Wolfgang Petersen

Vun Wikipedia
Wesseln na: Navigatschoon, Söök
Wolfgang Petersen, 2006

Wolfgang Petersen (* 14. März 1941 in Emden, Düütschland) is en düütschen Filmspeelbaas un Filmproduzent. He hett ok bi eenige vun sien Filmen an’t Dreihbook mitarbeit.

Biografie[ännern | Bornkood ännern]

Kindheit, Jöögd un eerste Arbeiten as Speelbaas[ännern | Bornkood ännern]

Petersen is to de Tiet vun’n Tweeten Weltkrieg in Mekelnborg opwassen. Dorna sünd sien Öllern toeerst wedder torüch na Emden togen, 1950 denn aver na Hamborg-Bramfeld. He hett al to sien Schooltiet op de Gelehrtenschool vun’t Johaneum mit en 8-mm-Kamera eerste Filmen dreiht.

Sien eerste Arbeit as Speelbaas hett Petersen an’t Junge Theater in Hamborg maakt, woneem he Speelbaas bi verscheden Kinneropföhren weer. Blangento hett he ok as Helpsmann vun’n Speelbaas un as Schauspeler arbeit un en Schauspeelschool besöcht. 1965 hett he en Studium vun de Theaterwetenschop in Hamborg un Berlin anfungen. In dat Johr hett he ok ’n lütte Rull in de Feernsehreeg Raumpatrouille speelt.

Dat Johr dorop wessel he an de Düütsche Film- un Feernsehakademie Berlin un hett as Studienarbeiten en poor Kortfilmen dreiht (dorünner Der Eine – Der Andere un Ich nicht). As Afslussarbeit legg he 1969 den Film Ich werde dich töten vör. Wiel de Tiet hett he blangento noch wietere Theaterstücken in Hamborg inszeneert.

Loopbahn in Düütschland[ännern | Bornkood ännern]

Af 1971 hett Petersen för’t Feernsehn arbeit un hett ünner annern för den NDR söss Folgen vun de Feernsehkrimireeg Tatort un för den WDR (Van der Valk und die Reichen) un annere Produkschonen dreiht. De Tatort-Folg Reifezeugnis mit Nastassja Kinski un Christian Quadflieg is bit hüüt een vun de spoodrieksten Tatortfilmen, de je dreiht worrn sünd.

1973/74 künn he sien eersten Film för’t Kino ümsetten, neemlich Einer von uns beiden. Bi’t Besetten vun de Filmkru hett he en teemlich fasten Stamm vun Mitarbeiters tosamenstellt, dorünner Jörg-Michael Baldenius as Kameramann, den Schauspeler Jürgen Prochnow und Klaus Doldinger as Komponist för de Filmmusik. De Film De Konsequenz löös 1977 en Schandal ut, as sik de BR ut de Överdrägen utschalt hett. De Senner weer dorvun övertüügt, dat dat Thema Homosexualität nix för jemehr Tokiekers weer. Korte Tiet later weer de Film in de Kinos to sehn.

1980 geev de Produkschoonsfirma Bavaria Film an Petersen den Opdrag, de Regie to de Grootprodukschoon Das Boot to föhren, de sik vör allen in de USA to’n Kassenhauer entwickelt hett. Das Boot weer dor de bit to de Tiet spoodriekste frömdsprakige Film. In Düütschland weer de Film bi sien Eerstopföhren mit 2,3 Millionen Tokiekers toeerst ehr middelmatig spoodriek. Dör de wedderhollen Opföhren un de Utstrahlen vun de Feernsehfaten is dat de bekanntste düütsche Film vun all Tieten worrn.

Na dissen eersten groten Spood hett Petersen mit en Budget vun mehr as 50 Millionen DM Die unendliche Geschichte as de düerste düütsche Produkschoon na’n Krieg dreiht.

Loopbahn in Hollywood[ännern | Bornkood ännern]

Na sien Spood künn Petersen denn ok in Hollywood Foot faten. Sien eerste Arbeit dor weer 1984 de Science-Fiction-Film Enemy Mine. Twee Johren later is Petersen na Los Angeles ümtogen un hett dor wietere Filmen för den internatschonalen Markt ümsett un Blockbuster utklamüstert as to’n Bispeel Shattered, In the Line of Fire, Outbreak, Air Force One, The Perfect Storm, Troy un annere.

He hett bit hüüt söss Filmen mit Inspeelresultaten vun mehr as 100 Millionen US-Dollar (Blockbuster) in de Kinos bröcht. Inflatschoonsbereinigt sogor söven, vun wegen, dat Das Boot den ok dorto höört.

Filmografie (Utwahl)[ännern | Bornkood ännern]

Johr Titel Funkschoon
1965 Stadt auf Stelzen, Opteken vun’t Lessing-Theater, Hamborg Speelbaas
1966/67 Der Eine – der andere, Kortfilm Speelbaas
Dreihbook
1968 Die Rote Fahne Speelbaas
1970/71 Ich werde dich töten Speelbaas
1971-77 Tatort, Feernsehfolgen Speelbaas
1972 Anna und Toto, Feernsehn Speelbaas
1973 Smog, Feernsehn Speelbaas
1974 Einer von uns beiden Speelbaas
1974 Aufs Kreuz gelegt, Feernsehn Speelbaas
1976 Vier gegen die Bank, Feernsehn Speelbaas
Dreihbook
1977 Planübung, Feernsehn Speelbaas
Dreihbook
1977 Die Konsequenz Speelbaas
Dreihbook
1978 Schwarz und weiß wie Tage und Nächte, Feernsehn Speelbaas
1981 Das Boot Speelbaas
Dreihbook
1984 Die unendliche Geschichte Speelbaas
Dreihbook
1985 Enemy Mine
dt.: Enemy Mine – Geliebter Feind
Speelbaas
1991 Shattered
dt.: Tod im Spiegel
Speelbaas
Produzent
Dreihbook
1993 In the Line of Fire
dt.: In the Line of Fire – Die zweite Chance
Speelbaas
Produzent
1995 Outbreak
dt.: Outbreak – Lautlose Killer
Speelbaas
Produzent
1997 Air Force One Speelbaas
Produzent
1997 Red Corner
dt.: Red Corner – Labyrinth ohne Ausweg
Produzent
1999 Instinct
dt.: Instinkt
Produzent
1999 Bicentennial Man
dt.: Der 200 Jahre Mann
Produzent
2000 The Perfect Storm
dt.: Der Sturm
Speelbas
Produzent
2001 The Agency, Feernsehreeg
dt.: The Agency – Im Fadenkreuz der C.I.A.
Produzent
2004 Troy
dt.: Troja
Speelbas
Produzent
2006 Poseidon Speelbas
Produzent

Utteken un Filmpriesen[ännern | Bornkood ännern]

Wolfgang Petersen weer opstunns veerteihn mol för Filmpriesen nomineert, dorünner ok tweemol för den Oscar, den he aver nich winnen künn. Wunnen hett he bit vundaag (na IMDb, Februar 2009) söven Priesen:

Literatur[ännern | Bornkood ännern]

  • CineGraph – Nakieksel to’n düütschsprakigen Film (Blöödsammlung), B1-B6, F1-F22, E1-E22.
  • Deutsches Filminstitut/Deutsches Filmmuseum: Das Boot. Auf der Suche nach der Crew der U96. Henschel Verlag 2006, ISBN 3-89487-550-X

Weblenken[ännern | Bornkood ännern]