Rocky (Film)

Vun Wikipedia
Filmdaten
Plattdüütsch Titel:
Originaltitel: Rocky
Düütsch Titel: Rocky
Produkschoonsland: USA
Johr vun’t Rutkamen: 1976
Läng: 114 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: John G. Avildsen
Dreihbook: Sylvester Stallone
Produkschoon: Irwin Winkler
Robert Chartoff
Musik: Bill Conti
Kamera: James Crabe
Snitt: Scott Conrad
Richard Halsey
Szenenbild: James H. Spencer
Kledaasch: Robert Cambel
Dorstellers

Rocky is de Titel vun en US-amerikaanschen Boxerfilm vun den Speelbaas John G. Avildsen ut dat Johr 1976. De Hööftrull speelt Sylvester Stallone, de ok dat Dreihbook schreven hett. In’t Filmjohr 1976 harr de Film unvermodens veel Spood in de Kino un weer dat Johr dorop mit dree Oscars uttekent. De Film weer de Optakt to en Filmreeg, to de bit hüüt söss Filmen höört.

Inholt[ännern | Bornkood ännern]

„Rocky“ Balboa versöcht sik siet Johren al as Boxer en Naam to maken, mutt sik aver jümmer mit Kämp in rünnerkamen Buden tofreden geven. Blangento verdeent he sik sien Geld as Geldindriever för den Kredithai Tony Gazzo. Sien heel Leven speelt sik in’t Armenveerdel vun Philadelphia af. Man, denn kummt sien Chance: De aktuelle Weltmeester in’t Swoorgewicht, Apollo Creed kann nich gegen sien Gegner antreden, vunwegen dat de sik de Hand bi’t Training besehrt hett. Nu hett Creed aver al to veel Opwand dreven, üm den Kamp antokünnigen un söcht partuu en Gegner.

Also överleggt Apollo Creed, an’n Neejohrsdag 1976, den Dag, an den de USA jemehr 2000-johrig Bestahn fiert, en unbekannten Amateur ut Philadelphia de eenmolige Chance to geven, gegen em in’n Ring to stiegen. Ut en ümfangriek Verteken fallt em Rocky in’t Oog, den he wegen sien italieenschen Afstammen un sien Ringtitel The Italian Stallion („de italieensche Hengst“) utwählt.

Rocky nimmt de Chance an un hett nu blots noch een Teel vör Ogen: sien hele Kraft un Tiet dorop to verwennen, sik op den Kamp vörtobereiten. He will de Chance vun sien Leven nütten, ofschoonst he natürlich nich dormit reken deit, gegen den Champion bestahn to künnen. Aver alleen al mit den Weltmeester in’n Ring to stahn maakt em stolt, un dör en go’en Kamp will he sik bi de Tokiekers bekannt maken.

Wat toeerst as Schaukamp in de utverköffte Arena dacht weer warrt unvermodens to en eernste Ut’nannersetten. Rocky lett sik even nich vun den Champion vörföhren, man kämpt, as weer de Düvel in em, un sett em ordig to. Opletzt sünd sien Ogen toswollen, dat he nix mehr sehn kann. Apollo Creed winnt an’t Enn na Punkten, liekers warrt Rocky vun de Tokiekers as’n Held fiert. Un so kann Rocky opletzt ok privat noch en Sieg fiern, vunwegen dat he de Leev vun de schuulsche Adrian winnen kann, op de he so lange Tiet al en Oog harr.

Kritik[ännern | Bornkood ännern]

  • Dat Lexikon vun’n internatschonalen Film beteken den Film as en tyypsch amnerikaansche Geschicht vun’n Underdog, de dör Taagheit, Moot un Naivität de soziale Hierarchie op’nn Kopp stellen deit. Na den utermatigen Spood bleven wietere Deelen nich ut, de aver nie wedder as de stimmige Figurenpsychologie un de wohrhaftige Milieubeschrieven rankamen sünd.[1]
  • Adolf Heinzlmeier un Berndt Schulz schreven in’t Lexikon ‚Filme im Fernsehn‘ vun en Boxergeschicht, de mit en lütten Etat dreiht weer, aver to een vun de spoodrieksten Filmen vun all Tieten worrn is. De Film barg en ansleegsch Mischen ut Action, Realismus un Romantik över den ollen amerikaanschen Droom, dat een, de nix is, liekers wat warrn kann.[2]

