Öllersfreegaav

Vun Wikipedia
Wesseln na: Navigatschoon, Söök

De Öllersfreegaav is de Freegaav vun Filmen, Videospelen un Musik dör den Gesettgever. Se regelt, vun wovun Öller an un ünner welke Vörutsetten oder Oplagen Kinner un junge Lüüd Togang to disse Oort vun Medien hebben drööft, oder ok dat blots Utwassene Minschen dormit ümgahn künnt.

Düütschland[ännern | Bornkood ännern]

Film un Feernsehn[ännern | Bornkood ännern]

De Instopen vun de Öllersfreegaav dör de FSK sünd dör den Jöögdmedienschuul-Staatsverdrag en sünnere Sennentieten bunnen:

  • Programmen mit en Freegaav ahn Beschränken künnt to jede Dag- un Nachttiet wiest warrn.
  • Programmen mit en Freegaav af 6 Johren künnt ok to jede Dag- un Nachttiet wiest warrn.
  • Programmen mit en Freegaav af 12 Johren drööft eerst af avends Klock 8 wiest warrn.
  • Programmen mit en Freegaav af 16 Johren drööft eerst af avends Klock 10 wiest warrn.
  • Programmen mit en Freegaav af 18 Johren drööft eerst af avends Klock 11 wiest warrn.

Wenn en Senner vun disse Vörgaven afwieken müch, mutt de en Utnahmandrag bi de Freewillige Sülvstkontroll Feernsehn (FSF) stellen. Dat kann denn passeeren, dat de Oplaag maakt warrt, sünnere Szenen ut dat Programm ruttosnieden. Wenn en System to’n Nawies vun’t Öller (Age Verification System, AVS) insett warrt, as to’n Bispeel bi eenige Pay-TV-Senners, künnt all FSK-proovten Programmen unafhangig vun de Öllersfreegaav to jede Tiet an’n Dag wiest warrn.

FSK[ännern | Bornkood ännern]

De Inorden vun de Öllersfreegaav waart in Düütschland dör de Freewillige Sülvstkontroll vun de Filmweertschop (FSK) vörnahmen. Dorbi hannelt sik dat üm en reine Freegaav un nich üm en Raat, dat en Film för en sünnere Öllersgrupp sünners goot egent is. Butendem mutt dorop Acht geven warrn, dat dat Jöögdschuulgesett to’n gröttsten Deel ünnerseggt, dat Utwassene Lüüd Kinner oder junge Lüüd ’n vullkamen fre’en Togang to Kino- oder Video-Filmen verlööft. Öllersfreegaven hebbt ok’n Bedüden för dat lopen Feernsehprogramm, ofschoonst dat Inhollen in’n privaten Huusholt bi de Familien nich kontrolleert warrn kann. Dormit liggt de Opsicht doröver bi de Öllern. Dat Jöögdschuulgesett ünnerscheedt dorbi ok nich twüschen Öllern un Utwassen Lüüd. Jüst in jüngerer Tiet foddert aver eenige Politikers mehr Verantwoorten vun Öllern un wüllt jem tokamen starker in de Plicht nahmen sehn.

De Freegaven vun de FSK sünd:

Teken Aktuell Kennteken Kennteken vun’n 1. April 2003 bit 30. November 2008 Kennteken vör’n 1. April 2003
FSK ab 0 logo Dec 2008.svg FSK af 0 freegeven Freegeven ahn Öllersbeschränken (witt) na § 14 JuSchG FSK Freegeven ahn Öllersbeschränken (witt) na § 7 JÖSchG FSK
FSK ab 6 logo Dec 2008.svg FSK af 6 freegeven Freegeven af 6 Johren (geel) na § 14 JuSchG FSK Freegeven af 6 Johren (geel) na § 7 JÖSchG FSK
FSK ab 12 logo Dec 2008.svg FSK af 12 freegeven Freegeven af 12 Johren (gröön) na § 14 JuSchG FSK Freegeven af 12 Johren (gröön) na § 7 JÖSchG FSK
FSK ab 16 logo.svg FSK af 16 freigeven Freegeven af 16 Johren (blau) na § 14 JuSchG FSK Freegeven af 16 Johren (blau) na § 7 JÖSchG FSK
FSK ab 18 logo Dec 2008.svg FSK af 18 Keen Jöögdfreegaav (root) na § 14 JuSchG FSK Nich freegeven ünner 18 Johren (root) na § 7 JÖSchG FSK
Ok: Freegeven af 18 Johren (root) na § 7 JÖSchG FSK

