Slaveree

Vun Wikipedia
Le Marché aux esclaves, Jean-Léon Gérôme

Slaveree is, just so, as ok de Liefegenschop, en Form vun unfreewilligen Deenst, wo een Minsch so in behannelt warrt, as wenn he en annern tohöörn dö. De Minsch, de den annern sien Egendom is, warrt Slaav nömmt, na dat Volk ut den Balkan, dat na de Antike över Johrhunnerte hen Slaven levert hett.

Slaveree kümmt up de ganze Welt jummers noch vör, ofschoonst se meist allerwegens verbaden is. Dat warrt taxeert, datt um un bi 100 Millionen Minschen hüdigendags noch in en Laag sünd, wo se to unfreewillig Arbeit dwungen weert. Staaten, as to’n Bispeel Myanmar, maakt dat Inrichten vun Slaveree mööglich, seggt de Organisatschoon Free the Slaves.

Wie de Slaveree dör Gesett afschafft wurrn is[ännern | Bornkood ännern]

Frankriek hett in de Tied vun de Franzöösche Revolutschoon 1794 de Slaveree afschafft. Man dat duer nich lang un Napoleon hett se wedder inföhrt. Däänmark is 1803 dat eerste Land in Europa ween, wat de Slaveree denn endgüllig afschafft hett. 1807 hett dat Vereenigte Königriek den Slavenhannel verbaden. Mit dat Slavery Abolition Act vun 1833, dat an'n 1. August 1834 in Kraft treden is, is denn de Slaveree in de meisten Länner vun dat Brittsche Empire afschafft wurrn. 1838 sünd in de brittschen Kolonien de lesten Slaven free kamen. 1848 weer dat ok in Frankriek sowiet un de Slaveree, de wedder inföhrt wurrn weer, is in dat ganze Kolonialriek verbaden wurrn.

Breef över de Freelaten vun de Slavin Lina Julia Vasilda, 19. Määrt 1860

1859 hefft de Nedderlannen de Slaveree afschafft in de Dele vun Oost-Indien, de direkt vun nedderlannsche Regeerung kuntroleert wurrn sünd. Dat höör to den Minister vun de Kolonien, Jan Jakob Rochussen, siene Strategie. En Johr later is dat Book Max Havelaar rutkamen. Dat weer de Anklaag vun Multatuli (Eduard Douwes Dekker) gegen de Nedderlannsche Politik in Nedderlannsch-Indien. Veer Johre later, in dat Johr 1863, is dat so wiet ween un de Nedderlannen hefft de lukrative Slaveree in de westinischen Kolonien Suriname un de Nedderlannschen Antillen afschafft. Bit up Spanien un Portugal sünd de Nedderlannen een vun de lesten Länner in Europa ween, de de Slaveree afschafft hefft.

Slavengeschäft un Auktschoonshuus 1864 in Atlanta, Georgia, USA, just, ehr de Slaveree dor afschafft wurrn is

De USA hefft in'n September 1862 de Emanzipatschoonsproklamatschoon vun Präsident Abraham Lincoln sehn. Dormols weer dat Enne vun de Slaveree en vun de Telen, wo de Noordstaten in den Amerikaanschen Börgerkrieg up tostüern wullen. An'n 1. Januar 1863 is dat Enne vun de Slaveree in de Noordstaten in Kraft treden.

In Brasilien hett Prinzess Isabella 1888, as Kaiser Peter II. buten Lands weer, de Lei de Aurea unnertekent. Dor is de Slaveree in dat Land mit afschafft wurrn.

In de Länner in Nedderlannsch-Indien, de nich direkt in'e Hand vun de nedderlannsche Regeerung legen, is de Slaveree bit in dat 20. Johrhunnert legitiem bleven. Up dat Eiland Sumbawa sünd de Slaven eerst an'n 31. Määrt 1910 freelaten wurrn.

Ok in bestimmte Delen vun Asien un Afrika, unner annern in Arabien, Liberia un Äthiopien hett dat noch bit in dat 20. Jihrhunnert Slaveree geven. In Äthiopien is se 1931 afschafft wurrn. As dat leste Land up de Welt hett Mauretanien de Slaveree 1980 upböört. Man in de Praxis is de Slaveree wiss nich up de ganze Welt afschafft.

Weblenken[ännern | Bornkood ännern]

Slaveree. Mehr Biller, Videos oder Audiodateien to’t Thema gifft dat bi Wikimedia Commons.