Utteken[ännern | Bornkood ännern]

De Film weer unvermodens utermatig spoodriek un weer alleen al för teihn Oscars nomineert. He weer för alltosamen veertig Filmpriesen vörslahn un hett dorvun twintig wunnen, so as:

Produkschoon[ännern | Bornkood ännern]

De Schauspeler un Dreihbookschriever Sylvester Stallone weer to de Tiet teemlich afbrennt, as he inspireert worrn is vun den Boxkamp vun den Swoorgesichtschampion Muhammad Ali gegen den teemlich unbekannten witten WM-Rutfodderer Chuck Wepner. Disse Kamp hett an’n 24. März 1975 in’t Stadion vun Cleveland in Ohio stattfunnen. Gegen de Ansichten vun all Boxfacklüüd is Wepner aver nich fröh al slahn worrn, man hett sik lang gegen Ali hollen.

Stallone harr sik den Kamp live in’t Feernsehn ankeken un weer bannig andoon vun den starken Willen vun den Butensieter, de to’n Helden worrn is, ofschoonst he opletzt verloren hett. He harr jüst keen Verdrag as Dorsteller un haar sik överleggt en Loopbahn as Dreihbookschriever intoslahn. Veel Spood harr he dormit opletzt aver nich. Na egen Dorstellen hett Stallone de eerste Faten vun’t Dreihbook in’n Juni 1975 in blots dree’nhalf Daag rünnerschreven un dat Book in de Tiet eenige Filmproduzenten anboden.

Mit Hülp vun en Agenten is Stallone an de unafhangigen Filmproduzenten Robert Chartoff un Irwin Winkler kamen, de em dorto bröcht hebbt, ansteed vun den harden Charakter ahn Hapen hen na de sentimentalen, heldenhafte Traditschoon vun’t olle Hollywood to gahn. In’n Juli 1975 weer en överarbeite Dreihbookfaten fardig, för de em de Filmsellschop United Artists 75.000 US-Dollar anboden hett. Toeerst weern se sik aver nich enig, vunwegen dat Stallone dorop bestahn de, de Hööftrull sülvst to spelen. Dat Studio hett dat Anbott mehrmols höger sett. Opletzt hett man sik op 300.000 US-Dollar verstännigt. Stallone schüll en Honorar vun 20.000 US-Dollar un en siete Gaasch vun 620 US-Dollar in de Week kriegen. He weer aver ok mit 10 % an de Innahmen vun den Film bedeeligt – wat sik för Stallone as Glücksfall rutstellen de.

Üm sik op de Rull vörtobereiden is he mehr as fief Maanden vun den fröheren Box-Profi Jimmy Gambina traineert worrn. Dorbi hett ok John Avildsen eerste Opnahmen to Proov vun em maakt, üm de Kampchoreografien intostuderen un för wenig Geld uttoarbeiten. För de Dreiharbeiten weern söven Weken ansett mit en Budget vun ruchweg 1,1 Millionen US-DOllar[3]. Bruukt weern opletzt blots een Million un 28 Dreihdaag.

Premiere harr de Film an’n 21. November 1976 in New York City.[4]. Vun de Kritik weer Rocky tomeist loovt un so hett sik de Film unvermodens to en groten finanziellen Spood entwickelt. Alltohopen hett de Film in de USA 117,2 Mio. US-Dollar inspeelt, weltwiet sogors 225. Mio. US-Dollar[3][5][6].

Borns[ännern | Bornkood ännern]

  1. Lexikon vun’n internatschonalen Film (CD-ROM-Utgaav), Systhema, München 1997
  2. Lexikon ‚Filme im Fernsehen‘ – Utwiete Neeutgaav. Rasch und Röhring, Hamborg 1990, ISBN 3-89136-392-3, S. 684 (Weertung: 2½ Steerns = överdörsnittlich.)
  3. a b vgl. http://www.imdb.com/title/tt0075148/business
  4. vgl. http://www.imdb.com/title/tt0075148/releaseinfo
  5. Rocky movie review & film summary (1976)
  6. ‘Rocky’ Movies Ranked from Worst to Best (May 1, 2021)

Weblenken[ännern | Bornkood ännern]