Laomedeia (Maand)

Vun Wikipedia
Zur Navigation springen Zur Suche springen

Psamathe (ok as Neptun XII betekent) is een vun de buteren irregulären Maanden vun den Planet Neptun.

Opdecken[ännern | Bornkood ännern]

Laomedeia is dör en Grupp vun Wetenschopplers (Matthew J. Holman, John J. Kavelaars, Tommy Grav, Brett J. Gladman, Wesley C. Fraser, Dan Milisavljevic, Philip D. Nicholson, Joseph A. Burns, Valerio Carruba, Jean-Marc Petit, Philippe Rousselot, Oliver Mousis, Brian G. Marsden un Robert A. Jacobson) op Biller vun’n 14. August bit to’n 4. September 2002 as ok vun’n 10. August 2001 tosamen mit de Maanden Halimede und Sao opdeckt worrn. De Opnahmen weern vun’t 4,0-Meter Blanco Teleskop an’t Cerro Tololo Inter-American Observatory in Chile maakt, as ok vun’t 3,6-Meter Canada-France-Hawaii Telescope op Hawaii maakt. Dorbi sünd mehrere Opnahmen digital kombineert worrn, bit de Maanden as Punkten to sehn weern – in’n Gegendeel to de Steerns, de sik as Streken afbilln deen. De Opdecken is an’n 13. Januar 2003 bekannt maakt worrn. De Maand kreeg dorophen toeerst de vörlöpige Beteken S/2002 N 3.

An’n 3. Februar 2007 hett de Maand sien offiziellen Naam na de Figur ut de greekschen Mythologie Laomedeia, een vun de ruchweg föfftig Nereiden, nöömt. Dat sünd de schönen Döchter vun Nereus un sien Ehfro Doris.

Ümloop[ännern | Bornkood ännern]

Laomedeia kreist op en prograde Ümloopbahn üm Neptun. De Afstand liggt dorbi twüschen 14.522.070 un 32.406.190 km mit en groten Exzentrizität vun 0,38109 un en Bahnnegen vun 55,38° gegen den Äquater vun’n Neptun. De Maand befinnt sikl in en so nöömte Kosai-Bahnresonanz. Dat bedüüt, dat sien Bahnnegen un sien Exzentrizität antiproportschonal an’nanner koppelt sünd.

De Ümloopbahn vun den nächsten Maand wieter binnen (Sao) is in’n Snitt ruchweg 1,3 Mio. km wiet weg vun de Ümloopbahn vun Laomedeia. Na buten hen is Psamathe de nächste Maand, de ruchweg twintig mol so wiet weg is. Üm Neptun eenmol to ümkreisen bruukt Laomedeia ruchweg 8,661 Johren.

Physikaalsche Egenschoppen[ännern | Bornkood ännern]

Laomedeia ehr en Dörmeter warrt op 42 km schätzt op Grundlaag vun en Albedo vun 0,16. De Böverflach vun’n Maand is dormit teemlich düster. De Dicht warrt op 1,5 g/cm3 schätzt. Dat warrt annahmen, dat de Maand to’n gröttsten Deel ut Wateries besteiht. Mööglicherwies is Laomedeia inst en Asteroid wesen, de vun’n Neptun infungen worrn is.

Utforschen[ännern | Bornkood ännern]

Wegen den groten Afstand vun Neptun un ok wegen sien lütte Helligkeit de in’n Vergliek to’n Planet blots 1:12200000 bedriggt, is Laomedeia 1989 nich opdeckt worrn, as Voyager 2 vörbiflagen is. Siet sien Opdecken in 2002 is de Maand blots dör Teleskopen op de Eer beobacht worrn. Dorbi sünd de Bahnelementen un de Helligkeit beter bestimmt worrn.