Meyerdamm
| Wapen/Flagg | Koort | |
|---|---|---|
 |
| |
| Basisdaten | ||
| Flach: | 3,27 km² | |
| Inwahners: | 508 (30. Juni 2016) | |
| Inwahnerdicht: | 155,4 Inwahners pro km² | |
| Postleettall: | 28876 | |
| Vörwahl: | 04207 | |
| Geograafsche Laag: | Koordinaten:53° 4′ N, 8° 59′ O53° 4′ N, 8° 59′ O | |
 | ||
|
| ||
Meyerdamm (hoochdüütsch Meyerdamm) is en Dörp in de Gemeen Eiten in’n Landkreis Veern, Neddersassen. Binnen de Gemeen billt de Oort en egen polietsche Oortschop.
Geografie
[ännern | Bornkood ännern]De Oort liggt in dat Königsmoor. Dat Water ut dat Rebeed warrt över’n Meyerdammer Loopgraven na’n Süüdarm von de Wümm hen afföhrt.
De Naveröörd sünd Klüverdamm in’n Noorden, Ruthentahl un Sao’ern in’n Noordoosten, Booköss, Eiterdrift un Eiten in’n Oosten, Eiterdamm in’n Süden un Mahndörperdamm un Tenever in’n Süüdwesten.
Historie
[ännern | Bornkood ännern]Meyerdamm is 1787 as Moorkolonie in dat Königsmoor anleggt worrn. Den Naam hett de Oort na Johann Georg Meyer kregen, de sik as Amtsschriever von dat Gogericht Achem besünners för de Kolonie insett harr. De Oort harr toeerst 16 Hoffsteden, de 22 Morgen good Moorland to’n Kultiveren un twee Kohweiden todeelt kregen hebbt. De Buurn, de sik dor ansiedelt hebbt, müssen dorför noch bet 1875 en Meiertins un en Teegden betahlen.[1]
In’n Eersten Weltkrieg sünd dree Soldaten ut Meyerdamm fullen oder vermisst un in’n Tweten Weltkrieg 22.[2]
Verwaltungsgeschicht
[ännern | Bornkood ännern]In de Franzosentied von 1810 bet 1814 hett de Oort to de Mairie Achem in’n Kanton Achem höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1852 to de Westvaagdie von dat Gogericht Achem tohöört, dat 1852 denn to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.
Meyerdamm un Klüverdamm hebbt in dat 19. Johrhunnert tohoop en Buurschop billt un later denn en Gemeen. Buurschop un Gemeen hebbt den Naam Meyer-Klüverdamm dragen. 1929 hett de Gemeen den Oort Klüverdamm an de Gemeen Sao’ern afgeven. De Naam hett sik denn op Meyerdamm ännert. De Gemeen Meyerdamm is an’n 1. Januar 1963 Deel von de Gemeen Eiten worrn. Dat Rebeed billt nu binnen de Gemeen Eiten en Oortschop mit egen Oortsvörsteiher.
Inwahnertall
[ännern | Bornkood ännern]| Johr | Inwahners |
|---|---|
| 1791[3] | 20 Füürsteden |
| 1812[4] | 91 |
| 1824[5] | 20 Füürsteden |
| 1848[6] | 165 Lüüd, 21 Hüüs |
| 1. Dezember 1871[7] | 155 Lüüd, 23 Hüüs |
| 1. Dezember 1885[8] | 139 Lüüd, 23 Hüüs |
| 1. Dezember 1905[9] | 135 Lüüd, 24 Hüüs |
| 1. Dezember 1910[10] | 139 |
| 1925[11] | 144 |
| 1933[11] | 139 |
| 1939[11] | 147 |
Religion
[ännern | Bornkood ännern]Meyerdamm is evangeelsch-luthersch präägt un höört to dat Kaspel von de Petri-Kark in Eiten. Düsse Kark is 1861 boot worrn. Vörher hett de Oort to dat Kaspel von de Laurentius-Kark in Achem tohöört.
För de Kathoolschen is de St.-Matthias-Kark in Achem tostännig.
Oortsvörsteihers
[ännern | Bornkood ännern]- –2001: Renate Wiede
- 2001–2006: Kurt Hormann
- 2006–2011: Helmut Rotermund
- opstunns: Reena Saschowa
Kultur
[ännern | Bornkood ännern]En Denkmaal för de Fullenen ut de twee Weltkrieg’ steiht in Eiten bi de Kark.
Verenen
[ännern | Bornkood ännern]De Heimatvereen Meyerdamm-Eiterdamm is 1958 grünnt worrn un hett sik 1968 den ne’en Naam Heimatvereen Eiten geven.
Weertschop un Infrastruktur
[ännern | Bornkood ännern]För Meyerdamm is de freewillige Füürwehr Eiten mit tostännig.
Verkehr
[ännern | Bornkood ännern]De Dörpstraat dör Meyerdamm löppt parallel to de Landsstraat 168 un is över twee Straten an düsse Straat anbunnen. De L 168 föhrt in’n Westen na de Bremer Stadtdelen Oosterholt un Hemeln un in’n Noordoosten över Eiten un Bassen na Otterbarg.
De nächste Autobahn is de Autobahn 27 (Afsnidd Wasra–Bremen). De Opfohrt 21 Segelsbrugge liggt so twee Kilometer in’n Süüdwesten von Meyerdamm an de L 168.
De nächsten Bahnhööv sünd all so bi fiev Kilometer wied weg. In’n Noordoosten de Bahnhoff Sao’ern an de Bahnlien Hamborg–Bremen, in’n Noordwesten de Bahnhoff Överneeland an de Bahnlien Hamborg–Bremen un in’n Süüdwesten de Bahnhoff Mahndörp an de Bahnlien Wunsdörp–Bremen.
De Bahnlien Karkweyh–Sao’ern, de merrn dör den Oort dörlöppt, is blots för den Göderverkehr.
Scholen
[ännern | Bornkood ännern]De Kinner ut Meyerdamm gaht na de Grundschool Sao’ern. In Meyerdamm hett dat fröher en egen lüttje Volksschool geven.
Footnoten
[ännern | Bornkood ännern]- ↑ Johannes Grote: 800 Jahre Oyten. Besiedlung und Entwicklung eines Geestdorfes. Heimatvereen Eiten, 2013, Sied 14
- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 154
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 95
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 402
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 142
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 177
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 2
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken
[ännern | Bornkood ännern]
Bassen | Booköss | Eiten-Noord | Eiten-Süüd | Eiterdamm | Meyerdamm | Sao’ern | Schaaphusen