The Birds (Film)

Filmdaten
Plattdüütsch Titel:	—
Originaltitel:	The Birds
Düütsch Titel:	Die Vögel
Produkschoonsland:	USA
Johr vun’t Rutkamen:	1963
Läng:	115 Minuten
Originalspraak:	Engelsch
Öllersfreegaav in Düütschland:	FSK 16
Filmkru
Speelbaas:	Alfred Hitchcock
Dreihbook:	Evan Hunter
Produkschoon:	Alfred Hitchcock för Universal Pictures
Musik:	Bernard Herrmann Oskar Sala
Kamera:	Robert Burks
Snitt:	George Tomasini
Szenenbild:	Robert F. Boyle
Kledaasch:	Edith Head Rita Riggs
Dorstellers
Tippi Hedren: Melanie Daniels Rod Taylor: Mitch Brenner Jessica Tandy: Lydia Brenner Suzanne Pleshette: Annie Hayworth Veronica Cartwright: Cathy Brenner Charles McGraw: Sebastian Sholes Ethel Griffies: Mrs. Bundy Karl Swenson: en Besopenen Joe Mantell: en Hannelsreisenden Ruth McDevitt: Mrs. MacGruder Malcolm Atterbury: Al Malone Elizabeth Wilson: Helen Carter Doreen Lang: hysteersche Mudder Lonny Chapman: Deke Carter John McGovern: Postbeamten

The Birds (op plattdüütsch so veel as „De Vagels“; dt. Titel: Die Vögel) is en Speelfilm vun den beropenen Speelbaas Alfred Hitchcock ut dat Johr 1963. Dat Dreihbook baseert op de gliek nöömte Kortgeschicht ut dat Johr 1952 vun de engelschen Schrieversche Daphne du Maurier. The Birds gellt as en Klassiker vun’n Horrorfilm un een vun de Hööchdpunkten vun Hitchcock sien laat Wark. In de USA weer an’n 28. März 1963 de Kinostart, in Düütschland keem de Film en half Johr later in de Kinos.

Inholt

In en Deerladen in San Francisco loopt sik de Afkaat Mitch Brenner un de verwöhnte, sülvstbewusste mitünner ok inbillte Melanie Daniels över’n Weg. He föhrt ehr an de Nees rüm, wat se em torüchbetahlen will. Se sett sik in’t AUto un föhrt na Bodega Bay, woneem Mitch sien Wekenennen tobringt. Man, an de Küst warrt se vun en Mööv angrepen un kriggt an’n Kopp wat af. Se kann eerstmol bi de Schoolmeestersche Annie Hayworth ünnerkamen, de fröher wat mit Mitch harr un Melaine för de Mudder warnen deit. De is neemlich bang, dat ehr Söhn wegen en Fro ut’t Huus gahn künn.

An’n nächsten Dag gifft dat bi de Geboortsdagsfier vun Mitch sien lütte Süster Cathy wedder en Angreep vun Vagels, de sik in grote Tall op de Kinner störten un jem in’t Gesicht un op’n Kopp hacken doot. Melanie verkrüppt sik bi de Brenners, woneem sik jümmer mehr Vagels anfinnt. Later den Avend versöcht en heel Schoof dör den Kamin in dat Huus rintokamen. As de Mudder an’n nächsten Dag en Naver besöken will, finnt se dat eerste Opper vun de Angreep: De Liek vun en Buer liggt mit uthackte Ogen in sien Slaapkamer.

Jümmer fakener griept de Vagels de Minschen an, ahn dat dorför en Grund to sehn is. Un jeed mol warrt se dorbi aggressiver. Bi den Versöök, Mitch sien lütte Süster to redden kummt ok Annie üm’t Leven. Ünner Schock verrammelt sik de Brenners in jemehr Huus. Se nagelt se Finster un Dören to, man dat schient kuum to helpen. Bi en Angreep op’n Böhn warrt Melanie üm een Hoor vun de Vagels doot hackt. Se bruukt unbedingt de Help vun en Dokter, butendem warrt de Laag in’t Huus jümmer slechter. Se maakt sik de veer Protagonisten tosamen op’n Weg na buten, woneem sik en mehr oder minner apokalaptisch Bild wiest: de hele Landschop is övervull vun Vagels. Man se griept jem nich an. Langsom föhrt se ut de Garaasch op en Enn to, dat nich wiss is.

Kritik

Dat Lexikon vun’n internatschonalen Film loov dat Ümsetten vun de Geschicht dör Hitchcock, de ut dat Thema vun de Novell en achtergrünnige Weltünnergangsvision maakt harr. De Evangeelsche Filmbeobachter schreev dorgegen, dat de Film achter annere Hitchcock-Filmen torüch bleven weer, un stell in Twievel, wat de Film en deeperen Sinn oder Düden harr.

