Eiterdamm
| Wapen/Flagg | Koort | |
|---|---|---|
 |
| |
| Basisdaten | ||
| Flach: | 3,08 km² | |
| Inwahners: | 248 (30. Juni 2016) | |
| Inwahnerdicht: | 80,5 Inwahners pro km² | |
| Postleettall: | 28876 | |
| Vörwahl: | 04207 | |
| Geograafsche Laag: | Koordinaten:53° 4′ N, 8° 59′ O53° 4′ N, 8° 59′ O | |
 | ||
|
| ||
Eiterdamm (hoochdüütsch Oyterdamm) is en Dörp in de Gemeen Eiten in’n Landkreis Veern, Neddersassen. Binnen de Gemeen billt de Oort en egen polietsche Oortschop.
Geografie[ännern | Bornkood ännern]
De Oort liggt in dat Königsmoor. Dat Water ut dat Rebeed warrt över’n Eiterdammer Loopgraven un annere Gravens na’n Süüdarm von de Wümm hen afföhrt.
De Naveröörd sünd Meyerdamm in’n Noorden, Sao’ern in’n Noordoosten, Eiten in’n Oosten, Biern un Uphusen in’n Süden, de Bremer Oortsdeel Mahndörp in’n Süüdwesten un de Bremer Oortsdelen Oosterholt un Tenever in’n Westen.
Historie[ännern | Bornkood ännern]
De Knüppeldamm dör dat Königsmoor (vondaag de Landsstraat 168) is 1680 anleggt worrn, üm de Geestrebeden bi Eiten mit de Geestrebeden von Oosterholt un Hemeln to verbinnen. 1690 is an düssen Damm denn dat eerste Huus anleggt worrn. Dat weer en Tollhuus för den Toll an de Bremer Grenz, in dat ok dat Weggeld för de Straat inkasseert worrn is.[1] Later weer düt Huus en Gasthuus, dat noch bet 1981 Bi’n Tollner heten hett. Von 1720 bet 1751 sünd denn noch en poor Hööv tosätzlich an’n Damm anleggt worrn.[1]
De Naam von’n Oort kummt dorvon, dat de Damm na Eiten löppt. In fröhere Tieden is de Oort ok Eiter Moordamm oder Eitermoor nöömt worrn.
De veer Hoffsteden in’n Süden an’n Neebuursdamm sünd üm 1760 rüm anleggt worrn. Dat weren Hööv von 50 Morgen, de an verdeente Soldaten vergeven worrn sünd.[1]
Eerst 1806 is de ole Knüppeldamm as Deel von de Bremen-Horbörger Schossee to en richtige Straat utboot worrn. Mit dat Tollhuus hett dat en Enn nahmen, as Bremen 1888 in’n Düütschen Tollvereen intreden is.[1]
In’n Eersten Weltkrieg sünd ölven Soldaten ut Eiterdamm fullen oder vermisst un in’n Tweten Weltkrieg 18.[2]
Verwaltungsgeschicht[ännern | Bornkood ännern]
In de Franzosentied von 1810 bet 1814 hett de Oort to de Mairie Achem in’n Kanton Achem höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.
De Oort hett vör 1803 to dat Gericht Swachhusen tohöört. As dat Gericht 1803 oplööst un an Bremen fullen is, keem de Oort Eiterdamm an de Westvaagdie von dat Gogericht Achem. Dor hett de Oort tohöört bet dat Gogericht 1852 to dat Amt Achem worrn is. Na 1885 weer dat in’n Kreis Achem. 1932 is de Kreis Achem mit’n Kreis Veern tohoopgahn un hett den ne’en un grötteren Kreis Veern billt.
De Oort weer in dat 19. Johrhunnert en egen Buurschop un later en Gemeen. De Gemeen Eiterdamm is an’n 1. Januar 1963 Deel von de Gemeen Eiten worrn. Dat Rebeed billt nu binnen de Gemeen Eiten en Oortschop mit egen Oortsvörsteiher.
Inwahnertall[ännern | Bornkood ännern]
| Johr | Inwahners |
|---|---|
| 1791[3] | 9 Füürsteden |
| 1812[4] | 81 |
| 1824[5] | 29 Füürsteden |
| 1848[6] | 153 Lüüd, 24 Hüüs |
| 1. Dezember 1871[7] | 162 Lüüd, 27 Hüüs |
| 1. Dezember 1885[8] | 184 Lüüd, 27 Hüüs |
| 1. Dezember 1905[9] | 194 Lüüd, 28 Hüüs |
| 1. Dezember 1910[10] | 170 |
| 1925[11] | 149 |
| 1933[11] | 176 |
| 1939[11] | 185 |
Religion[ännern | Bornkood ännern]
Eiterdamm is evangeelsch-luthersch präägt un höört to dat Kaspel von de Petri-Kark in Eiten. Düsse Kark is 1861 boot worrn. Vörher hett de Oort to dat Kaspel von de Laurentius-Kark in Achem tohöört.
För de Kathoolschen is de St.-Matthias-Kark in Achem tostännig.
Oortsvörsteihers[ännern | Bornkood ännern]
- 1976–: Bodo Becker (CDU)
Kultur[ännern | Bornkood ännern]
En Denkmaal för de Fullenen ut de twee Weltkrieg’ steiht in Eiten bi de Kark.
Verenen[ännern | Bornkood ännern]
De Heimatvereen Meyerdamm-Eiterdamm is 1958 grünnt worrn un hett sik 1968 den ne’en Naam Heimatvereen Eiten geven.
Weertschop un Infrastruktur[ännern | Bornkood ännern]
För Eiterdamm is de freewillige Füürwehr Eiten mit tostännig.
Verkehr[ännern | Bornkood ännern]
Dör Eiterdamm löppt de Landsstraat 168, de in’n Westen na de Bremer Oortsdelen Oosterholt un Hemeln geiht un in’n Noordoosten över Eiten un Bassen na Otterbarg.
De nächste Autobahn is de Autobahn 27 (Afsnidd Wasra–Bremen). De Opfohrt 21 Segelsbrugge liggt direkt an’n Westrand von Eiterdamm an de L 168.
De nächsten Bahnhööv sünd all so bi fiev bet söss Kilometer wied weg. In’n Noordoosten de Bahnhoff Sao’ern an de Bahnlien Hamborg–Bremen, in’n Noordwesten de Bahnhoff Överneeland an de Bahnlien Hamborg–Bremen un in’n Süüdwesten de Bahnhoff Mahndörp an de Bahnlien Wunsdörp–Bremen.
De Bahnlien Karkweyh–Sao’ern, de merrn dör den Oort dörlöppt, is blots för den Göderverkehr.
Scholen[ännern | Bornkood ännern]
De Kinner ut Eiterdamm gaht na de Grundschool Sao’ern. Fröher harr de Oort ok en egen lüttje Volksschool.
Footnoten[ännern | Bornkood ännern]
- ↑ a b c d Johannes Grote: 800 Jahre Oyten. Besiedlung und Entwicklung eines Geestdorfes. Heimatvereen Eiten, 2013, Sied 15
- ↑ Onlineprojekt Gefallenendenkmäler
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 66
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 95
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 464
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 142
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 166
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 176
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 2
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
Weblenken[ännern | Bornkood ännern]
Bassen | Booköss | Eiten-Noord | Eiten-Süüd | Eiterdamm | Meyerdamm | Sao’ern | Schaaphusen