Cappeler Neefeld
| Wapen/Flagg | Koort | |
|---|---|---|
|
|
| |
| Basisdaten | ||
| Flach: | 9,75 km² | |
| Inwahners: | 1.112 (18. August 2014) | |
| Inwahnerdicht: | 114,1 Inwahners pro km² | |
| Hööchd: | 0 m över NHN | |
| Postleettall: | 27637 | |
| Vörwahl: | 04741 | |
| Geograafsche Laag: | Koordinaten:53° 46′ N, 8° 32′ O53° 46′ N, 8° 32′ O | |
|
| ||
Cappeler Neefeld (hoochdüütsch Cappel-Neufeld) is en Oort in de Gemeen Wuster Noordseeküst in’n Landkreis Cuxhoben, Neddersassen. Binnen de Gemeen höört de Oort to de polietsche Oortschop Noordholt.
Geografie
[ännern | Bornkood ännern]De Oort liggt direkt achtern Diek von de Noordsee in de Masch von Land Wusten. Dat Water ut dat Achterland flütt in Cappeler Neefeld över de Cappeler Waterlöös in de Waddensee von dat Wuster Wadd.
De Naveröörd sünd Spieker Neefeld (mit Liether Hoff, Langenhoff un Pompdamm) in’n Noorden, Spieker Olendiek in’n Noordoosten, Cappeler Olendiek in’n Süüdoosten, Dorumer Olendiek in’n Süden un Dorumer Neefeld in’n Süüdwesten.
Historie
[ännern | Bornkood ännern]De Oort is Deel von dat Neefeld. Fröher güng de Küst von de Noordsee bet an’n Olendiek. 1635/1636 is dat Dieksvörland aver indiekt worrn un dat Land twüschen olen un ne’en Diek is Neefeld nöömt worrn. Dat Rebeed is twüschen de Wuster Kaspels opdeelt worrn. Dorüm gifft dat Dorumer Neefeld, Cappeler Neefeld un Spieker Neefeld.
Verwaltungsgeschicht
[ännern | Bornkood ännern]In de Franzosentied hett de Oort toeerst 1810 bet 1811 binnen dat Königriek Westfalen to de Mairie Neefeld in’n Kanton Dorum höört un denn von 1811 bet 1814 to dat Franzöösche Kaiserriek ünner Napoleon un dor ok wedder to de Mairie Spiek in’n Kanton Dorum.
De Oort hett vör 1825 to dat Vaagdiegericht Land Wusten tohöört un denn von 1852 bet 1885 to dat Amt Dorum. Na 1885 weer dat in’n Kreis Leh. 1932 is dat Deel von’n Kreis Wersermünn worrn un 1977 von’n Landkreis Cuxhoben.
An’n 1. Juli 1968 hebbt sik de Gemenen Cappeler Neefeld, Spiek un Spieker Neefeld to een Gemeen tohoopslaten, de mit de Gemeenreform in Neddersassen an’n 1. März 1974 denn Deel von de Gemeen Noordholt worrn is.
To’n 1. Januar 2015 is de Gemeen Noordholt oplööst un dor is tohoop mit de Samtgemeen Land Wusten de ne’e Gemeen Wuster Noordseeküst von worrn. Dat Rebeed von de vörherige Gemeen Noordholt billt nu de polietsche Oortschop Noordholt binnen de Gemeen Wuster Noordseeküst.
Inwahnertall
[ännern | Bornkood ännern]| Johr | Inwahners |
|---|---|
| 1791[1] | 50 Füürsteden |
| 1812[2] | 250 |
| 1824[3] | 51 Füürsteden |
| 1848[4] | 325 Lüüd, 52 Hüüs |
| 1. Dezember 1871[5] | 294 Lüüd, 52 Hüüs |
| 1. Dezember 1885[6] | 284 Lüüd, 52 Hüüs |
| 1. Dezember 1905[7] | 259 Lüüd, 51 Hüüs |
| 1. Dezember 1910[8] | 236 |
| 1925[9] | 282 |
| 1933[9] | 247 |
| 1939[9] | 220 |
Religion
[ännern | Bornkood ännern]Cappeler Neefeld is evangeelsch-luthersch präägt un höört to dat Kaspel von de Peter-un-Paul-Kark in Cappel.
