Lütt Ippens
| Wapen/Flagg | Koort | |
|---|---|---|
 |
| |
| Basisdaten | ||
| Inwahners: | ||
| Postleettall: | 27419 | |
| Vörwahl: | 04282 | |
| Geograafsche Laag: | Koordinaten:53° 20′ N, 9° 28′ O53° 20′ N, 9° 28′ O | |
|
| ||
Lütt Ippens (hoochdüütsch Klein Ippensen) is en Dörp in de Gemeen Vierden (Samtgemeen Zittens) in’n Landkreis Rodenborg, Neddersassen. De Oort grenzt in’n Noorden direkt an’n Landkreis Stood.
Geografie[ännern | Bornkood ännern]
De Oort liggt op de Stoder Geest an’n Kohbeek.
De Naveröörd sünd Hogenhusen un Lütt-Wangersen in’n Noorden, Woonst in’n Noordoosten, Vierden un Groot Ippens in’n Süüdoosten, Lütt Meckels in’n Süden, Maschhorst in’n Süüdwesten un Sellhorn, Steddörp un Wangersen in’n Noordwesten.
Historie[ännern | Bornkood ännern]
Von de Archäologie her is to vermoden, dat de Feldmark vun Ippens al teemlich lang besiedelt is. As 1989 en Radweg boot worrn is, is kort achter Lütt Ippens in Richt Sellhorn en ole Graffanlaag funnen worrn, de op de Tied vun üm un bi 2000 v. Chr schätzt warrt. Funnen düüdt dor op hen, dat de Graffsteed noch bet in de jüngere Steentied bruukt worrn is.
De Naam Ippens geiht wohrschienlich op den Naam Ippo trügg, de al in late germaansche Tied för Personen bruukt weer. Dat mag ween, dat en Mann mit den Naam de eerste Siedler in de Gegend weer. Schriftliche Opteken gifft dat aver eerst veel later. De eerste schriftliche Nawies is ut dat Johr 1335, as Yppensen in en Göderverteken von dat Klooster Buxthu. Al to de Tied warrt twüschen Lütt- un Groot Ippens ünnerscheedt.
De eerste plaasterte Straat is 1929 von Lütt Ippens na Hogenhusen boot worrn.
Verwaltungsgeschicht[ännern | Bornkood ännern]
In de Franzosentied hett de Oort toeerst 1810 bet 1811 binnen dat Königriek Westfalen to de Mairie Vierden in’n Kanton Zeven höört un denn von 1811 bet 1814 to dat Franzöösche Kaiserriek ünner Napoleon un dor to de Mairie Groot-Zittens in’n Kanton Zeven.
De Oort hett vör 1885 to de Böörd Zittens von dat Amt Zeven tohöört. Na 1885 weer dat in’n Kreis Zeven. 1932 is dat Deel von’n Kreis Bremervöör worrn un 1977 von’n Landkreis Rodenborg.
De Oort hett al von öllers tohoop mit Groot Ippens de Gemeen Ippens billt. Düsse Gemeen is an’n 1. März 1974 mit de Gemeenreform in Neddersassen Deel von de Gemeen Vierden worrn.
Inwahnertall[ännern | Bornkood ännern]
| Johr | Inwahners |
|---|---|
| 1791[1] | 4 Füürsteden |
| 1824[2] | 3 Füürsteden |
| 1848[3] | 51 Lüüd, 8 Hüüs |
| 1. Dezember 1871[4] | 40 Lüüd, 6 Hüüs |
| 1. Dezember 1885[5] | 37 Lüüd, 5 Hüüs |
| 1. Dezember 1905[6] | 43 Lüüd, 6 Hüüs |
Religion[ännern | Bornkood ännern]
Lütt Ippens is evangeelsch-luthersch präägt un höört to dat Kaspel von de Dionysius-Kark in Zittens.
För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.
Kultur[ännern | Bornkood ännern]
En Denkmaal för de Fullenen ut de twee Weltkrieg’ steiht in Zittens bi de Kark.[7]
Weertschop un Infrastruktur[ännern | Bornkood ännern]
För Lütt Ippens is de freewillige Füürwehr Ippens mit tostännig.
Verkehr[ännern | Bornkood ännern]
Dör Lütt Ippens löppt de Kreisstraat 134, de in’n Noordwesten na Steddörp an de Landsstraat 124 ran geiht un in’n Süüdoosten över Groot Ippens un Vierden na de L 130 bi Zittens. De K 134 warrt in Groot Ippens krüüzt von de K 139, de in’n Noorden na’n Landkreis Stood (dor as K 54) na Ohrenswohl un Ohlers föhrt un in’n Süden över Nüddel na Zittens. De K 123 geiht von Groot Ippens in’n Süüdwesten över Lütt Meckels na Groot Meckels an de L 142. En lüttjere Straat gifft dat in’n Noorden na Hogenhusen un Lütt-Wangersen.
De nächste Autobahn is de Autobahn 1 (Afsnidd Hamborg–Bremen). De Opfohrt 47 Zittens liggt so söven Kilometer in’n Süüdoosten von Lütt Ippens an de L 130.
De nächste Bahnhoff is so bi 15 Kilometer wied weg in’n Noorden de Bahnhoff Harsfeld an de Bahnlien Bremerhoben–Buxthu. Von 1917 bet 1971 hett dat ok Personenverkehr op de Bahnlien Wilst–Töst geven. De Bahnhoff Kohmöhlen weer in düsse Tied söss Kilometer in’n Süden.
Scholen[ännern | Bornkood ännern]
Von’n Anfang von dat 19. Johrhunnert bet 1966 sünd de Kinner ut Lütt Ippens na de Volksschool in Groot Ippens gahn. Sietdem gaht se op de Grundschool Meckels in Lütt Meckels.
Literatur[ännern | Bornkood ännern]
- Hartmut Vollmer: Gemeinde Vierden. Aus der Geschichte der beiden Dörfer Vierden und Ippensen. Chronik
Footnoten[ännern | Bornkood ännern]
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 123
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 320
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 140
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 171
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 182
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 195
- ↑ Onlineprojekt Gefallenendenkmäler