Hippocamp (Maand)

Hippocamp (ok as Neptun XIV betekent) is de lüttste bekannte Maanden vun den Planet Neptun un tellt to Neptun sien binneren Maanden.

Opdecken

Hippocamp is an’n 1. Juli 2013 vun Mark Showalter an’t SETI-Institut in Mountain View/Kalifornien opdeckt worrn, wiel he Neptun sien Ringsystem ünnersöcht hett. Dorbi hett he en witten Punkt buten de Ümloopbahnen vun de Maanden Larissa un Proteus sehn. De Punkt is op mehr as 150 Archivopnahmen vun’t Hubble-Weltruumteleskop ut de Tiet twüschen 2004 un 2009 jümmer wedder opduukt, worut Showalter de Ünloopbahn vun den ne’en Maand utreken künn^[1]. Opnahmen vun de Ruumsond Voyager 2, de 1989 an Neptun vörbiflagen is, wiest den Maand wegen sien lütte Helligkeit nich^[2].

Naam

De Maand hett eerst de vörlöpige Beteken S/2004 N 1 kregen. Sien richtigen Naam kreeg he an’n 20. Februar 2019^[3]. En Hippokamp (greeksch ἱππόκαμπος, vun ἵππος „Peerd“ un κάμπος „Seeungedöm“) is en Fabelwesen, dat vörn de Gestalt vun en Peerd un achtern vun en Fisch hett. De Schrievwies Hippocamp geiht op de latiensche Form hippocampus torüch.

Ümloop

Hippocamp lööpt op en ruchweg kreisförmige Bahn üm Neptun mit en Exzentrizität vun meist 0 twüschen de Bahnen vun Larissa un Proteus in en middleren Afstand vun üm un bi 105.283 km to’n Middelpunkt vun Neptun. De Bahnnegen bedriggt ok meist 0°. För een Ümloop bruukt Hippocamp 22 h un 28,1 min^[4]^[2].

Physikaalsche Egenschoppen

Wetenschopplers gaht dorvun ut, dat Hippocamp en lütte Albedo hett, jüst so as de annern binneren Maanden. Ünner disse Annahm, künn de Dörmeter vun den Maand op höchstens 16 bit 20 km schätzt warrn. Ne’ere Ünnersöken wiest op en grötteren Dörmeter vun ruchweg 35 km hen^[5]. Dormit weer Hippocamp liekers de lüttste vun de opstunns bekannten Neptun-Maanden. Ofschoonst Hippocamp mit en schienbore Helligkeit vun 26,5 mag en bannig lütte Helligkeit hett, is he op de Biller vun’t Hubble-Teleskop jüst noch to sehn^[2].

Weblenken

Hippocamp. Mehr Biller, Videos oder Audiodateien to’t Thema gifft dat bi Wikimedia Commons.

Borns

↑ Hubble Finds New Neptune Moon Space Telescope Science Institute, 15. Juli 2013; afropen an’n 16. Juli 2013.
↑ ^a ^b ^c Kelly Beatty: Neptune's Newest Moon Sky & Telescope, 15. Juli 2013; afropen an’n 30. Juni 2017.
↑ Minor Planet Electronic Circular 2019-D16
↑ Sven Stockrahm: Astronomen stoßen im Archiv auf neuen Neptunmond vun’n 16. Juli 2013 op zeit.de; afropen an’n 22. Februar 2019
↑ M. R. Showalter, I. de Pater, J. J. Lissauer, R. S. French (2019): The seventh inner moon of Neptune, Nature, Utgaav 566 (7744), Sieten 350–353, doi:10.1038/s41586-019-0909-9

Maanden vun den Planeten Neptun

Kiek ok na bi: List vun de Neptunmaanden

[STSI-1] Hubble Finds New Neptune Moon Space Telescope Science Institute, 15. Juli 2013; afropen an’n 16. Juli 2013.

[SAT-2] Kelly Beatty: Neptune's Newest Moon Sky & Telescope, 15. Juli 2013; afropen an’n 30. Juni 2017.

[3] Minor Planet Electronic Circular 2019-D16

[zeit-2013-07-16-4] Sven Stockrahm: Astronomen stoßen im Archiv auf neuen Neptunmond vun’n 16. Juli 2013 op zeit.de; afropen an’n 22. Februar 2019

[5] M. R. Showalter, I. de Pater, J. J. Lissauer, R. S. French (2019): The seventh inner moon of Neptune, Nature, Utgaav 566 (7744), Sieten 350–353, doi:10.1038/s41586-019-0909-9

[1]

[2]

[3]

[4]

[5]