Eestborg
De Eestborg (hoochdüütsch Esteburg) is en Good in de Gemeen Jörk in’n Landkreis Stood, Neddersassen.
De Eestborg liggt op dat rechte Över von de Eest twüschen Moorenn in’n Süden un Lütt Hoov in’n Noorden un güntsied Eestbrügg. Liekers hett de Borg fröher jümmer to Rübk tellt, dat üm un bi twee Kilometer in’n Süüdoosten liggt.
Geografie
[ännern | Bornkood ännern]De Eestborg liggt an dat Oostöver von de Eest in de Masch von Oolland.
De Naveröörd sünd Hoov in’n Noorden, Cranz, Neefeld un Nincop in’n Noordoosten, Rübk in’n Süüdoosten, Moorenn in’n Süden, Neeland in’n Süüdwesten, Eestbrügg in’n Westen un Königriek in’n Noordwesten.
Historie
[ännern | Bornkood ännern]De Eestborg geiht trügg op en Waterborg ut de late Renaissance. De Anlaag hett de Hornbörger Borgmannen Schult tohöört. Dat Goodshuus is 1607 anfungen worrn to boon. Faken warrt dor ok Slott Eestborg to seggt, ofschoonst dat na Grött un Funkschoon egentlich mehr en Herrnhuus is un keen Slott.
Dat Gooshuus steiht op moorigen Maschbodden, dorüm müssen de Gebüüd deep grünnt warrn. De Arbeiden dorto weren opwennig. Dat gifft en Bericht von Luneberg Mushard, dat de Kösten för dat Grünnen jüst so hoog weren as för de Gebüüd sülvs. De Boherr Diederich Schult schall dorüm 1611 de Ünnerlagen över den Bo verbrennt hebben, dat de Nakamen nich weet, wo veel he dor för utgeven hett.[1]
Dat Gebüüd besteiht ut twee Delen: dat Haupthuus un dor an anslaten en Weertschopstrakt. Dat Haupthuus is en Backsteenbo mit twee Etaaschen un en Kröpelwalmdack. De Fassaad nimmt enkelte Elementen von de Werserrenaissance op. En besünner Kennteken is, dat an verscheden Steden ut de Fassaad ut Steen nabillte Kanonen von’n Typ von en Feldslang rutkiekt un dat Gebüüd en Anschien von Wehrhaftigkeit geevt. Dat Gebüüd is över de Johrhunnerten faken ümboot worrn. Dat Portaal mit de twee Kriegerstatuen un en Inschriftenplaat is von 1722. De Weertschopstrakt slütt sik na Oosten direkt an dat Haupthuus an. He weer vör 1967 en Oollanner Buurnhuus mit en sied Reetdack. In dat Johr is de Trakt afbraken worrn. Dor is denn en modeerner Gebüüd von de sülve Grött boot worrn.
De Hoff is över 300 Johr lang in Familienbesitt von de Familie Schult bleven. In de Johren 1880 hett Alexander von Schulte 25 Hektar an en Tegelee verköfft. He is 1899 ahn Nakamen doodbleven. Siene Weetfro Sophie weer noch bet 1911 Besitter von dat Good un hett dat denn verköfft. Dat Good mit 55 Hektar Land güng för 140.000 Rieksmark an den Huussöhn Heinrich Buchholtz ut Hoov. 1955 hett dat Buchholtz sien Söhn Walter övernahmen. Vondaag is dat Privaatbesitt von de Familie Ehlers. Op dat ole Good liggt siet 1935 ok de Obstbauversuchsanstalt.
Goodsherrn
[ännern | Bornkood ännern]- 1607–1616: Diederich Schulten
- 1616–1641: Diederich Schulten
- 1641–1683: Diederich Schulten
- 1683–1728: Alexander Schulte
- –1899: Alexander von Schulte
- 1899–1911: Sophie von Schulte
Verwaltungsgeschicht
[ännern | Bornkood ännern]De Oort hett vör 1852 to dat Gericht Rübk tohöört un denn von 1852 bet 1885 to dat Amt Jörk. Na 1885 weer dat in’n Kreis Jörk un 1932 is dat Deel von’n Landkreis Stood worrn.
De Oort is an’n 1. Juli 1972 mit de Gemeenreform in Neddersassen Deel von de Gemeen Jörk worrn.
Inwahnertall
[ännern | Bornkood ännern]| Johr | Inwahners |
|---|---|
| 1791[2] | 7 Füürsteden |
| 1824[3] | 7 Füürsteden |
| 1848[4] | 30 Lüüd, 3 Hüüs |
| 1. Dezember 1871[5] | 40 Lüüd, 3 Hüüs |
Religion
[ännern | Bornkood ännern]De Eestborg is evangeelsch-luthersch präägt un höört to dat Kaspel von de St.-Martini-Kark in Eestbrügg.
För de Kathoolschen is de St.-Maria-Kark in Buxthu tostännig.
Weertschop un Infrastruktur
[ännern | Bornkood ännern]Verkehr
[ännern | Bornkood ännern]An de Eestborg langs löppt de Kreisstraat 83, de in’n Noorden in Hoov an de Landsstraat 140 ran geiht un in’n Süüdwesten dör Moorenn na de Ooldstadt von Buxthu. De L 140 löppt in’n Noordwesten na Jörk, Mittelskark un Greundiek un in’n Oosten an de Landsgrenz na Hamborg un dor över Nincop un Francop na Moorborg un Oolwarder.
De nächste Autobahn is de Autobahn 26 (Afsnidd Stood–Hamborg). De nächste Opfohrt is opstunns de Opfohrt 6 Jörk, de so negen Kilometer in’n Süüdwesten von de Eestborg an de K 26 liggt. In en poor Johr schall de Opfohrt 7 Buxthu trech warrn, de denn so bi söven Kilomter wied weg in’n Süden an de K 40 liggen schall.
De nächste Bahnhoff is so bi söven Kilometer wied weg in’n Süüdwesten de Bahnhoff Buxthu an de Nedderelvbahn von Cuxhoben na Hamborg un an de Bahnlien Bremerhoben–Buxthu.
Footnoten
[ännern | Bornkood ännern]- ↑ Hector Wilhelm Heinrich Mithoff: Kunstdenkmale und Alterthümer im Hannoverschen. Band 5: Herzogthümer Bremen und Verden nebst dem Lande Hadeln, Grafschaften Hoya und Diepholz. Hannover 1878, Sied 40
- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 71
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 176
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 151
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 139
Weblenken
[ännern | Bornkood ännern]
Koordinaten:53° 31′ N, 9° 44′ O