Neer-Ochenhusen

Vun Wikipedia
(wiederwiest vun Nieder Ochtenhausen)
Wapen/Flagg Koort

Wapen vun Neer-Ochenhusen

Neer-Ochenhusen
Laag vun Neer-Ochenhusen in Düütschland
Basisdaten
Bundsland: Neddersassen
Landkreis: Rodenborg
Gemeen: Bremervöör
Flach: 10,91 km²
Inwahners: 931 (2015-01-3131. Januar 2015)
Inwahnerdicht: 85,3 Inwahners pro km²
Postleettall: 27432
Vörwahl: 04761
Geograafsche Laag:
Koordinaten:53° 32′ N, 9° 10′ O
53° 32′ N, 9° 10′ O
IsheimOostendörpMehdörpHönau-LindörpSprekensMinstPlönjeshusenÖölmNeer-OchenhusenBevernHeesdörpBremervöör
Laag von Neer-Ochenhusen in de Gemeen Bremervöör (Koort lett sik anklicken)

Karte

Luftbild von Neer-Ochenhusen 2013

Neer-Ochenhusen (hoochdüütsch Nieder-Ochtenhausen) is en Dörp in de Gemeen Bremervöör, in’n Landkreis Rodenborg, Neddersassen. De Oort liggt an’t linke Över von de Oost.

Geografie[ännern | Bornkood ännern]

De Oort liggt op de Geest, de Feldmark is aver deelwies ok Masch un Moor.

De Naveröörd sünd Beeß un Huud in’n Noordoosten, Öölm in’n Süüdoosten, Bremervöör in’n Süden, Hönau-Lindörp in’n Westen un Ottendörp in’n Noordwesten.

Historie[ännern | Bornkood ännern]

Neer-Ochenhusen kummt 1503 toeerst in de Oorkunnen vör, as Arzbischop Jan III. Roden de Familie von der Lieth verlöövt hett dor en neet Huus to boon. De Oort is aver al öller.

1783 hett Christian Ludwig Albrecht Patje ut Hannover dat Good Neer-Ochenhusen köfft un hett ünner annern 1787 den Oortsdeel Möhlheim süden von dat Dörp mit en Windmöhl nee anleggt. De Windmöhl is bet 1921 lopen un is 1959 afreten worrn. Patje sien Plaan weer, Neer-Ochenhusen as Zentrum mit Gewarv för de von Findörp nee grünnten Moorkolonien in’n Westen von dat Dörp uttoboon.

För de Weertschop wichtig weer fröher de Oost. Veel Woren, de ut dat Moor achter Neer-Ochenhusen kemen, vör allen Törf, sünd över de Oost wegtransporteert worrn.

Vör 1849 leeg de Oort in dat Gericht Neer-Ochenhusen un denn in dat Amt Bremervöör. 1885 is dat denn Deel von’n Kreis Bremervöör worrn un 1977 von’n Landkreis Rodenborg.

Neer-Ochenhusen is 1974 bi de Gemeenreform in Neddersassen mit de Gemeen Bremervöör tohoopleggt worrn.

Inwahnertall[ännern | Bornkood ännern]

Johr Inwahners
1824-00-001824[1] 36 Füürsteden
1848-00-001848[2] 362 Lüüd, 49 Hüüs
1910-12-011. Dezember 1910[3] 523
1925-00-001925[4] 572
1933-00-001933[4] 575
1939-00-001939[4] 536
2005-03-3131. März 2005 864
2009-12-3131. Dezember 2009[5] 895
2015-01-3131. Januar 2015[6] 931

Wapen[ännern | Bornkood ännern]

Dat Wapen wiest op grönen Grund en sülvern Wellenlien, de von baven rechts na ünnen links löppt. Baven links is en sülvern Windmöhl un ünnen rechts en sülvern Ever.

Politik[ännern | Bornkood ännern]

Neer-Ochenhusen hett binnen de Gemeen Bremervöör en egen Oortsraad mit söven Maten. Oortsbörgermeester is Karl-Heinz Imbusch.

Religion[ännern | Bornkood ännern]

Neer-Ochenhusen is evangeelsch-luthersch präägt un höört to dat Kaspel von de Findörp-Kark in Isheim. Bet 1925 harr de Oort noch to dat Kaspel von de Gangolf-Kark in Örel höört, is denn aver in dat Kaspel von de Liborius-Kark in Bremervöör wesselt. As 1965 de Auferstehungskark in Bremervöör nee boot worrn is, is disse Kark för den Oort tostännig ween. Eerst 1994 is de Findörp-Kark egenstännige Karkengemeen worrn un sietdem höört Neer-Ochenhusen na Isheim.

För de Kathoolschen is de St.-Michaelskark in Bremervöör tostännig, de siet 1. September 2010 to de Karkengemeen Hillig Geist in Stood tohöört.

Kultur[ännern | Bornkood ännern]

Verenen[ännern | Bornkood ännern]

De Kriegervereen hett sik 1897 grünnt un ut’n Kriegervereen hett sik in de Johren 1920 denn ok de Schützenvereen rut utwickelt. De Turn- un Sportvereen (TuS) is 1923, de Freewillige Füürwehr 1920 un de Börger- un Heimaatvereen 1984 grünnt worrn. De Heimaatvereen bedrifft ok den Koornspieker, de as Dörpgemeenschopshuus deent. De Spieker is 1787 von Patje boot worrn. 1991 hett em de Vereen an de ole Steed afboot un in Möhlheim nee opboot. Inwieht worrn is de Spieker denn 2001.

Infrastruktur[ännern | Bornkood ännern]

An’t Stroomnett is Neer-Ochenhusen 1921 anslaten worrn.

Verkehr[ännern | Bornkood ännern]

Na Oosten hen is de Oort dör de Oost von’n Verkehr afsneden. De wichtigste Verkehrsweg is de Straat An’e Schossee, de in’n Süüdwesten an de Kreisstraat 105 ranlöppt, de na Bremervöör geiht. Ans gifft dat noch en Straat na Ottendörp un Oostendörp in’n Noorden.

Footnoten[ännern | Bornkood ännern]

  1. C. H. Jansen: Statistisches Handbuch des Königreichs Hannover. 1824, Sied 454: http://books.google.de/books?id=tG0AAAAAcAAJ&pg=PA454
  2. Friedrich W. Harseim, C. Schlüter: Statistisches Handbuch für das Königreich Hannover. 1848, Sied 151: http://books.google.de/books?id=eOI-AAAAcAAJ&pg=PA151
  3. http://www.gemeindeverzeichnis.de/gem1900/gem1900.htm?hannover/bremervoerde.htm
  4. a b c http://www.verwaltungsgeschichte.de/bremervoerde.html
  5. Bremervörde und die Ortschaften, archiveert in dat Internet Archive
  6. Bremervörde und die Ortschaften

Weblenken[ännern | Bornkood ännern]

Neer-Ochenhusen. Mehr Biller, Videos oder Audiodateien to’t Thema gifft dat bi Wikimedia Commons.