Barbados

Vun Wikipedia
Wesseln na: Navigatschoon, Söök
Barbados
Flagg vun Barbados Wapen vun Barbados
(Flagg) (Wapen)
Wahlspröök: Pride and Industry
engl., „Stolt un Fliet“
Natschonalhymne: In Plenty and In Time of Need
Woneem liggt Barbados
Hööftstadt Bridgetown
13° 5′ N, 59° 36′ W
Gröttste Stadt Bridgetown
Amtsspraak Engelsch
Regeren
Königin
Premierminister
Parlamentaarsch Monarkie
Elisabeth II.
David Thompson
Sülvstännigkeit

30. November 1966 vun dat
Vereenigte Königriek

Grött
 • Allens
 • Water (%)
 
430 km²
? %
Inwahnertall
 • 2009 afschätzt
 • Inwahnerdicht
 
284.589 [1]
647/km²
Geldsoort 1 Barbados-Dollar
= 100 Cent ([[ISO 4217|]])
BBP 3.739 Mio. US$ (142.) $ (2007)

13.605 US$ (45.) $ je Kopp

Tietrebeet UTC (UTC-4)
Internet-TLD .bb
ISO 3166 BB
Vörwahl ++1 (246) kiek NANP

Barbados [[baʁˈbaːdɔs]] is en Eiland vun de Lüttjen Antillen twuschen de Karibische See un den Atlantik un en Inselstaat binnen den Commonwealth of Nations. De Hööftstadt is Bridgetown.

Geografie[ännern | Bornkood ännern]

Bridgetown vun boven
High Street

Barbados is de ööstlichste Insel vun de Inselkeed vun de Lüttjen Antillen. Se liggt in’n Atlantik. Anners, as bi veel Naberinseln in de Karibik, hett de Anfang vun Barbados nix mit Vulkanismus to kriegen, man dat Eiland is de hööchste Deel vun en Kalksteenrugg unner See. Düsse Kalksteenrugg langt in den Mount Hillaby bit 336 m över NN rut. Bilangs de Hööftinsel höört to Barbados noch dat luerlüttje Culpepper Island, dat direktemang vör de Oostküst liggen deit.

Klima[ännern | Bornkood ännern]

Up Barbados is dat dat ganze Johr över warm. Dat gifft bloß man lüttje Unnerscheden in de Temperatuur un in’n Döörsnitt is dat över dat Johr hen bi 26° Celsius warm. Regen gifft dat meist in de Regentied vun Mai bit Oktober. Denn kann dat in dat zentrale Hoochland duchtig pladdern un bi 2.000 mm in’t Johr kaamt hendal. Ofschoonst dat so veel regent, gifft dat vunwegen den Kalksteenunnergrund keene gröttern Dieke oder Meere up de Insel. De Kalksteen lett dat Water dör, as en Seef. Barbados liggt in de Landstreken, wo de atlantischen Hurrikans överhen gaht.

Planten un Deerter[ännern | Bornkood ännern]

Fröher hett de ganze Insel unner tropischen Regenwoold legen. Midderwielen is dor meist gor nix mehr vun över bleven. Wiethen gifft dat nu Plantagen vun Zuckerrohr un anner Land för de Bueree. Bloß in Turner's Hall Wood finnt sik över 18 Hektar hen noch Överresten vun den Tropenwoold.

Dat gifft bloß man wenig Aarden vun Deerter up de Eilannen. Sunnerlich verscheden Aarden vun Apen kann een finnen, dorto Mungos (Mangusten), Hasen un Eerdkrüpers. In’n April un Mai kaamt de Ledderschildkröten un leggt an’n Strand ehre Eier af. An Vagels finnt sik Kolibris un allerhand Watervagels, as Möven un Reihers. In de See rund um de Eilannen to gifft dat Barracudas, Papegaienfische un Flegen Fische.

Inwahners[ännern | Bornkood ännern]

De Kinnerdood liggt bi ölben Dode up tusend Geborten. In’n Döörsnitt kann en Inwahner vun Barbados dormit reken, datt he bi 76,4 Johre oold warrt. Schrieven un lesen könnt 97,6 % vun all Inwahners.

Rund 95% vun de Lüde up de Eilannen höört to en christliche Karken to, dormank bi 70% to de Anglikaansche Karken.

Um un bi 90% vun de Inwahners stammt vun Slaven ut Afrika af. Dor kaamt denn noch bi 4% Witte, tomeist ut Grootbritannien un Irland to. De Rest sünd Inder un Chisesen un Mulatten. En Inwahner vun Barbados warrt richtig „Barbadier“ nömmt.

