leuchtenborg | Löhnhorst | Meyenborg | Ne’enkarken | Rade | Swonewebel