Ippens

Vun Wikipedia
(wiederwiest vun Groot Ippens)
Zur Navigation springen Zur Suche springen

Ippens (hoochdüütsch Ippensen) is en Oortsdeel vun de Gemeen Vierden in’n neddersass’schen Landkreis Rodenborg (Wümm). Nipp un nau sünd dat dree Oortsdelen, de Ippens heet: Groot-Ippens, Lütt-Ippens un Ippens-Süüd.

Geografie un Weertschop[ännern | Bornkood ännern]

De Oortskarn vun Ippens bargt de meisten Hüüs un Inwahners un warrt ok as Groot-Ippens betekent. Disse Deel liggt in de Mitt vun Ippens. Dat Oortsbild vun Ippens is tomeist ländlich un warrt vun de Landweertschop bestimmt. An’n nöördlichen Rand vun Groot-Ippens liggt aver ok dat Neeborebeet Ippens-Farrn, woneem Enn vun de 1980er Johren de eersten Hüüs boet worrn sünd.

De Oortsdeel Ippens-Süüd liggt in’n Süüden dorvun – as de Naam al seggt. Disse Deel besteiht man blots ut’n poor Hüüs. Vun de Verwalten her höört Ippens-Süüd to Groot-Ippens, so dat Vierden an sik blots fief Oortsdelen hett, man de Lüüd ünnerscheedt twüschen de beiden, vun wegen dat beide Öörd nich direkt inenanner övergaht. Twüschen Groot-Ippens un Ippens-Süüd liggt de Sportplatz, woneem de öörtliche Footballvereen sien Spelen maakt.

Lütt-Ippens liggt in’n Noordwesten vun Groot-Ippens un besteiht ok blots ut’n goot Dutz Hüüs. De Grenz twüschen Groot- un Lütt-Ippens is de Kohbeek, de vun Woonst kummt un wieter över Kohmöhlen na de Oost tolöpt. In Lütt-Ippens hebbt de meisten Lüüd mit de Bueree to doon un de Feldmark besteiht ut Gröön- un Ackerland. Man ok en Moorflach un en groot Wooldstück höört to dat Rebeet.

Historie[ännern | Bornkood ännern]

Vun de Archäologie her is to vermoden, dat de Feldmark vun Ippens al teemlich lang besiedelt is. As 1989 en Radweg boet worrn is, is kort achter Lütt-Ippens in Richt Sellhorn en olle Graffanlaag funnen worrn, de op de Tiet vun üm un bi 2000 v. Chr schätzt warrt. Funnen düüt dorop hen, dat de Graffsteed noch bit in de jüngere Steentiet nütt worrn is.

De Naam Ippens geiht wohrschienlich op den Naam Ippo torüch, de al in late germaansche Tiet för Personen bruukt weer. Dat mag wesen, dat en Mann mit den Naam de eerste Siedler in de Gegend weer. Schriftliche Opteken gifft dat aver eerst veel later. De eerste schriftliche Nawies is ut dat Johr 1335, as Yppensen in en Göderverteken vun Klooster Buxthuud. Al to de Tiet warrt twüschen Lütt- un Groot-Ippens ünnerscheedt.

In en Opteken ut dat Johr 1729 warrt twölf Besitters vun twölf Hüüs in Groot- un Lüüt-Ippens opföhrt, de vör allen Hoffbesitters sünd un een Brinksitter (Neesiedler). 1788 geev dat in Ippens en groot Füer, bi dat mehrere Höff gliektietig afbrennt sünd. 1859 weern in Ippens 31 Wahnhüüs tellt un de Inwahnertall weer vun 105 op 195 düchtig stegen.

In de Franzosentiet vun 1803 bit 1813 sünd Buern ut Ippens to’n Bo vun de Napoleonstraat vun Paris över Bremen, Scheeßl un Hamborg na Lübeck to Hand- un Spanndeensten rantogen worrn un müssen ok bi’t Transport vun Kriegsredschoppen helpen.

In fröhere Tiet weer de Landschop to’n gröttsten Deel ut Woold-, Moor- un Heidflachen tohoensett. För de Versorgen mit Fleesch hett de Jagd en grote Rull speelt, wobi faken ok wildert weer. 1851 geev dat in Groot-Ippens 14 Grundbesitters un dree in Lüüt-Ippens. To de Tiet weer de Schaaptucht en bedüden Weertschopstwieg in de Bueree. För de Deeren weer dormols egens en Harder instellt.

