Ahlenfalkenbarg

Vun Wikipedia
(wiederwiest vun Ahlen-Falkenberg)
Zur Navigation springen Zur Suche springen
Wapen/Flagg Koort

Wapen vun Ahlenfalkenbarg

Ahlenfalkenbarg
Laag vun Ahlenfalkenbarg in Düütschland
Basisdaten
Bundsland: Neddersassen
Landkreis: Cuxhoben
Samtgemeen: Land Hadeln
Gemeen: Wannen
Inwahners:
Postleettall: 21776
Vörwahl: 04755
Geograafsche Laag:
Koordinaten:53° 42′ N, 8° 46′ O
53° 42′ N, 8° 46′ O

Luftbild von Ahlenfalkenbarg (2012)

Ahlenfalkenbarg (hoochdüütsch Ahlenfalkenberg) is en Dörp in de Gemeen Wannen in’n Landkreis Cuxhoben, Neddersassen.

Geografie[ännern | Bornkood ännern]

Ahlenfalkenbarg liggt in’t Ahlenfalkenbarger Moor in’t Siedland von Hadeln. In’n Süden liggt de Daalmer See un de Flögelner See.

De Naveröörd sünd Westerwannen un Oosterwannen in’n Noordoosten, Suurlee in’n Oosten, Flögeln in’n Süüdoosten, Niewohl in’n Süüdwesten un Krümpel in’n Noordwesten.

Historie[ännern | Bornkood ännern]

Dat Rebeed von’n Oort is en groot Moorflach mit dree lütte Geestinseln dor in. Düsse Geestinseln hebbt de Naams Lütt Ahlen, Groot Ahlen un Falkenbarg hatt. Op Lütt Ahlen stünnen fröher twee Hüüs, op Groot Ahlen stünnen keen Hüüs un op’n Falkenbarg stünn en Forsthuus. De Oort, so as wi em vondaag finnt, is eerst in’n Eersten Weltkrieg grünnt worrn, as Kriegsfungene dat Moor dröögleggt un dor en Moorkolonie anleggt hebbt.

In dat Fungenenlager von Ahlenfalkenbarg hett dat in de Tied von’n Natschonalsozialismus jümmer so bi 150 Fungene geven, de in’t Moor hebbt Törf steken müsst. Aver ok na’n Krieg is dat Lager noch bet 1979 bleven un dor hebbt so üm un bi 70 Fungene ut dat Gefängnis Oshusen arbeidt.

De Hüüs von Ahlenfalkenbarg doot vondaag vör allen op Lütt Ahlen liggen. En lüttjeren Deel liggt an’n Süüdrand von Groot Ahlen. Op’n Falkenbarg staht nu ok en poor Hüüs un in’t siede Moor in’n Noorden von’n Flögelner See sünd an de Straten Barkhohnweg un Fievseenweg enkelte Hööv aleggt worrn.

Dat Törfwark Ahlenfalkenbarg harr en 5,7 km lange Warkbahn, de vondaag noch wieder as Museumsbahn bedreven warrt.

Verwaltungsgeschicht[ännern | Bornkood ännern]

De Oort hett vör 1852 to dat Afdeel Suurlee von dat Kaspelsgericht Wannen in dat Land Hadeln tohöört un denn von 1852 bet 1885 to dat Amt Oterndörp. Na 1885 weer dat in’n Kreis Hadeln. 1932 is dat Deel von’n ne’en un grötteren Kreis Land Hadeln worrn un 1977 von’n Landkreis Cuxhoben.

Inwahnertall[ännern | Bornkood ännern]

Johr Inwahners
1791-00-001791[1] 2 Füürsteden
1871-12-011. Dezember 1871[2] 18 Lüüd. 3 Hüüs*
* Lütt-Ahlen 11 Lüüd, 2 Hüüs; de herrschopliche Försterwahnung (Falkenbarg) 7 Lüüd, 1 Huus

Religion[ännern | Bornkood ännern]

Ahlenfalkenbarg is evangeelsch-luthersch präägt un billt mit de Nicolauskapell, de 1951 boot worrn is, en egen Karkengemeen. Vörher hett dat Rebeed to dat Kaspel von de Georg-Kark in Wannen tohöört.

För de Kathoolschen is de Hillig-Krüüz-Kark in Oterndörp tostännig.

Kultur[ännern | Bornkood ännern]

Verenen[ännern | Bornkood ännern]

De Schützenvereen Ahlenfalkenbarg is 1952 grünnt worrn.

Infrastruktur[ännern | Bornkood ännern]

Verkehr[ännern | Bornkood ännern]

Ahlenfalkenbarg liggt an de Kreisstraat 17, de in’n Noordwesten bi Krümpel an de Landsstraat 118 ranlöppt un in’n Oosten an de K 18. De K 18 geiht in’n Noorden an de K 5 ran un in’n Süden na Flögeln un Beers un dor an de L 119 ran. De K 5 wedder geiht in’n Oosten na Helmworth un in’n Noorden över Wannen na de Worth un Olenbrook.

De nächste Autobahn is de Autobahn 27 (Afsnidd BremerhobenCuxhoben). De Opfohrt 3 Noordholt liggt so ölven Kilometer in’n Noordwesten von Ahlenfalkenbarg an de K 14 un de Opfohrt 4 Niewohl ölven Kilometer in’n Süüdwesten an de L 119.

De nächsten Bahnhööv sünd so 16 Kilometer wied weg in’n Noordoosten de Bahnhoff Oterndörp an de Nedderelvbahn von Cuxhoben na Hamborg un 17 Kilometer wied weg in’n Westen de Bahnhoff Dorum an de Bahnlien Bremen-Cuxhoben.

Footnoten[ännern | Bornkood ännern]

  1. Christoph Barthold Scharf: Statistisch-Topographische Samlungen zur genaueren Kentnis aller das Churfürstenthum Braunschweig-Lüneburg ausmachenden Provinzen. Meier, Bremen 1791, Sied 5
  2. Die Gemeinden und Gutsbezirke des Preussischen Staates und ihre Bevölkerung. Berlin 1873, Sied 151

Weblenken[ännern | Bornkood ännern]

Commons-logo.svg Ahlenfalkenbarg. Mehr Biller, Videos oder Audiodateien to’t Thema gifft dat bi Wikimedia Commons.