WarGames

Vun Wikipedia
Filmdaten
Plattdüütsch Titel:
Originaltitel: WarGames
Düütsch Titel: WarGames – Kriegsspiele
Produkschoonsland: USA
Johr vun’t Rutkamen: 1983
Läng: 108 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: John Badham
Dreihbook: Lawrence Lasker
Walter F. Parkes
Walon Green
Produkschoon: Harold Schneider
Leonard Goldberg
Musik: Arthur B. Rubinstein
Kamera: William A. Fraker
Snitt: Tom Rolf
Szenenbild: Angelo P. Graham
Kledaasch: Barry Francis Delaney
Dorstellers

WarGames (op Platt so veel as „KriegSpelen“; dt. Titel: WarGames – Kriegsspiele) is de Titel vun en US-amerikaansch Filmdrama un Thriller ut dat Johr 1983 mit Matthew Broderick un Ally Sheedy in de Hööftrullen. In’t Johr 2008 is dorto en tweeten Deel rutkamen mit den Titel Wargames: The Dead Code.

Inholt[ännern | Bornkood ännern]

De Film speelt 1983, also to de Tiet, as de Kole Krieg noch aktuell weer. Dat geiht los dormit, dat glieks na’n Wachwessel in en Silo för Atomraketen Alarm för en Atomangreep mellt warrt un de beiden Soldaten Befehl kriegt, jemehr Raketen aftoscheten. De verantwoortliche Offizeer bringt dat aver nich över’t Hart. Kort dorna warrt kloor, dat de Militärföhren den Befehl geven hebbt, üm to kieken, dat dat in’n Eernstfall ok allens sien Gang geiht. Man, meist een Veerdel vun de Soldaten hebbt jemehr Raketen nich losschickt. Üm den minschlichen Fakter mit sien Geföhlen ruttonehmen, warrt nu vörslahn, dat de Kontroll över de Atomraketen nich mehr bi Soldaten liggen schall, man bi den NORAD-Reekner W.O.P.R (War Operation Plan Response). De eersten Stüttpunkten warrt kort dorna ümrüst.

To de glieken Tiet hackt sik de Schooljung David, de sik veel mit Reeknertechnik befaat un sik dormit ok bannig goot utkennt, mit sien IMSAI-Microreekner in dat System vun en Hersteller vun Reeknerspelen in, üm sik de neesten Spelen, de bald rutkamen schüllt, rünnertoladen un uttoproberen. Mit sien Akustikkoppler wählt he all Telefonnummern in Sunnyvale, Kalifornien an un finnt ok bald en System, dat utsütt, as künn sik dat för em lohnen. Man, wat David nich weet is, dat he nich bi en Speelhersteller lannt is, man sik in WOPR inhackt hett, den Reekner bi NORAD, de in de Twüschentiet de US-amerikaanschen Nuklearwapen kontrolleert.

Ahn Passwoort kummt David aver nich an de Programmen ran, de he för Spelen hollt. He fraagt en Programmschriever üm Raat, de em vertellt, dat he villicht över en Backdoor in dat System kummt, de de Sekerheitssystemen ümgeiht. As Schriever vun’t Programm maakt se gau en Mann ut, de Falken heet. David maakt sik över em klook, in de Hapen, dat he so op dat Passwoort finnt. Falken, so finnt he rut, hett sik mit künstliche Intelligenz befaat. De is aver in de Twüschentiet storven, as sien Fro un sien Söhn Joshua bi en Unfall ümkamen sünd. Tosamen mit sien Fründin Jennifer kummt David op den Infall, dat „Joshua“ dat Passwoort wesen müss. So krigg David Togang to WOPR un fangt mit den Reekner dat Speel „weltwieten thermonuklearen Krieg“.

De Reekner fangt nu an, dat „Speel“ uttoföhren, wat bedüüt, dat he nu en Simulatschoon för den drüdden Weltkrieg maakt, de op de Bildschirmen in NORAD opdukt un dor nu glieks to’n högere Alarmstoop (DEFCON) föhrt. En Techniker markt, dat en Simulatschoon vun buten inhackt worrn is un kann de Laag toeerst opkloren. Gau finnt de Militärs rut, woneem de Anroop herkamen is. Gliektietig höört David un Jennifer vun den Vörfall in de Narichten un warrt bang, dat se nu groten Arger kriegen doot. David brickt dat Speel glieks af un will jüst all Sporen tonichten maken, as de WOPR-Reekner em torüchropen deit un em vertellt, dat dat Speel wietergeiht. David kann nix doon, üm dat Speel aftobreken un em warrt kloor, dat he mööglicherwies den drüdden Weltkrieg utlöst hett. ’N beten later warrt he vun’n Geheemdeenst fastnahmen. He warrt na NORAD bröcht un verhöört, blots glöven deit em keeneen.

In NORAD finnt David rut, dat Falken noch leevt, man mit ne’en Naam un ünner en geheeme Adress. Ünner Spionaasch-Verdacht insparrt, kann David aver mit’n Trick utbeihn un Kuntakt mit Jennifer opnehmen, de em helpen kummt. Tosamen söökt se Professer Falken un finnt em in sien geheeme Wahnsteed. Se verkloort em de Situatschoon, stellt aver fast, dat Falken so verbiddert is, dat he sik nich dorför intresseert, wat mit de Welt passeert. De jungen Lüüd kamt nich an em ran un gliektietig löpt jem de Tiet weg, vun wegen dat WOPR nu kort dorför steiht, de Atomraketen aftoscheten. Falken hett nu aver doch en Insehn, un flüggt de beiden mit sien priavten Heevschruver na NORAD, woneem he de Militärs verkloort, wat vör sik geiht.

