Filmproduzent

Vun Wikipedia

En Filmproduzent is en Minsch, de in en Filmprodukschoonssellschop dat Gewarf leiden deit. Dat kann – afhangig vun de Rechtsform – de Besitter, Gewarfsföhrer oder de Vörstandsvörsitter wesen. In’n wieteren Sinn warrt mitünner ok de ganze Firma sülvst as „Filmproduzent“ betekent

In lüttere Filmprodukschoonsünnernehmen as se in Düütschland begäng sünd is de Gewarfsföhrer tomeist ok gliektietig de Leider vun de Herstellen un faken ok de Produkschoonsleider. Bi en lütt Produkschoonsvolumen ohnt sik de Insatz vun mehrere Lüüd faken nich. Bi düütsche Filmünnernehmen is de Produzent meist de eenzig Manager. Dorüm warrt de Beteken „Filmproduzent“ jümmer fakener ok för Filmmanagement in jede Oort bruukt (Produkschoonsleider, Herstellensleider). Bi en gröttere Firma, as dat in de USA faken is, gifft dat tomeist en Minschen, welke de Firma repräsenteert un an de Steed vun de hele Sellschop de Produkschoon vun en Film övernimmt. In engelsch seggt man dorto Executive Producer.

De Produzent is de wichtigste Mann bi en Filmprodukschoon. He is vun Anfang an bit to’n Sluss dorbi. De Produzent hett sik dorbi vör allen dorüm to scheren, dat in’n Achtergrund all’ns richtig löpt. He bringt de Produkschoon in’t Rullen, söcht sik de wichtigen Lüüd tohopen un kiekt, dat jeder to de richtigen Tiet sien Deel vun de Arbeit maken deit. De Produzent is verantwoortlich, dat för de Produkschoon noog Geld to Verfögen steiht un stickt dormit den Rahmen för den Speelbaas af un vertellt em, wat to maken geit un wat nich. Butendem scheert he sik üm Warf un Promotion för den Film un söcht sik de Lüüd tohopen, de den Film an’n End, wenn he fardig, verdelen un an de Kinos bringen deit.

Beropen Filmproduzenten ut hüütige Tiet sünd t. B. Bernd Eichinger, Wolfgang Petersen, George Lucas, Steven Spielberg oder Jerry Bruckheimer, üm blots een poor optotellen, de internatschonal bekannt sünd. Sünners för’n düütschen Film sünd t. B. Detlev Buck & Claus Boje, Tom Tykwer, Sönke Wortmann oder Doris Dörrie. Faken is de Speelbaas gliektietig ok de Produzent, oder anners rüm seggt: Veele Speelbasen, de bekant worrn sünd, hebbt irgendwann ok jemehr egen Produkschoonsfirma grünnt.

Bi dat Feernsehn gifft dat ok Produzenten, de dor de in wietsten Sinn de lieken Opgaven to doon hebbt. Dor warrt aver nich blots Filmen produzeert, man ok de Speel- un Quizshows, Feernsehserien un wat dat sonst noch so all’ns in’n Feernsehn to kieken gifft. Disse Lüüd nöömt sik denn Feernsehproduzent.