Nüddel
Nüddel (hoochdüütsch Nüttel) is en lütten Oortsdeel vun de Gemeen Vierden in’n neddersass’schen Landkreis Rodenborg (Wümm) un besteiht blots ut en Handvull Hüüs.
Geografie un Weertschop
[ännern | Bornkood ännern]De Oortsdeel Nüddel liggt twüschen Ippens-Süüd, wat ok en Oortsdeel vun de Gemeen Vierden is, un Zittens. De Oort liggt an de K 139, de vun Zittens ut över Nüddel na Ippens verlöpt un den wieter in’n Landkreis Stood as K 54 na Ohrenswohl.
In Nüddel gifft dat dree Hoffsteden, wovun hüüt aver blots noch een beweertschoppt warrt. Dat Ümland is entspreken landweertschopplich prägt mit veel Wischen un Weidland, handweerklich Bedrieven gifft dat in Nüddel nich. Dör de Feldmark verlöpt ok de lütte Stroom Ramm, de twüschen Zittens un Groot Meckels in de Oost inmünnen deit. Üm Nüddel rüm gifft dat aver ok gröttere Wooldflachen.
Historie
[ännern | Bornkood ännern]Nüddel weer to’n eersten mol na 1300 offiziell in en Oorkunn nöömt. To de Tiet harr de Oort noch den Naam Nutlo. Man geiht dorvun ut, dat sik de Naam ut Nuttesloh afleidt hett, wat so vell as „Nöötholt“ heten deit. In verleden Tieten weern Hasselnutt-Strüker in dat Rebeet vun Nüddel teemlich verbreedt. Dat kann een ok noch ut de ollen Flurnaams as t. B. „Haßelwisch“ sehen. In’n Verlop vun de Johrhunnerten sünd vun den de Oort verschedene Naams opdukt, as ‚To dem Nuttel‘, ‚zum Nüttel‘, ‚Nottel‘ oder ‚Nuttlo‘.
De Bremer Arzbischop Johann hett 1498 dat so nöömte Vörder Register opstellen laten. Dorin is Nüddel as eenstelligen Hoff utwiest, de to dat Klooster Harsfeld höört. In’t Register vun 1540 sünd to’n eersten mol ok de Naams vun de Inwahners un jemehr Stand vertekent. To de Tiet geev dat an de Steed blots twee Wahnhüüs.
De Straten, as se dat vundaag gifft, sünd af 1900 fastigt worrn. De vörmolige Feldweg vun Ippens över Nüddel na Zittens schüll 1922 plaastert warrn, man toeerst is dat bi’n Plaan bleven. Eerst twee Johr later güng dat mit den Plaan wieter, vun wegen dat de dormoligen Landkreisen den Weg twüschen Ohlers un Zittens as plaasterte Dörgangstraat utboen wulln, wat bit to’n 1. August 1928 fardig stellt weer.
Religion
[ännern | Bornkood ännern]Nüddel is evangeelsch-luthersch präägt un höört to dat Kaspel von de Dionysius-Kark in Zittens.
För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.
Websteed
[ännern | Bornkood ännern]
Koordinaten:53° 18′ N, 9° 30′ O