Grenz twüschen Belize un Mexiko

Vun Wikipedia
Koort von de Grenz

De Grenz von Belize un Mexiko is de Lien, de de Länner Belize un Mexiko in Middelamerika trennt. Düsse Staatsgrenz is 250 km lang.

Verloop[ännern | Bornkood ännern]

De Startpunkt in’n Westen von de Grenz is dat Dreelännereck mit Guatemala bi 17° 49′ N, 89° 9′ W. Düsse Punkt liggt in’n Oorwoold un is von Belize un Guatemala ut temlich untogänglich. In Belize liggt de Mennoniten-Oort Neustadt teihn Kilometer dör’n Oorwoold in’n Noordoosten un in Guatemala is de nächste Oort Uaxactún, wat knapp 70 Kilometer in’n Süüdwesten is. In Mexiko liggt dat Dörp Pioneros del Río Xnohá acht Kilometer in’n Noordwesten, de Feller von dat Dörp kaamt aver noch neger an de Grenz ran. Dat Rebeed in Guatemala höört to dat Departamento Petén, in Mexiko to’n Bundsstaat Campeche un in Belize to’n Distrikt Orange Walk.

Von düssen Punkt löppt de Grenz stracks na Noorden bet se op’n Río Azul/Blue Creek drippt. Düsse Punkt an’n Stroom is gliektiedig in Mexiko Grenzpunkt twüschen de Bundsstaten Campeche un Quintana Roo. Von dor af an löppt de Staatsgrenz in de Midd von’n Río Azul/Blue Creek un later von’n Río Hondo/Hondo River, in den de Río Azul/Blue Creek münnt. De Stroomwarder Albion Island blifft dorbi bi Belize.

Bi 18° 29′ N, 88° 19′ W in’n Süden von de mexikaansche Grootstadt Chetumal münnt de Hondo in de Bucht von Chetumal, wat en Deel von de Karibische See is.

in de Bucht von Chetumal löppt de Seegrenz twüschen de beiden Staten na’n Boca Bacalar Chico, wat en lütten Kanaal twüschen de Halvinsel, op de Xcalak liggt, in’n Noorden (to Mexiko) un Ambergris Caye in’n Süden (to Belize) is.

Grenzövergäng[ännern | Bornkood ännern]

Ole Brügg 2008

De eenzige offizielle Grenzövergang liggt twüschen Santa Elena un Subteniente López bi de Grootstadt Chetumal. Dor föhrt de Philip Goldson Highway ut Belize mit en Brügg över’n Hondo un över en Tobringerstraat an de MEX 186.

Bet 2013 leeg de Grenzövergang direkt twüschen Santa Elena un Subteniente López. 2013 is en ne’e Ümtostraat un en ne’e Brügg trech worrn, so dat de Verkehr nu üm de beiden Öörd rüm löppt. De ole Brügg besteiht aver noch.

Annere Brüggen as düsse beiden gifft dat nich. In’n Grenzafsnidd in’n Westen, wo de Grenz dröög is, gifft dat liekers keen Straat un keen Weg, de över en Footpadd dör’n Oorwoold rutgeiht.

Dat gifft en inoffiziellen Grenzverkehr mit Bööd över’n Stroom, de deelwies ok för dat Smuggeln von Drogen bruukt warrt.

Historie[ännern | Bornkood ännern]

De facto weer dat Land in’n Süden von’n Hondo siet dat 17. Johrhunnert brietsch un in’n Noorden spaansch un later mexikaansch. Mexiko weer al siet 1821 unafhängig, wieldes Belize bet 1981 as Brietsch-Honduras Kolonie weer.

In de Grenzregion hebbt bet in dat 19. Johrhunnert kuum Minschen leevt. De Stadt Chetumal hett dat noch nich geven un de Stadt Bacalar weer wiet af von de Zentren von Mexiko. Ok in Belize weer de Noorden Achterland un wiet af von dat Zentrum in Belize-Stadt. Eerst dör’n Kastenkrieg (1847–1901), in den de inheemschen Maya opstahn sünd gegen de mexikaansche Överheit, is de Grenzregion stärker in’n Fokus raakt. De Mayas hebbt op beide Sieden von’n Hondo opereert un ok brietsche Stüttpunkte angrepen, to’n Bispeel 1872 in de Slacht von Orange Walk.

De Grenz is denn an’n 8. Juli 1893 in en Verdrag twüschen Briten un Mexikaners offiziell fastleggt worrn. Düsse Grenz weer nu de Boca Bacalar Chico. In en tweten Verdrag an’n 7. April 1897 is nochmaal fastleggt worrn, dat mexikaansche Bööd fre’e Passaasch dör’n Boca Bacalar Chico hebben schöölt, denn de Seeweg na Süden ut de Bucht von Chetumal rut güng dör brietsch Hoheitswater. Üm brietsch Rebeed to ümgahn, hebbt de Mexikaners 1900 den Oort Xcalak grünnt un en Stück wieder in’n Noorden den Zaragoza-Kanaal anleggt, de nu mexikaansche Scheep verlöven dee, in de Bucht von Chetumal to kamen.