Grundschool Aßel

De Grundschool Aßel is en Grundschool in dat Dörp Aßel in’n Landkreis Stood. Dreger is de Gemeen Drochters. De School liggt an de Johann-Grothmann-Straat, nich wied von de Landsstraat 111. Dor gaht de Schölers ut de Öörd Aßel, Barnkroog, Aßlermoor, Weth, Ritschermoor, Ritsch, Drochtersermoor, Gauensiekermoor, Aschhoornermoor un en Deel von Aschhoorn hen.^[1] De School hett 180 Schölers in negen Klassen, 13 Schoolmeesters un dree pädagoosche Mitarbeiders (Stand Schooljohr 2008/2009).^[2] De School hett teihn Klassenrüüm, veer Fackrüüm un en Köök.

Nadem se mit de Grundschool trech sünd, gaht de Schölers denn op Oberschool na de Elvmaschen-School in Drochters oder op Gymnasium na de Vincent-Lübeck-School in Stood.

In dat hüdige Schoolhuus is de School mit 381 Schölers an’n 12. August 1969 intagen. Dat schull en Middelpunktschool för de Schölers ut Aßel, Barnkroog un Aßlermoor wesen. 1971 is dor en Hauptschool inricht worrn, op de denn ok Schölers ut Drochters gahn sünd. Von 1974 af an hett de School denn Grund- un Hauptschool heten, nadem de letzte Klass von de Volksschool Afsluss harr. 1978 is de Hauptschool denn na Drochters gahn un Aßel weer en reine Grundschool.

De Swemmünnerricht warrt in dat Hallenbad Drochters maakt, de Sportünnerricht in de egen Turnhall bi de School. In de School is ok de Gemeenbökeree Aßel mit 2500 Bänn ünnerbröcht.