"De ne’en Teken sünd op de Vördersiet vun de Hüll links ünnen op en Flach vun tomindest 1200 mm² (3,46 cm x 3,46 cm) un op’n Bilddräger op en Flach vun tomindest 250 mm² (1,58 cm x 1,58 cm) antobringen (§ 12 Abs. 2 Satz 2 JuSchG)."[1] Filmen, de in’t Kino af 12 Johren freegeven sünd, künnt in’n Biwesen vun so nöömte Personensoorgberechtigten ok al vun Kinner af 6 Johren besöcht warrn. All annern FSK-Freegaven sünd verbindlich.

Düütschland höört blangen Grootbritannien un Norwegen to de wenigen europääschen Länner, in de 18 Johren de hööchste Öllersgrenz is. In all annere europääsche Länner liggt de Hööchstgrenz bi 15 oder 16 Johren.

Juristische Proov[ännern | Bornkood ännern]

Dor blangen gifft dat ok noch juristische Gootachten to Filmen, de vun de FSK nich prüft worrn oder aflehnt worrn sünd, to’n Bispeel wegen Gefohr för de Jöögd in eenfachen oder Sworen Fall oder ok wegen straafrechtliche Bedenken. In so een Fall ünnersöcht en Kommisschooon ut Juristen (JK) vun de Spitzenorganisatschoon vun de Filmweertschop (SPIO) en Medium dorophen, wat en Verstöten gegen’t Jöögdschuulgesett oder anndere straafrechtliche Saken vörliggt. Wenn en Film de Proov mit Spood afleggt, warrt op de Rüchsiet vun de DVD-Hüll normalerwies en lütt rechteckig, swart-witt Teken mit den Opdruck SPIO/JK geprüft (ehmols: SPIO/JK-Gutachten – strafrechtlich unbedenklich) druckt. Filmen mit de beiden Proovteken vun de JK drööft – jüst so as Filmen, de gor nich prüft worrn oder vun de FSK mit Keen Jöögdfreegaav versehn worrn sünd – drööft grundsätzlich blots an Utwassene Lüüd afgeven warrn. Vör enige Johren bargen disse Filmen dorüm tosätzlich den Henwies, dat se blots an Utwassene verköfft oder verlehnt warrn dröffen.

Siet Oktober 2007 gifft dat twee ünnerscheedliche SPIO/JK-Freegaven mit ünnerscheedliche Wirken:[2]

  • „SPIO/JK prüüft: keen swore Jöögdgefohr“. En Medium mit dit Kennteken dröff, so as en Titel mit FSK af 18 bit to en möögliche Indizeeren dör de Bundsprüfsteed för jöödggefährden Medien (BPjM) apen in’n Hannel utstellt warrn. De Verkoop is blots an Lüüd över 18 Johren verlööft.
  • „SPIO/JK prüüft: straafrechtlich nich bedenklich“. So en Medium hett automaatsch Oplagen na § 15 JuSchG Abs. 1 Nr. 1–7; dat bedüüt, dat de SPIO vun en swore Jöögdgefohr utgeiht. Dormit dröff dat Medium nich apen in’n Hannel utstellt warrn Blots op afsichtliche Nafraag vun vulljohrige Personen dröff dat Medium denn „ünner de Ladentheke“ verköfft warrn un is dormit gliekstellt mit Titels, de op’n Indes staht.

Disse JK-Proven hebbt den Charakter vun en privat juristisch Gootachten un schuult Filmverlehers vör en Straafverfolgen, falls en Gericht en publizeerten Titel wegen en Verstötten gegen dat StGB verbeden deit. In disse Fäll liggt en so nöömten straaflosen Verbottsversehn vör. De Verlehfirma VCL hett to’n Bispeel 1983 den Film The Evil Dead (dt.: Tanz der Teufel) vun de JK prüfen laten, de later wegen Gewaltdorstellen beslagnahmt worrn is. Wenn de Film nicht prüft worrn weer, harrn de Verantwoortlichen vun VCL bestraaft warrn künnt vun wegen Verstöten gegen dat Verbott vun’t Verdreben vun gewaltverherrlichen Medien. En annert Bispeel is de Horrorfilm Hostel: Part II. De SPIO/JK-prüüfte DVD-Faten weeri n’n Juni 2008 dat eerste beslagnahmte Medium mit en JK-Proovteken.

