Flagg vun Barbados

Vun Wikipedia
FIAV Flagg vun Barbados (Format 2:3)

De Flagg vun Barbados (The Broken Trident) is an’n 30. November 1966 annahmen worrn. De Flagg is vun Grantley W. Prescod utarbeit worrn. Sien Vörslag is bi en apentlichen Wettstriet ut 1029 Insennen utwählt worrn, de vun de barbaardschen Regeeren utropen weer.

Utsehn un Bedüden[ännern | Bornkood ännern]

De Natschonalflagg vun Barbados is en Trikolore in de Klören Ultramarinblau, Goldgeel (geiht licht in’t Oraansch) un wedder Ultramarinblau.

Op de goldgele Flach in de Mitt is de swarte Dreetacken vun den Seegott Neptun mit en afbroken oder afsneden Steel dorstellt. Dat Teken steiht för de Unafhangigkeit vun dat Eiland na de Kolonialherrschop dör Grootbritannien un is vun dat olle koloniale Wapen afleidt. Togliek warrt dormit ok de Verbunnenheit vun Barbados mit de hoge See wiest. Jede Spitz vun den Dreetacken betekent een vun de Prinzipien vun de Demokratie: De Regeeren vun’t, för’t un dör’t Volk.

De Klöör Ultramarin steiht för den Himmel (linke Striepen) un den Ozean (rechte Striepen), wiel Goldgeel de goldene Farv vun den Sand an de Strännen vun Barbados weddergifft.

Historie[ännern | Bornkood ännern]

Kolonialflagg vun 1870–1966

In de Tiet vun 1870 bit 1966 hett Barbados en Siegel mit en Figur bruukt, de op en Wagen steiht, de vun twee Seepeerd tagen warrt un en Dreetacken in de Hannen hett. De Dreetacken stünn för de Herrschopp vun Grootbritannien över de See. Dit Siegel finnt sik ok op de Flagg, dat de britische Kolonie vun 1985 an bruukt hett. De Utföhren mit den blauen Achtergrund un den Union Jack in de böveren linken Eck weer begäng för Lannen in’n Besitt vun Grootbritannien.

As Barbados 1966 vun de Westindischen Föderatschoon unafhangig worrn is, hett dat Land sien hüütige Flagg kregen. De Dreetacken as dat olle Teken för de britische Herrschop is nu an’n Steel afbroken.

Flaggenprotokoll[ännern | Bornkood ännern]

Natschonalflagg in’n Wind

Na de Bestimmen vun’t Gesettschall de Natschonalflagg an apentliche Hüüs un an’n Trafalgar Squarein de Hööftstadt Bridgetown jeden Dag vun Klock söss morgens bit Klock söss avends weihn. Jüst so kann se an Bowarken vun de Regeeren un an Scholen sett warrn, wenn de apen sünd. Na Klock söss avends dröff de Flagg blots noch binnen in Hüüs bruukt warrn.

As Truerteken kann de Flagg of Halfmast sett warrn. Över so en Fall hett dat Regeerenskabinett to befinnen. De Flagg dröff ok nich koppöver sett warrn, also mit en Dreetacken, de na ünnen wiest. En Utnahm dorvun is blots as Teken för Noot un Lieden.

Wenn de Flagg sett warrt, dröff se keen Kuntakt to’n Bodden oder to annere Saken hebben as Möbel, Bööm, Hüüs oder Fohrtüüch.

Annere Flaggen vun Barbados[ännern | Bornkood ännern]

In de Traditschoon vun Grootbritannien hett Barbados en Seekriegsflagg mit dat Georgskrüüz (en root Krüüz op witten Grund) un de Natschonalflagg in de böveren Liek.

Offiziell is de britische Königsche Elisabeth II. Staatsbaas vun Barbados. Wenn se op Barbados togang is, bruukt se en Flagg mit gelen Achtergrund, op de wedder de Fiegenboom un de beiden ro’en Orchideen ut dat Staatswapen abillt is. Op den Fiegenboom liggt dat persönliche Emblem vun Elisabeth II. mit dat goldene „E“ un de Kroon op blauen Grund.

De Königsche warrt, wenn se nich op Barbados is, dör den Generalgouverneur vertreden, de op sien Flagg en Kroon mit den britischen Löwen un en Spröökband mit de Inschrift „Barbados“ op blauen Grund föhrt. De Proportschoon bedriggt hier 3:4.

De Premierminster vun Barbados föhrt en Flagg, de schraag deelt is. De ünner Hälft na de Liek is blau, de bövere Hälft na’n Flaagdeel is goldgeel. Langs de splitten Lien verlöpt en swart-witt Tau, dat in de Mitt vun de Flagg en witte Schiev mit dat Staatswapen umsluten deit. De Proportschoon bedriggt hier 2:3.

Literatur[ännern | Bornkood ännern]

Weblinks[ännern | Bornkood ännern]

Flaggen vun Barbados. Mehr Biller, Videos oder Audiodateien to’t Thema gifft dat bi Wikimedia Commons.