Geschichte[ännern | Bornkood ännern]

Toeerst hefft up Barbados Indianers leevt. Um 350 rüm un denn um 800 un tolest noch mol in dat 13. Johrhunnert sünd Arawak un Kariben dor inwannert. Dortwuschen un achternah weer de Insel afsneden vun dat Fastland.

De Naam „Barbados“ kümmt ut de Portugeesche Sprake: „Os barbados“ heet „de (Mannslüde) mit’n Baart“. Düssen Naam hett de Updecker Pedro Campos dat Eiland 1536 geven, as he de Wuddeln sehn hett, de vun de Fiegenböme dalhangen döen. Dor möss he bi an Baarten denken un hett de Inseln so benömmt.

Nadem Pedro Campos de Insel funnen harr, sünd Eroverers ut Spanien kamen un hefft de Inwahners vun dat Eiland na annere Inseln wegsleept. Dor mössen se up de Plantagen arbeiden. De Rest vun de Indianers is utbüxt. As knapp hunnert Johre later de Englänner kamen sünd, geev dat keen Minschen mehr up de Insel.

1625 hett England de Insel vun de Portugesen övernahmen. Bit 1962 is se denn Besitt vun de Briten bleven. 1627 sünd de eersten Siedlers na Barbados kamen. In de Weertschop güng dat bi in dat 20. Johrhunnert meist um de Produktschoon vun Zucker, Rum un Zirup.

Barbados kann torüch kieken up en lange Geschicht mit en Parlament. Na Westminster un Bermuda steiht dat Parlament vun Barbados in den Commonwealth an drüdde Stäe. Al 1639 is dat House of Burgesses inricht’ wurrn. As dat Striet mit England geven harr, is 1652 de „Charta of Barbados, or Articles of Agreement“ upschreven wurrn. Dor sünd de Rechte vun dat Parlament un de Rechte vun de Börgerlüde vun Barbados in faststellt wurrn.

Toeerst gollen düsse Rechte bloß man för de witten Plantagenbuern, man na de vull Emanzipatschoon vun de Slaven 1838 af an bit hen to de Unafhängigkeit an’n 30. November 1966 hett ok de Mehrheit vun de swarten Inwahners düsse Rechte kregen. Vun 1958 bit 1962 weer Barbados Liddmaat vun de Westindische Föderatschoon. Na de Unafhängigkeit is dat in Barbados to ene parlamentaarsche Demokratie kamen, de wat afweten deit vun ehre Geschicht un Traditschoon.

Wie dat Land för de Verwaltung updeelt is[ännern | Bornkood ännern]

Parishes in Barbados

Barbados is updeelt in 11 Parishes (Bezirke). De gifft dat siet de Dage, as dat Eiland brittsche Kolonie ween is.

Politik[ännern | Bornkood ännern]

Barbados hett en Tweekamer-Parlament (en House of Assembly mit 30 Liddmaten, de all fief Johre nee wählt weert, un en Senat, den siene 21 Liddmaten beropen weert. Wählen dröövt de Barbudiers vun dat 18. Levensjohr af an.

Sunnerlich warrt de Politik up de Insel hüdigendags bestimmt dör de beiden groten Parteien Barbados Labour Party (BLP) un Democratic Labour Party (DLP). Bi de lesten Wahlen in’n Januar 2008 hett de BLP 10 un de DLP 20 Sitten kregen. Natschonalfierdag is de 30. November.

Barbados höört to de Alliance of Small Island States (AOSIS) mit to.

Weertschop un Infrastruktur[ännern | Bornkood ännern]

In de 1990er Johren sünd de Tourismus-Industrie un de Produktschoon vun dat Handwark weertschopplich an de Zuckerindustrie vorbi tagen. Vör Barbados siene Küst warrt ok Eerdööl föddert. 2005 sünd jeden Dag bi 1.000 Barrel Ööl föddert wurrn. In’n Döörsnitt verdeent en Inwahner vun dat Land 7.350 US-Dollar in’t Johr. So seggt dat de Central Bank vun Barbados. De Flegerhaben up dat Eiland heet Grantley Adams International Airport (IATA-Flegerhaben-Kood: BGI)


Bekannte Lüde vun Barbados[ännern | Bornkood ännern]

Belegen[ännern | Bornkood ännern]

  1. Quelle: CIA World Factbook 2009

Weblenken[ännern | Bornkood ännern]

Commons-logo.svg Barbados. Mehr Biller, Videos oder Audiodateien to’t Thema gifft dat bi Wikimedia Commons.