Kort beför de Katastroof losgeiht, hett David den Infall, mit den Reekner Tic Tac Toe to spelen un den Reekner so bitobringen, dat dat ok Spelen gifft, bi de keen Siet winnen kann. So kann he de Maschien dorvun övertügen, dat en Atomkrieg sinnlos is, vun wegen, dat de Minschen dorbi nich winnen künnt. In letzte Sekunn brickt WOPR dorophen dat „Speel“ af un de Laag is wedder ünner Kontroll.

Kritiken[ännern | Bornkood ännern]

Roger Ebert hett in de Chicago Sun-Times vun’n 3. Juni 1983 schreven, da de Film togliek emotschonal as ok intellektuell interessant weer. Dat Enn vun’n Film beteken he as wunnerbor (wonderful). Ebert hett sünners de Figuren loovt, de vun Dabney Coleman un Barry Corbin speelt weern.

De TV Spielfilm schreev: Intelligente, subversive Hightech-Thriller-Unterhaltung und cleveres „Kriegsspiel“ aus der Reagan-Ära … Regisseur John Badham entwickelte aus diesem Stoff der allgegenwärtigen Bedrohung der Menschheit durch Maschinen einen respektablen Thriller, der allerdings in der klischeehaften Heroisierung des Knaben David und der kollektiven Vertölpelung der Erwachsenen sehr amerikanisch wirkt – und damit im Auge des aufgeklärten europäischen Betrachters regelrecht dämlich. An den Kinokassen zahlte sich das Rezept indes aus: Die computerbesessene Generation der amerikanischen Teenager stürmte seinerzeit millionenfach die Lichtspielhäuser. Ein Oscar war Wargames nicht vergönnt, obwohl der technisch brillante Film in den Sparten Drehbuch, Kamera und Ton für die Trophäe nominiert worden war.

Utteken[ännern | Bornkood ännern]

De Film weer för 17 Filmpriesen vörslahn, dorünner ok för dree Oscars in de Kategorien Best Kamera, Best Toon un Best Originaldreihbook. Dorvun künn he opletzt aver keen winnen. Uttekent worrn is WarGames mit dree Priesen:

  • 1984: mit den Saturn-Pries in de Kategorie Best Speelbaas för John Badham.
  • 1984: mit den BAFTA Film Award in de Kategorie Best Toon för Willie D. Burton, Michael J. Kohut, William L. Manger.
  • 1984: mit den Eddie-Award in de Kategorie Best sneden Speelfilm för Tom Rolf.

Achtergrund[ännern | Bornkood ännern]

In den Film warrt vele Aspekten ut dat Hackerümfeld opgrepen. So dringt David in dat System vun’t Flaagboken, bedrifft Wardialing un Phreaking un crackt den Schoolreekner, üm sien Noten to ännern. Dör Social Engineering kummt he an Passwöör un sliekt sik in den WOPR dör en Backdoor in. In den Film warrt sien Reserveren för en Flaag för sik un sien Fründin, so utleggt, dat he en Kumplizen hett. De Verdächtigen ut Informatschonen, de an sik nich wichtig sünd, is en Problem, för dat Datenschulers vundaag Wohrschau geevt.

An den Film anlehnt is dat Videospeel WarGames oder ok Computer War, dat 1983 vun de Firma THORN EMI Video publizeert worrn is för verschedene Reeknersystemen. Ok dat Reeknerspeel DefCon (2006, Introversion Software) grippt vör allen optisch elementen ut den Film op. In dat Videospeel Uplink (2001, Introversion Software) kann man op en onimösen Protovision Game Server mit de IP-Adresse 284.345.42.283 (de in’n wirklichen IPv4-Adressruum nich gellt) un mit dat Passwoort „joshua“ en „weltwieten Thermonuklearen Krieg“ spelen.

Anners wat[ännern | Bornkood ännern]

  • Dat Brukerkonto „Steven Falken“ weer lange Tiet en Standard bi dat Bedriefsystem NetBSD as Ehren an den Film.
  • De Reekner vun David weer en wohrhaftig Modell. Dorbi hannelt sik dat üm en IMSAI 8080, de aver al siet 1976 nich mehr herstellt worrn is un to de Tiet, as de Film rutkeem, an sik al bannig oolt weer. Achtergrund dorför weer de Ansicht vun de Produzenten, dat en jungen Kerl as David sik finanziell keen modernen Reekner leisten kann. Blangen den Reekner sülvst kamt eenige technische Redschoppen vör: en IMSAI IKB-1 Tastatur, en IMSAI FDC-2 dual 8" Diskettenloopwark, en 17" Electrohome Monitor un en 1200 Baud Cermetek 212A Modem, dat mit den Firmennaam „IMSAI“ överkleevt worrn is.
  • En wohrhaftige Parallele weer in’t glieke Johr en Atomraketenangreep vun de USA op de Sowjetunion, de dör en Fehler vun en Reekner anwiewst worrn is. De Offizeer Stanislaw Petrow, de Deenst hatt hett, hett den Angreep aver nich wieterleidt un dormit mööglicherwies en drüdden Weltkrieg hinnert.
  • De Simulatschoonsreekner W.O.P.R. warrt in dat Reeknerspeel Call of Duty 4 - Modern Warfare noch eenmol opgrepen.

Publikatschonen[ännern | Bornkood ännern]

  • Book: „WarGames. Kriegsspiele.“ vun David Bischoff, Lawrence Lasker, Walter F. Parkes, Heyne Verlag (1983), ISBN 3-453-01920-2
  • DVD: „Wargames - Kriegsspiele“ mit Matthew Broderick, Dabney Coleman, un John Wood, 2006.
  • VHS: „Wargames - Kriegsspiele“ mit Matthew Broderick, Dabney Coleman, un John Wood, 1999.

Weblenken[ännern | Bornkood ännern]