Utteken

The Birds weer tohopen för söss Filmpriesen vörslahn, dorünner ok för den Oscar in de Kategorie Best Trickeffekt för Ub Iwerks. Wunnen hett de Film twee Priesen:

• 1964: den Golden Globe in de Kategorie Veelversprekenst Needorstellersche för Tippi Hedren.
• 2001: den Video Premiere Award för de Best DVD Original Retrospective Documentary/Featurette för Laurent Bouzereau (för’t DVD-Material All About ‚The Birds‘)

Achtergrund

Bodega Schoolhouse, März 2012.

• De Deerladen in San Francisco, de to Anfang vun’n Film vun en groten Swarm Vagels överflagen warrt, liggt direkt bi’n Union Square. De Hööftoort vun den Film Bodega Bay liggt an de Westküst vun de USA ruchweg 100 km noordwestlich vun San Francisco. De verscheden Steden, de tosamen den Indruck vun en Lüttstadt maakt, sünd in Wohrheit ut verschedene Öörd tosamenföögt. Blots en eenzige Szeen – in de de Kinner vör de angriepen Vagels ut de School wegloopt – is wohrhaftig in Bodega Bay dreiht worrn. Op de annern Siet vun de Bucht liggt Bodega Head, woneem all Szenen op dat Anwesen vun de Brenners dreiht weern. Dat Huus un de Schünn geev dat aver in Wohrheit nich, dat weern blots Kulissen, de blots för den FIlm opboet weern.

• En Ünnermalen vun den Film mit en musikaalschen Soundtrack is bi The Birds weglaten worrn. Hitchcock hett dorför ünner de Opsicht vun sien leefsten Komponisten Bernard Herrmann vun den düütschen Komponist Oskar Sala op den sien Trautonium mit Montaaschen vun elektroonsche Vagelluden Tooneffekten arbeit. Jüst de Spannung, de ahn Musik dör den Film tüügt warrt, gifft em in’n Sinn vun de Musikwetenschop en sünnere Bedüden. In den Film is keen eenzige natürlich Vagelstimm to hören.

• As in de meisten vun sien Filmen, hett Hitchcock ok hier een vun sien Cameo-Optreden. He is glieks to Anfang to sehn, as he mit twee Hunnen an de Lien ut den Deerladen kummt, woneem sik Melanie un Mitch kennen lehrt.

• Dat Thema vun den Film is vun Daphne du Maurier övernahmen, man de Dramaturgie, de Figuren un de Öörd sünd völlig anners. Ok Hitchcock sien Filmen Rebecca un Jamaica Inn weern na en Vörlaag vun Daphne du Maurier schreven.

• Dat Motiv vun de Vagels, de Minschen angriept, is in en US-amerikaanschen Feernsehfilm ünner den Titel The Birds II: Land’s End (dt.: Die Vögel II – Die Rückkehr) nochmol opgrepen worrn. Tippi Heren is dor in en Nevenrull to sehn. En Tosamenhang mit Hitchcock sien Film gifft dat aver nich. Mit Die Krähen is 2006 ok en düütsche Adapschoon vun dat Thema rutbröcht worrn.

• In’t Johr 2007 is vun den Film en Remake ünner den Titel KAW (dt.: Die Vögel – Attack From Above) rutkamen, bi den Sheldon Wilson Speelbaas weer. Rod Taylor speelt dor as Hööftdorsteller vun fröher sogor en Nevenrull in. De Hööftrullen speelt Sean Patrick Flanery un Stephen McHattie.

Literatur

• Daphne du Maurier: Die Vögel (Original: The Birds). In: se sülvst: Ein Grenzfall. Erzählungen. Büchergilde Gutenberg, Frankfort an’n Main/Olten/Wien 1982, ISBN 3-7632-2729-6
• Camille Paglia: Die Vögel. Der Filmklassiker von Alfred Hitchcock (Original: The Birds). Europa Verlag, Hamburg/Wien 2000, ISBN 3-203-84107-X
• Donald Spoto: The Art of Alfred Hitchcock. Hopkinson and Blake, New York 1976, ISBN 0-911974-21-0, S. 380-395
• Robin Wood: Hitchcock's Films. New York 1977
• Slavoj Žižek: Warum greifen die Vögel an? in: he sülvst (Rgv.): Was Sie immer schon über Lacan wissen wollten und Hitchcock nie zu fragen wagten. Suhrkamp, Frankfort an’n Main Verlag 2002, ISBN 3-518-29180-7, S. 181-186
• François Truffaut: Mr. Hitchcock, wie haben Sie das gemacht? (1966). Heyne, München 2003, ISBN 3-453-86141-8, S. 277-290
• Robert A. Harris/Michael S. Lasky/Joe Hembus (Rgv.): Alfred Hitchcock und seine Filme (Original: The Films of Alfred Hitchcock). Goldmann, München 1976, ISBN 3-442-10201-4

Weblenken

• The Birds in de Internet Movie Database (engelsch)
• Filmplakaten
• Review bi filmsite.org (engelsch)
• Filmbesnacken op engelsch mit Anmarken to de Tricktechnik