As Naklapp vun den Eersten Weltkrieg 1914-1918 geev dat in Düütschland wenig Arbeit un grode Noot. In de Tiet kemen ok na Ippens Lüüd ut dat Ruhrrebeet, vun wegen dat se op dat Land na Arbeit söken deen. för de inheimschen Oppers vun’n Krieg is 1922 en Denkmol inweiht worrn. De Straten un Weeg weern to de Tiet ok noch bannig slecht. Eerst 1919 weer de Dörpsstraat as eerste mit Plaasterstenen faster maakt. As tweete Schritt is 1928 de olle Karkweg vun Groot-Ippens, vörbi an’n hüütigen Sportplatz na Zittens plaastert worrn, womit de eerste gode Verbinnen na de Butenwelt fardig stellt weer. An disse ne’en Straat sünd 1929 op halven Weg na Zittens de eersten twee Hüüs boet worrn, wat de Geboort vun den Oortsdeel Ippens-Süüd weer. Dat glieke Johr wart ok de Weg vun Lütt-Ippens in Richt Hogenhusen fastmaakt.

Denn keem de Tiet vun’n Natschonalsozialismus, de ok Ippens in sien Greep harr. In’n Tweeten Weltkrieg weer al wehrplichtigen Mannslüüd af 17, deelwies af 16 Johren in de Wehrmacht intogen. De Krieg weer mit grote Noot verbunnen un vun de Soldaten ut Ippens sünd vele doodbleven. De eerste engelsche Panzerwagen keem kort vör’t Enn vun’n Krieg in’n April 1945 na Ippens. To de Tiet harr Ippens mehr as 400 Inwahners vun wegen de velen Flüchtlinge ut’n Oosten. Bit 1956 güng de Inwahnertall wedder op 275 rünner, as de Lüüd afwannert sünd, vun wegen dat Fehlen vun Arbeit. In de Tiet vun’n Krieg bit hüüt hett sik de Landweertschop aver düchtig wannelt as överall anners ok. Üm 1960 rüm weer Ippens en traditschonell Anborebeet för Saatkantüffel. ut de Tiet stammt de groten Kantüffelschünen.

Mit de Gemeenreform in Neddersassen an’n 1. März 1974 weern de Gemenen Vierden un Ippens tohopenleggt. Siet de Tiet is Ippens Deel vun de Gemeen Vierden.

Religion[ännern | Bornkood ännern]

Ippens is evangeelsch-luthersch präägt un höört to dat Kaspel von de Dionysius-Kark in Zittens.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur[ännern | Bornkood ännern]

Dat kulturelle Leven warrt dör de öörtlichen Verenen prägt. Dat is to’n een de Freewillige Füerwehr vun Ippens un to’n annern de Sportvereen SV Ippens, de för allen in’n Football aktiv is, aver ok en Afdeel för Dischtennis hett. Butendem gifft dat den Landfroenvereen Vierden/Ippens.

Weertschop un Infrastruktur[ännern | Bornkood ännern]

Verkehr[ännern | Bornkood ännern]

In Groot-Ippens draapt sik dree Kreisstraten: De K 139 geiht in’n Noorden in de K 54 vun’n Landkreis Stood över un föhrt dor över Ohrenswohl, woneem se de L 127 krüüzt, wieter na Ohlers. Dor münnt se in de L 124 in. Na Süüden to verlöppt de Straat dör Ippens-Süüd wieter över’n Vierdener Oortsdeel Nüddel bit na Lengenbossel kort vör Zittens, woneem se in de L 130 inmünnt. In Groot-Ippens twiegt op Hööch vun’t Neeborebeet Farrn de K 134 af, de över Lütt-Ippens un Sellhorn na Steddörp in de Gemeen Heeßel föhrt, woneem se ok wedder in de L 124 münnt. Vun de K 134 twiegt in Groot-Ippens denn noch de K 123 af, de na Süüden föhrt un Ippens mit Lütt Meckels un Groot Meckels verbinnt. In Groot Meckels münnt se in de L 142.

Scholen[ännern | Bornkood ännern]

Von’n Anfang von dat 19. Johrhunnert bet 1966 hett dat in Groot Ippens en Volksschool geven. Sietdem 1966 de School dichtmaakt hett, gaht de Kinner na de Grundschool Meckels in Lütt Meckels.

Websteden[ännern | Bornkood ännern]