För de Kathoolschen is de Twölv-Apostels-Kark in Olenwoold tostännig, de siet 2008 to de Karkengemeen St. Marien in Cuxhoben tohöört.
Wapen
[ännern | Bornkood ännern]Dat Wapen von Cappeler Neefeld wiest baven op gollen Grund en Fuust in natürliche Klören, de ut en Mau stött, un ünnen op grönen Grund en sülvern wellten Schildfoot.
De Wellen staht för de Noordsee un dat Gröön för’n Diek. De Fuust kummt ut dat Wapen von’n Vaagd Johann Eide Fouwes, de 1670 as Fuust von un to Neefeld adelt worrn is.
Utklamüsert hett dat Wapen de Heraldiker Gustav Völker.
Weertschop un Infrastruktur
[ännern | Bornkood ännern]Cappeler Neefeld hett en egene freewillige Füürwehr.
In Cappeler Neefeld is an’n 8. August 1988 een von de eersten groten Windparks in Bedriev gahn. Düsse Windpark Cuxhoben bestünn ut 15 Monopteros-Anlagen von MBB mit en Leistung von 30 Kilowatt, de blots een Flögel harrn (Pries ümrekent üm un bi 45.000 Euro). Tosätzlich hett dat teihn Dreeflögler-Anlagen von Enercon mit je 55 Kilowatt geven (Pries ümrekent üm un bi 70.000 Euro). Bedriever weer dat Överlandwark Noord-Hannover, dat de beiden Varianten verglieken wull. De Eenflögler-Anlagen sünd Enn August 1992 al afboot worrn, nadem sik rutstellt hett, dat se nich de Leistung bringen deen, de verwacht weer.
De annern Anlagen sünd 2008 repowert worrn. De olen Anlagen sünd afboot un teihn Anlagen von’n Typ Enercon E-33 (330 Kilowatt) nee opstellt worrn. Aktuell (Stand 2018) staht 15 Anlagen in Cappeler Neefeld.
Verkehr
[ännern | Bornkood ännern]Von Cappeler Neefeld gifft dat Straten an’n Diek langs na Spieker Neefeld in’n Noorden un Dorumer Neefeld in’n Süden. De wichtigste Straat is aver de Kreisstraat 72, de in’n Oosten na Cappeler Olendiek/Spieker Olendiek an de K 68 ran geiht. De K 68 föhrt denn in’n Noordoosten över Noordholt na de Landsstraat 135 un in’n Süüdwesten över Siedenstraten na Spiek, Cappel un Dorum.
De nächste Autobahn is de Autobahn 27 (Afsnidd Cuxhoben–Bremerhoben). De Opfohrt 3 Noordholt liggt so ölven Kilometer in’n Oosten von Cappeler Neefeld an de K 14.
De nächste Bahnhoff is so bi söven Kilometer wied weg in’n Noordoosten de Bahnhoff Noordholt an de Bahnlien Bremerhoben–Cuxhoben.
Ver- un Entsorgung
[ännern | Bornkood ännern]
In Cappeler Neefeld liggt ok en Kläranlaag von’n Water– un Afwaterverband Wersermünn-Noord.
Footnoten
[ännern | Bornkood ännern]- ↑ Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 46
- ↑ Albrecht Friedrich Ludolph Lasius: Der französische Kayser-Staat unter der Regierung des Kaysers Napoleon des Großen, im Jahre 1812, Band 1. Kißling, Ossenbrügge 1813, Sied 104
- ↑ Curt Heinrich Conrad Friedrich Jansen: Statistisches Handbuch des Königreichs Hannover. Hannover 1824, Sied 111
- ↑ Friedrich Wilhelm Harseim, Carl Schlüter: Statistisches Handbuch für das Königreich Hannover. Schlütersche Hoffbookdruckeree, Hannover 1848, Sied 147
- ↑ Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 152
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1885. Verlag des Königlichen statistischen Bureaus, Berlin 1888, Sied 160
- ↑ Gemeindelexikon für das Königreich Preußen. Auf Grund der Materialien der Volkszählung vom 1. Dezember 1905. Verlag des Königlichen statistischen Landesamtes, Berlin 1908, Sied 98
- ↑ Inwahnertallen op gemeindeverzeichnis.de
- ↑ a b c Inwahnertallen op verwaltungsgeschichte.de
