Jane Usher

Vun Wikipedia
Zur Navigation springen Zur Suche springen

Jane Ellen „Miss Jane“ Usher (borene Jane Ellen Price; * 5. September 1917 in Belize-Stadt; † 12. Dezember 2018 ok dor) weer en Politikerin ut Belize (PUP).

Leven[ännern | Bornkood ännern]

Jane Ellen Price is 1917 as Dochter von Irene Cecelia, borene Escalante, un William Cadle Price in Belize-Stadt (to de Tied Hööftstadt von de Kolonie Brietsch-Honduras) boren.[1] Se harr söven Süstern un dree Bröder, ünner annern George Cadle Price. As 1944 de Holy Redeemer Credit Union grünnt worrn is, hett se dor anfungen to arbeiden un is dor 1956 ok CEO worrn.[1] Se is bet in en hoog Öller CEO von de Credit Union bleven un hett dor noch bet 2017 arbeidt.[1][2]

Se hett an’n 3. Januar 1942 in de Holy Redeemer Cathedral in Belize-Stadt Henry Charles Usher (31. Oktober 1918–7. Oktober 1997) freet.[1] De beiden harrn teihn Kinner,[2] ünner annern Elizabeth Zabaneh.

In en Öller von 101 Johr is Usher an’n 12. Dezember 2018 in ehr Huus an’n Philip Goldson Highway in Belize-Stadt doodbleven.[1] Se hett an’n 18. Dezember 2018 en Staatsgräffnis kregen mit en Truurfier in de Holy Redeemer Cathedral.

Politik[ännern | Bornkood ännern]

Bi de Parlamentswahl in Belize 1979 weer se Kannedatin för de PUP in’n Wahlkreis Pickstock un hett de Wahl mit 52,8 % von de Stimmen gegen Paul Rodriguez von de UDP wunnen. Bi de Wahl 1984 weer se in’n sülven Wahlkreis Kannedatin un hett de Wahl mit 51,6 % von de Stimmen gegen Ramon Vasquez von de UDP wedder wunnen.

Dormit weer se von’n 21. November 1979 bet 4. September 1989 Afornte von dat Repräsentantenhuus von Belize. In düsse Tied weer se ünner Premierminister George Cadle Price von 1979 bet 1984 ok Staatsministerin in dat Ministerium för Gesundheit, Huusbo un Kooperativen ünner Minister Assad Shoman. Von 1984 bet 1989 hett se mit de PUP in de Oppositschoon seten.

1989 is se in’n Senaat von Belize beropen worrn. Von’n 15. September 1989 bet 1. Juni 1993 weer se Präsidentin von’n Senaat.

Ehren[ännern | Bornkood ännern]

Usher is 1964 Justice of the Peace worrn. Tosätzlich is se to Neejohr 1992 Commander of the Order of the British Empire worrn.

An’n 25. April 2001 hett Usher den Golden Eagle Award von de Belize Credit Union League kregen.[2]

2013 hett se en Ehrendokter von de Galen University kregen.[2]

Footnoten[ännern | Bornkood ännern]

  1. a b c d e Belize’s credit union movement pioneer, Jane Usher, passes away at 101, San Pedro Sun an’n 13. Dezember 2018
  2. a b c d Rowland A. Parks: Dr. Jane Usher CBE, HRCU’s iconic leader, dies at 101, Amandala an’n 15. Dezember 2018