Raspaculo

Vun Wikipedia
Zur Navigation springen Zur Suche springen
Raspaculo
Laag Cayo, Belize
Stroomsystem Belize River
Läng 55 km
Born in de Maya-Bargen
Münn in’n Macal River
linke Blangenströöm Raspaculo South Branch, Monkey Tail

De Raspaculo (ok Raspaculo River oder Raspaculo Branch) is en üm un bi 55 Kilometer langen Stroom in’n Distrikt Cayo von dat Land Belize, de in’n Macal River münnt.

De Stroom hett sien Born in de Maya-Bargen an de Grenz von’n Distrikt Cayo na’n Distrikt Stann Creek (Waterscheed to’n Pull Shoes Branch un Cocoa Branch von’n Sittee River). Von dor flütt he eerst so bi twölv Kilometer na Westen un dreiht denn för 15 Kilometer na Süüdwesten. Dorbi nimmt he von links den Raspaculo South Branch op, de bet dorhen 21 Kilometer lang is. De Born von’n Raspaculo South Branch liggt an de Waterscheed to’n Mare’s Nest Left Hand Branch von’n Swasey Branch un in de Neegd von’n Victoria Peak.

De Raspaculo sülvs flütt denn 15 Kilometer na Westen un nimmt von links den Monkey Tail op, de bet dorhen 40 Kilometer lang is. De Raspaculo flütt de letzten teihn Kilometer na Noordnoordwesten un münnt denn in’n Macal River. Düsse letzten Kilometer doot siet 2005 in’n Stausee von’n Chalillo-Staudamm liggen.

De kumplette Loop von’n Stroom is as Deel von’n Chiquibul-Natschonaalpark un von de Chiquibul Forest Reserve schuult. Öörd gifft dat an’n Stroom gorkeen, he löppt kumplett dör’n Woold von de Maya-Bargen. De lierlütte Oort Augustine is Luftlien 15 Kilometer wied weg von de Münn von’n Raspaculo. Öörd dichterbi gifft dat nich.


Koordinaten:16° 51′ N, 88° 57′ W