Stapel (Landkreis Rodenborg)
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27367 | |
| Vörwahl: | 04288 | |
| Geograafsche Laag: | Koordinaten:53° 11′ N, 9° 12′ O53° 11′ N, 9° 12′ O | |
|
| ||
Stapel (hoochdüütsch Stapel) is en Dörp in de Gemeen Horß (Samtgemeen Söttmer) in’n Landkreis Rodenborg, Neddersassen.
Geografie
[ännern | Bornkood ännern]Dat Dörp liggt op de Geest. Dat Land ümto is deelwies Moor un deelwies Holt. Dat Water ut’n Noorden von Stapel flütt över de Wall af un ut’n Süden över de Otterster Beek.
De Naveröörd sünd Winkeldörp in’n Noorden, Narbn in’n Noordoosten, Horß in’n Oosten, Bittst in’n Süüdoosten, Taaken in’n Süden, Benkel in’n Süüdwesten, Hollinghusen in’n Westen un Vörwark in’n Noordwesten.
Historie
[ännern | Bornkood ännern]Stapel kummt 1230 as tom stapele toeerst in en Göderlist von de Greven von Heien vör. Se harrn dat Klooster Corvey en Reeg bobergsche Göder afköfft un den Hoff in Stapel as Lehn an Bertold von Otterst vergeven.
In’n Eersten Weltkrieg sünd söven Soldaten ut Stapel fullen oder vermisst un in’n Tweten Weltkrieg ölven.
Bet in dat Johr 2001 weren de Huusnummern dör dat ganze Dörp dörnummereert. Sietdem gifft dat Stratennaams un de Huusnummern gellt för de Straat.
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Horß in’n Kanton Otterbarg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1859 to de Huusvaagdie Otterbarg in dat Amt Otterbarg tohöört un denn von 1859 bet 1885 to dat Amt Rodenborg. Na 1885 weer dat in’n Kreis Rodenborg, de 1977 mit’n Landkreis Bremervöör tohoopgahn is un den hüdigen Landkreis Rodenborg billt hett.
De Gemeen Stapel is 1969 Maat von de Samtgemeen Söttmer worrn un an’n 1. März 1974 mit de Gemeenreform in Neddersassen Deel von de Gemeen Horß.
Inwahnertall
[ännern | Bornkood ännern]| Johr | Inwahners |
|---|---|
| 1791[1] | 9 Füürsteden |
| 1812[2] | 69 |
| 1824[3] | 18 Füürsteden |
| 1848[4] | 107 Lüüd, 23 Hüüs |
| 1. Dezember 1871[5] | 157 Lüüd, 25 Hüüs |
| 1. Dezember 1885[6] | 133 Lüüd, 26 Hüüs |
| 1. Dezember 1905[7] | 124 Lüüd, 23 Hüüs |
| 1. Dezember 1910[8] | 122 |
| 1925[9] | 142 |
| 1933[9] | 142 |
| 1939[9] | 143 |
Religion
[ännern | Bornkood ännern]Stapel is evangeelsch-luthersch präägt un höört to dat Kaspel von de Johannes-de-Döper-Kark in Horß. Düsse Kark is 1963 boot un 1989 as Karkengemeen egenstännig worrn. Vörher hett Stapel to dat Kaspel von de Georg-Kark in Söttmer höört.
För de Kathoolschen is de Corpus-Christi-Kark in Rodenborg tostännig.
De Karkhoff Stapel is 1896 anleggt worrn. Vörher sünd de Doden bi de Kark in Söttmer begraven worrn.
Börgermeesters
[ännern | Bornkood ännern]| Tied | Naam |
|---|---|
| –1859 | Cord-Hinrich Holsten |
| 1859–1868 | Johann Cord Fajen |
| 1868–1874 | Dietrich Bartels |
| 1874–1880 | Hermann Otten |
| 1880–1886 | Dietrich Otten |
| 1886–1896 | Johann Wahlers |
| 1896–1908 | Dietrich Wahlers |
| 1908–1919 | Dietrich Holsten |
| 1919–1921 | Hinrich Fajen |
| 1921–1926 | Heinrich Tewes |
| 1926–1945 | Dietrich Windeler |
| 1945–1946 | Dietrich Behnken |
| 1946–1961 | Dietrich Behling |
| 1961–1968 | Hinrich Holsten |
| 1968–1970 | Kurt Ernst |
| 1970–1972 | Hermann Heinecke |
| 1972–1974 | Friedo Fajen |
Kultur
[ännern | Bornkood ännern]En Denkmaal för de Fullenen ut’n Eersten Weltkrieg is üm 1922 anleggt worrn.
Weertschop un Infrastruktur
[ännern | Bornkood ännern]Stapel hett en egene freewillige Füürwehr, de 1937 grünnt worrn is.
Elektrischen Stroom hett de Oort in dat Johr 1921 kregen. Fleten Water hett dat eerst 1980 för den ganzen Oort geven. De Ansluss an dat Afwaternett keem 1993/1994 un an dat Eerdgasnett 2000.
In de Förderanlaag Taaken Z 1 bi Stapel warrt siet 1982 ut dat Rotliegend in en Deepd von 5400 Meter Eerdgas fördert.
Verkehr
[ännern | Bornkood ännern]Dör Stapel löppt de Kreisstraat 203, de in’n Oosten bi Horß an de K 201 ran geiht un in’n Süden na Taaken un dor ok an de K 201. De K 201 föhrt in’n Süden wieder an Reeßen langs un na Söttmer un in’n Noorden na Winkeldörp.
De hüdige K 203 na Taaken is 1928 as faste Straat anleggt worrn. De K 203 na Horß is eerst 1967 boot worrn.
De nächste Autobahn is de Autobahn 1 (Afsnidd Hamborg–Bremen). De Opfohrt 49 Bokel liggt so acht Kilometer in’n Noordoosten von Stapel an de B 71.
De nächste Bahnhoff is so bi ölven Kilometer wied weg in’n Süden de Bahnhoff Söttmer an de Bahnlien Hamborg–Bremen. Von 1906 bet 1968 hett dat ok Personenverkehr op de Bahnlien Bremervöör–Wasra geven. De nächste Bahnhoff weer in disse Tied acht Kilometer in’n Oosten in Mulmshoorn.
Scholen
[ännern | Bornkood ännern]Dat eerste Maal kummt 1727 in ole Ünnerlagen en egen Schoolmeester in Stapel vör. Vörher güngen de Kinner in Horß na School. Dat eerste Schoolhuus is 1834 boot worrn. In de Tied von’n Tweten Weltkrieg weer de Schoolmeester as Soldaat intagen un de Kinner güngen bet 1945 in Horß na School. 1951 is en neet Schoolhuus boot worrn. De Volksschool hett denn 1966 dichtmaakt. Nu gaht de Kinner na de Grundschool Horß.
Lüüd
[ännern | Bornkood ännern]De Kumponist Hans-Martin Majewski hett 1962 dat ole Forsthuus in Stapel köfft un dat as sien Landsitt utboot. He hett dor lange Johren leevt un is ok op’n Karkhoff Stapel begraven.
Literatur
[ännern | Bornkood ännern]- Stapel - Streifzüge durch Gegenwart und Vergangenheit eines Geestdorfs. 2007, ISBN 978-3-00-020848-5
Footnoten
[ännern | Bornkood ännern]- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 216
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 97
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 572
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 138
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 168
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 180
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 150
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de