Larissa (Maand)

Vun Wikipedia
Larissa op en Bild vun Voyager 2

Larissa (ok as Neptun VII betekent) is een vun de Maanden vun’n Neptun.

Opdedcken un Naam[ännern | Bornkood ännern]

To’n eersten mol weer Larissa vun de Astronomen Harold J. Reitsema, William B. Hubbard, Larry A. Lebofsky un David James Tholen opdeckt, as se en Steernbedecken utweert hebbt un dorbi en lichten Helligkeitsaffall an’n 24. Mai 1981 faststellt hebbt. Vun wegen dat Neptun sülvst den Steern to en annere Tiet passeert hett, müss dat en anner’t Objekt wesen. Toeerst weer Larissa vör en Ringbagen vun’n Adams-Ring hollen worrn. As drütt bekannte Neptun-Maand kreeg he eerstmol de vörlöpige Beteken S/1981 N 1. Bekanntgeven weert de Opdecken dör de Internatschonale Astronoomsche Union (IAU) an’n 29.Mai 1981, man dorna künn Larissa nich mehr beobacht warrn.

As de Ruumsond Voyager 2 in’n Sommer 1989 an’n Neptun vörbiflagen is, sünd Biller fotografeert un na de Eer sennt worrn. Dorbi weer Larissa as eenzige Maand op ehr Ümloopbahn faststellt. De offizielle Wedderopdecken dör Stephen P. Synnott weer an’n 28. Juli 1989. An’n 2. August hett de Mann de tosätzliche vörlöpige Beteken S/1989 N 2 kregen.

De Naam Larissa is vun de IAU an’n 16. September 1991 na de Nymph Larissa ut de greekschen Mythologie, en Dochter vun’n König Pelasgos un Leefste vun Poseidon, vergeven worrn. Na de Mythologie wull se nich de Leefste vun Zeus warrn un hett bi Athene üm Help nafraagt. De hett ehr in en Kreih wannelt, dat se utneihn künn.

De Nymph is ok Naamsgeverscher vun de Stadt Larisa in Thessalien as ok vun de Borg Larissa op dat Halfeiland Peloponnes. Wohrschienlich kummt de Naam vun de Pelasgers.

Ümlooop un Rotatschoon[ännern | Bornkood ännern]

Larissa hett en meist perfekte rechtlöpige Krinkbahn üm Neptun mit en middleren Afstand vun 73.548 km vun’t Neptunzentrum, dat heet ruchweg 48.800 km över sien Wulkengrenz. De Exzentrizität vun de Bahn bedriggt blots 0,001393. Se is üm 0,251° gegen den Äquater vun’n Neptun kippt.

De Ümloopbahn vun den nächsten binneren Maand Galatea hett vun Larissa Ümloopbahn en Afstand vun 11.600 km, de nächstbutere Maand is Hippocamp in en Afstand vun 31.735 km vun de Ümloopbahn. Larissa is de eerste Maand, de buten dat Ringsystem vun’n Neptun liggt. För een Ümlooop bruukt Larissa ruchweg 13 Stünnen, 18 Minuten un 42 Sekunnen. Dat is gauer as de Rotatschooon vun Neptun, so dat de Maand vun’n Neptun ut sehn in’n Westen op- un in’n Oosten ünnergeiht.

Larissa bewegt sik in en kritischen Afstand, in de Neeg vun de Roche-Grenz, in en afsacken Bahn üm den Planet un is dormit düchtig vun de Tidenkräft bedrapen. De Maand warrt in tokamen Tieten vun disse Kärft tweireten warrn un denn en ne’en Ring billn oder he stört af un vergleiht in de Neptun-Atmosphäär oder stört op sien Böverflach.

Dat warrt annahmen, dat Larissa en bunnen Rotatschoon un en Assnegen vun 0° opwiest.

Physikaalsche Egenschoppen[ännern | Bornkood ännern]

Larissa is en düsteren Maand mit unregelmatige Form un en Grött vun 216 × 204 × 168 km³. Dormit is dat de veertgröttste Mannd vun Neptun. De middlere Temperatur an de Böverflach warrt op ruchweg −222 °C (~51 K) schätzt. De Böverflach sülvst wiest tallrieke Krates op, dorünner ok eenige grote. Dat sütt nich so ut, as wenn de Maand na sien Tostannenkamen noch wieter dör geoloogsche Vörgäng prägt worrn weer. Wohrschienlich höört de Maand to de so nöömten Rubble Piles, de sik rööd ut Fragmenten vun fröhere Maanden tosamensett, de tweibroken weern, as de gröttste Maand Triton dör de Neptungravitatschoon op en to Anfang bannig exzentrische Bahn dwungen weer.

Utforschen[ännern | Bornkood ännern]

Ofschoonst de Maand al acht Johren vör den Flaag vun Voyager 2 ann Neptun vörbi vermoodt worrn is, geev dat eert keen Utforschen, vun wgen, dat en nege Triton-Vörbiflaag gröttere Bedüden harr. De Sond hett Larissa in en Afstand vun 60.180 km passeert, wat jümmer noch de tweete Vörbiflaag vun en Neptunmaand weer.

Dorna geev dat Utforschen vunct Neptunystem blots vun de Eer ut as ok dör dat Hubble-Teleskop. In de Johren 2002/03 hett de Keck-Steernwacht dat System mit de adaptiven Optik beobacht. Dorbi is ok Larissa wedder sehn worrn.

Weblenken[ännern | Bornkood ännern]

Larissa. Mehr Biller, Videos oder Audiodateien to’t Thema gifft dat bi Wikimedia Commons.