Boca Bacalar Chico

De Boca Bacalar Chico is en smallen, twee Kilometer langen Waterweg, de de Halvinsel, op de Xcalak liggt, von dat Eiland Ambergris Caye afdeelt un de Bucht von Chetumal mit de Karibische See verbinnt. Dat liggt an de Küst von Yucatán un billt vondaag de Grenz twüschen Belize un Mexiko.

Historie

De Waterweg weer al vörhannen, as de Briten in dat 18. Johrhunnert toeerst jemehr Besitt in Brietsch-Honduras kartografeert hebbt un warrt 1786 in de Koort von’n „Bay-man of Honduras“ Río Sangre nöömt.

De facto weer Ambergris Caye brietsch un Yucatán mexikaansch, aver eerst an’n 8. Juli 1893 is in en Verdrag en offizielle Grenz fastleggt worrn. Düsse Grenz weer nu de Boca Bacalar Chico. In en tweten Verdrag an’n 7. April 1897 is nochmaal fastleggt worrn, dat mexikaansche Bööd fre’e Passaasch dör’n Boca Bacalar Chico hebben schöölt, denn de Seeweg na Süden ut de Bucht von Chetumal rut güng dör brietsch Hoheitswater.

As de Mexikaners kort later aver en Expeditschoon loosschickt harrn, üm den Tostand to ünnersöken, hett sik rutstellt, dat de Dörfohrt kuum noch to bruken weer, denn dör de Mangroven is de Waterweg jümmer mehr towussen.

Dorüm hebbt de Mexikaners 1900 den Oort Xcalak grünnt un en Stück wieder in’n Noorden den Zaragoza-Kanaal anleggt, de nu mexikaansche Scheep verlöven dee, in de Bucht von Chetumal to kamen.