Juristische Gootachten vun disse Oort mööt nich unbedingt vun de Juristenkomisschoon vun de SPIO utstellt warrn. Grundsätzlichen künnt de Gootachters ok een oder mehrere annere Juristen wesen. Medien de vun unafhangige Juristen Prüft worrn sünd, künnt dat Kennteken „juristisch Prüüft“ bargen. Disse Gootachten hebbt de glieke Wirken.

Videospelen[ännern | Bornkood ännern]

De Sülvstkontroll vun de Ünnerhollenssoftware (USK) is in Düütschland verwantwoortlich för de Öllersfreegaav bi Reekner- un Videospelen.De USK vergifft de Öllerskennteken „freegeven af 0 Johren“, „af 6 Johren freegeven“, „af 12 Johren freegeven“, „af 16 Johren freegeven“ un „af 18“. De Instopen sünd in JuSchG § 14 Abs. 2 fastschreven. En Speel, dat keen Öllerskennteken hett, dröff blots an utwassen Personen verköfft warrn.

Öösterriek[ännern | Bornkood ännern]

Kino[ännern | Bornkood ännern]

In Öösterriek warrt Kinofilmen vun de Jöögdmedienkomisschoon vun’t Bundsministerium för Ünnerricht, Kunst un Kultur (BMUKK) begootacht. De prüften Filmen kriegt vun de Komisschoon en Öllersanraden, wobi de folgen Afstopen ünnerscheedt warrt:

  • „Freegeven för all Öllersstopen“
  • „Freegeven af 6 Johren“
  • „Freegeven af 10 Johren“
  • „Freegeven af 12 Johren“
  • „Freegeven af 14 Johren“
  • „Freegeven af 16 Johren“

De Freegaven un de Grünnen för’t Inorden künnt op de Websteed vun’t Ministerium afropen warrn. In’n Vergliek to de düütschen FSK is de Beweerten wat sütjer. Vele Filmen, de in Düütschland eerst af 16 Johren freegeven sünd, sünd in Öösterriek al free af 14 Johren. De Raatslag för’t Öller kann vun de Bundslänner övernahmen aver ok ännert warrn.

Feernsehn[ännern | Bornkood ännern]

Na dat ORF-Gesett un dat för Privatsenner gellen Privatfeernsehgesett is bi Feernsehprogrammen, de de körperliche, geistige oder sittliche Entwickeln vun Minnerjohrige schaden künnen, dör de Wahl vun de Sennentiet oder annere Saken dorför to sorgen, dat Minnerjohrige disse Sennen nich sehn oder hören künnt. Dat nich-verslötelte Utstrahlen vun Programmen, de nich för Kinner un junge Lüüd döögt, mutt dör akustische Teken künnig maakt oder wiel de hele Sennen dör Inblennen vun en optischen Henwies kenntekent warrn.

De dree Senners, överall in Öösterriek keken warrn künnt (ORF 1, ORF 2 un ATV) as ok Puls 4 blennt na disse Vörschrift de hele Tiet över en Warnhenwies blengen jemehr Sennerlogo in, wenn dat Programm nich för junge Lüüd egent is. Bi de ORF-Programmen sünd dat en „X“ för „nich för Kinner“ un „O“ för „Blots för utwassen Peronen“. ATV blennt en „!“ blangen dat Sennerlogo in. Twüschen ORF un de Jöögdmedienkommisschoon gifft dat siet Juli 2001 en Afmaken: De ORF lett verschedene Filmen un Feernsehregen vun de Kommisschoon op jemehr Egen för Kinner un junge Lüüd prüfen. Tosätzlich gifft dat bi’n ORF noch en „K“, dat för „Anraat för Kinner“ steiht.

DVD un Video[ännern | Bornkood ännern]

För disse Oort vun Drägermedien giofft dat in Öösterriek keen Öllersfreegaav. Normalerwies wiest disse Produkten de Freeegaven vun de düütschen FSK, wat aver rechtlich keen Bedüden hett.

Videospelen[ännern | Bornkood ännern]

Ok för Reekner- un Videospelen gifft dat in Öösterriek keen verbindlichen Freegaven. Siet April 2003 warrt Spelen aver mit de Öllersraatslääg vun de Pan-European Game Information (PEGI) kenntekent, de aver nich verbindlich sünd.

