Paul Rodriguez (Politiker)
Paul Peter Rodriguez is en Politiker ut Belize (UDP).
Rodriguez is in Brietsch-Honduras boren. He weer op dat St. John’s College un is denn op en Preesterseminar von de Jesuiten in de USA wesselt, üm kathoolschen Preester to warrn.[1] Dat Seminar hett he aver nich afslaten un is in de Midd von de Johren 1960 na Brietsch-Honduras trügg.[1] He weer Chefreadaktör von dat Bladd The Reporter in Belize-Stadt.[1] Tosätzlich hett he 1970 de Liberal Party mit grünnt, de sik in’n September 1973 mit annere Partein to de United Democratic Party (UDP) tohoopslaten hett.[1][2] Bi de Wahl to’n Stadtraad von Belize-Stadt in’n Oktober 1974 is Rodriguez för de UDP antreden un wählt worrn. He hett denn dat Amt as Börgermeester von Belize-Stadt övernahmen.[1] Ok bi de Wahlen 1977 is he wedderwählt worrn un bet 1980 Börgermeester bleven.[1][3]
Bi de Parlamentswahl in Belize 1974 is he in’n Wahlkreis Pickstock gegen Adolfo Lizarraga von de PUP antreden un hett mit 48,9 % von de Stimmen knapp verloren (Lizarraga harr blots veer Stimmen mehr).[1] Ok bi de Wahl 1979 is he in’n sülven Wahlkreis wedder antreden. Dütmaal hett he mit 46,6 % gegen Jane Usher von de PUP verloren. Na düsse verloren Wahlen hett he sik 1980 ut de aktive Politik trüggtagen.[4]
1999 is Rodriguez Ombudsmann för Belize worrn, wat he bet 2008 bleven is. He weer dormit de eerste Ombudsmann för Belize.
Ehren[ännern | Bornkood ännern]
To Neejohr 2000 is Rodriguez Officer of the Most Excellent Order of the British Empire worrn.
Footnoten[ännern | Bornkood ännern]
- ↑ a b c d e f g Paul of Belize, Amandala an’n 30. Mai 2014
- ↑ Robert J. Alexander: Political Parties of the Americas: Canada, Latin America, and the West Indies. Greenwood Press, 1982, Sied 112
- ↑ Myrtle Palacio: Belize City Council Election Results 1962 to 2003
- ↑ Robert J. Alexander: Political Parties of the Americas: Canada, Latin America, and the West Indies. Greenwood Press, 1982, Sied 117