Psamathe (Maand)

Vun Wikipedia

Psamathe (ok as Neptun X betekent) is een vun de buteren irregulären Maanden vun den Planet Neptun.

Opdecken[ännern | Bornkood ännern]

De Maand is vun de Forschers Scott S. Sheppard, David C. Jewitt, Jan Kleyna un John J. Kavelaars op Biller vun’n 4. Juli bit to’n 30. August 2003, vun’n 11. August 2001 un vun’n 14. bit to’n 16. August 2002 opdeckt worrn. De Opnahmen stammen vun’n Subaru-Teleskop an de Mauna-Kea-Steernwacht op Hawaii. Meist to glieken Tiet hett ok en Forschergrupp üm Matthew J. Holman den Maand opdeckt. Bekannt geven weer de Opdecken an’n 3. September 2003.

Mit vörlöpigen Naam weer de Maand as S/2003 N 1 betekent. Nadem is keen wieteren Neptun-Mannd mehr funnen worrn. In’n Februar 2007 hett he den sien offiziellen Naam kregen. Nöömt is he na Psamathe (gr. för Sand), een vun de Nereiden ut de greekschen Mythologie.

Ümloop[ännern | Bornkood ännern]

Psamathe bewegt op en torüchlöpigen, bannig eliptischen Ümloopbahn üm Neptun. De Afstand ligt dorbi twüschen 25.687.000 un 67.703.000 km. De middlere Afstand to’n Neptun is 46.695.000 km. De Bahn vun den Maand is mit 0,4499 düchtig exzentrisch. Un ok de Bahnnegen is mit 146,6° ungewöhnlich groot. Dat is antonehmen, dat de Bahnegenschoppen dör Stören dör de Sünn wesselhaft sünd, vun wegen dat de Parameterangaven teemlich ünnerscheedlich wesen künnt.

De Maand is vun de Bahnnegen un de groten Halfass to verglieken mit sien Naver Neso. Wohrschienlich sünd beide ut en eenzigen Asteroiden entstahn, de vun Neptun infangen worrn un denn tweibroken is. De groten Halfassen leegt dicht an de butensten theoretischen Grenz för en bestännige Ümloopbahn vun retrograde Maanden. Dat Rebeet, in dat de Planet gravitativ Wirken deit, warrt dör sien Hill-Sphäär defineert, de bi Neptun ruchweg 116.000.000 km bedriggt. Man geiht dorvun ut, dat Maandbahnen bit in 67 % dorvun noch bestännig sünd, wat in dissen Fall üm un bi 76.300.000 km sünd.

Üm Neptun eenmol to ümkreisen bruukt Psamathe ruchweg 24,975 Johren – dat is mehr as dubbelt so lang, as Jupiter för een Ümloop üm de Sünn bruukt.

Physikaalsche Egenschoppen[ännern | Bornkood ännern]

Psamathe hett en middleren Dörmeter vun ruchweg 38 km un sien Dicht warrt op 1,5 g/cm³ afschätzt. Dorut lett sik sluten, dat de Maand to’n gröttsten Deel ut Ies besteiht. De Böverflach is enigermaten düster mit en Albedo vun blots 0,16. Dat heet, dat 16 % vun dat instrahlte Sünnlicht wedder reflekteert warrt. Na de Afschätzen vun den Dörmeter is Psamathe de lüttste vun de Neptun-Maanden, de bit hüüt opdeckt is.

Weblenken[ännern | Bornkood ännern]