Swiez[ännern | Bornkood ännern]

Film un Feernsehn[ännern | Bornkood ännern]

In de Swiez warrt de FSK-Freegaven tomeist övernahmen. In eenige Kantonen warrt to’n Deel aver ok egene Öllersfreegaven fastleggt, de sik mitünner düchtig vun de düütschen FSK-Freegaven ünnerscheedt. To’n Bispeel weer de Kinnerfilm Bäst i Sverige! (dt.: Zwei kleine Helden) vun de FSK ahn Öllersbeschränken freegeven, wiel in de Swiez en Freegaav eerst af 10 Johren gellt.

Videospelen[ännern | Bornkood ännern]

Siet April 2003 warrt Reekner- un Videospelen mit de nich-verbindlichen Freegaven vun de Pan-European Game Information (PEGI) kenntekent. Vörshreven Öllersfreegaven gifft dat aver nich.

Frankriek[ännern | Bornkood ännern]

Film un Video[ännern | Bornkood ännern]

In Frankriek besteiht en Plicht na’t Gesett, dat all filmen vörleggt warrn mööt. De Öllersfreegaven warrt vun de „Commission de Classification des Œuvres Cinematographiques“ fastleggt. In disse Kommisschoon sitt Prüfers vun de Ministerien, Beschäftigte ut de Filmweertschop un Facklüüd ut de Jöögdpsychologie. De tostännige Kultusminister hett aver dat Recht, Freegaven vun de Kommiscchoon to ännern, wat ok faken mol na de sietere Freegaav hen maakt warrt.

Ünnern’n Streek kann een seggen, dat de Öllersfreegaven in Frankriek nich so hard ansett warrt as to’n Bispeel in Düütschland oder in Irland: 70 % vun all Filmen warrt mit de Kennteken Ahn Öllersbeschränken versehn, wo ok vele Filmen mit bi sünd, de in Düütschland eerst af 16 Johren freegeven sünd. De wieteren Stopen sünd in Frankriek „af 12 Johren“, worünner ok Filmen as Rambo: First Blood Part II fallt, de in Düütschland eerst af 18 to sehn sünd, un „af 16 Johren“, wat aver blots bannig roor vergeven warrt.

De gesettliche Plicht to de Vörlaag gellt ok förvt Rebeet Video, wat in de Praxis aver nich stattfinnt.

USA[ännern | Bornkood ännern]

Film un Feernsehn[ännern | Bornkood ännern]

In de USA is de MPAA (Motion Picture Association of America) tostännig, Filmen för Öllersklassen intostopen. De MPAA sett sik tosamen ut Vertreders vun’t Filmgewarf, de Politik, de Weertschop un eenige religionsdemeenschoppen. Aktuell gifft dat de Öllersfreegaven för:

  • G (General Audience: för all Öllersstopen egent)
  • PG (Parental Guidance Suggested: Biwesen vun en Utwassenen warrt anraat)
  • PG-13 (Parents Strongly Cautioned: scharpere Warnen vun PG)
  • R (Restricted: ünner 17 Johren blots in’t Biwesen vun’n Utwassenen)
  • NC-17 (No One 17 And Under Admitted: af 18 Johren; ehmolige Beteken: X, kiek bi X-Rating).

Dat MPAA-System ünnerscheedt sik düütlich vun’t düütsche FSK-System dorin, dat grundsätzlich all Filmen vun Kinner un junge Lüüd sehn warrn drööft unafhangig vun’t Öller. Hööchstens warrt vörschreven oder anraat, dat en utwassen Person togegen wesen mutt. In de Tiet, as dat in de USA noch keen Öllersfreegaven geev, weern all Filmen för all Lüüd freegeven, so lang de Filmen na de Bestimmen vun’n Hay Code weern.

De PG-13-Klass is 1984 op Druck vun de Produzenten vun’n Film Indiana Jones and the Temple of Doom nee inföhrt worrn, üm en betere Afstopen twüschen PG un R to hebben, de to’n een de Schuulintressen vun de Öllern nakummt, to’n annern aver ok de weertschopplichen Intressen vun de Filmweertschop in Acht hollt, vun wegen dat junge Lüüd nun mol nich so faken mit jemehr Öllern in’t Kino gaht, as dat bi de R-Stoop nödig weer.

De Öllersfreegaav dör de MPAA is in de USA nich verbindlich vörschreven. Man, de ökonoomsche Druck föhrt to’t Publizeeren vun de meisten Filmen in’t Kino mit R oder sieter, vun wegen dat nich prüfte Filmen blots vun wenige Kinos wiest warrt un vun vele Medien ok keen Warf dorför maakt warrt. Op VHS oder DVD is dorgegen de nich prüfte Publikatschoon („Unrated“) begäng un normal un hett ok keen inschränkte Warf oder Hannel as Naklapp.

Videospelen[ännern | Bornkood ännern]

Jüst so as in’n groten Deel vun Europa gifft dat in de USA keen verbindlichen Öllersfreegaven för Reekner- un Videospelen. Dat Entertainment Software Rating Board (ESRB) vergifft aver jüst so as de PEGI in Europa nich-verbindliche Raatslääg för’t Öller för de Spelen.

Vereenigt Königriek[ännern | Bornkood ännern]

Film un Feernsehn[ännern | Bornkood ännern]

In Grootbritannien is dat BBFC (British Board of Film Classification) för de Öllersinstopen („Classification“) tostännig. De Stopen sünd as folgt:

  • U (Universal: för all Öllersstopen egent)
  • UC (för Vörschoolkinner egent)
  • PG (Parental Guidance: för jüngere Kinner nich egent)
  • 12A (blots bi Kinofilmen bruukt; ünner 12 Johren, man blots in Begleiten vun en Utwassenen)
  • 12 (af 12 Johren)
  • 15 (af 15 Johren)
  • 18 (af 18 Johren)
  • R18 (Restricted 18: Pornografie; dröff blotd in sünnere Ladens as Sex-Shops verköfft warrn)

Ümdat en Film in’t Vereenigte Königriek verköfft warrn dröff, mutt he en BBFC-Freegaav hebben. De BBFC kann – ok bi en Freegaav af 18 – Zensur un den Snitt vun Szenen verlangen. Lehnt de, de den Film anbeden deit, af den Film to körten, oder ok wenn de BBFC grundsätzlich en Freegaav verseggt, gellt de Film as verboden un dröff nich verköfft warrn.

Hongkong[ännern | Bornkood ännern]

Film un Feernsehn[ännern | Bornkood ännern]

In Hongkong is de Film Censorship Authority (FCA) verantwoortlich för de Öllersfreegaav vun Filmen. De Öllersfreegaven gellt aver nich för den Rest vun China. In Hongkong warrt na veer Kategorien ünnerscheedt:

  • I – Freegeven för all Öllersklassen
  • IIA – Nich för Kinner egent
  • IIB – Nich för Kinner freegeven
  • III – Freegeven af 18 Johren

Warfmaterial, Posters un Verpaken för Filmen, de för Personen af 18 freegeven worrn sünd, mööt vun de FCA prüft un freegeven warrn, vördem se publizeert warrt.

Italien[ännern | Bornkood ännern]

Film un Feernsehn[ännern | Bornkood ännern]

  • T - Freegeven för all Öllersklassen
  • VM14 - Keen Personen ünner 14 Johren tolaten
  • VM18 - Keen Personen ünner 18 Johren tolaten

Japan[ännern | Bornkood ännern]

Film un Feernsehn[ännern | Bornkood ännern]

  • G - För allgemeene Tokiekers
  • PG12 - Kontroll dörch de Öllern för Personen ünner 12 Johren
  • R15 - Keen Personen ünner 15 Johren tolaten
  • R18 - Keen Personen ünner 18 Johren tolaten

Taiwan[ännern | Bornkood ännern]

Film un Feernsehn[ännern | Bornkood ännern]

  • 普遍級, Pǔbiànjí (gröön) – För de Allgemeenheit
  • 保護級, Bǎohùjí (blau) – Nich för Kinner ünner 6 Johren; vun 6–12 Johren blots in’t Biwesen vun Öllern, Schoolmeesters oder Vulljohrige.
  • 輔導級, Fǔdǎojí (geel) – Nich för Kinner ünner 12 Johren; vun 12–18 Johren blots mit Verlööf vun Öllern, Schoolmeesters.
  • 限制級, Xiànzhìjí (root) – Nich för Personen ünner 18 Johren tolaten

De Kennteken warrt normalerwies dör de Afkörten 普, 護, 輔 un 限 tosamen mit de tohören Farv dorstellt.

Weblenken[ännern | Bornkood ännern]

Borns[ännern | Bornkood ännern]

  1. Ne’e Kennteken vun de FSK
  2. Statut vun de Juristenkommisschoon mit Stand vun’n 19. Oktober 2007