Flightplan

Vun Wikipedia
Filmdaten
Plattdüütsch Titel:
Originaltitel: Flightplan
Düütsch Titel: Flightplan – Ohne jede Spur
Produkschoonsland: Düütschland un Verenigten Staten vun Amerika
Johr vun’t Rutkamen: 2005
Läng: 94 Minuten
Originalspraak: Engelsch
Öllersfreegaav in Düütschland: FSK 12
Filmkru
Speelbaas: Robert Schwentke
Dreihbook: Peter A. Dowling
Billy Ray
Produkschoon: Brian Grazer
Musik: James Horner
Kamera: Florian Ballhaus
Snitt: Thom Noble
Szenenbild: Alec Hammond
Kledaasch: Susan Lyall
Dorstellers

Fligthplan (op plattdüütsch so veel as „Flaagplaan“; dt. Titel: Fluchtplan – Ohne jede Spur) is de Titel vun en düütsch-US-amerikaanschen Thriller ut dat Johr 2005. De Hööftrullen speelt Jodie Foster un Peter Sarsgaard. Speelbaas weer Robert Schwentke. Produzeert worrn is de Film vun de Studios Touchstone Pictures un Imagine Entertainment.

Inholt[ännern | Bornkood ännern]

Kyle Pratt is en Ingenieursche, de Driefwarken för Flegers konstrueert. Ehr Ehmann is bi en Unfall ümkamen un so beslutt se mit ehr Dochter Julia ut Düütschland weg torüch in de USA to gahn. Se fleegt mit en (fiktiev) E-474. As de Fleger ünnerwegens is, slöpt Kyle in. As se wedder waak warrt, is ehr Dochter nich mehr dor. Se fraagt annere Passageren un dat Flegerpersonal, aver nümms hett de lütte Deern sehn un nümms schient markt to hebben, dat se mit ehr Dochter an Boord weer. Op er Drammen hen, gifft de Flaag-Kaptein de Anwiesen, dat de Flaagbegleiders un ok de Sky Marshall Gene Carson den Fleger na de Deern afsöken schüllt.

De Söök verlöpt ahn Spood, un mit de Tiet kummt bi dat Personal de Ve5rdacht op, dat de Deern gor nich an Boord wesen is. De Passageerlist warrt kontrolleert, man de beseggt, dat de Sitt blangne Kyle leddig weer. De Mudder warrt jümmer opregter un foddert, dat de Frachtruum ünnersöcht warrn mutt. Ut Grünnen vun de Sekerheit, lett sik de Kaptein dorop aver nich in. Över Funk kriggt dat Personal de Informatschoon, dat Julia tosamen mit Kyle ehrn Ehmann doodbleven is, as de sik ümbröcht hett. För dat Personal sütt dat so ut, as weer Kyle mit ehrn Verlust nich kloor kamen un billt sik in, dat ehr Dochter jümmer noch bi ehr is. All snackt op ehr in un ok en Therapeutsche, de an Boord is, snackt ehr to. Kort vördem se sülvst glöven deit, dat se Wahnvörstellen hett, sütt se an de Schiev en Hart, dat Julia dorhen maalt harr. Se is övertüügt, dat ehr Dochter noch leevt un ennerworrns an Boord wesen mutt.

Intwüschen warrt se aver vun den Sky Marshall an de korten Lien hollen, vunwegen dat se mit ehr Söök al de annern Passageren verrückt maken deit. Ünner annern verdächtigt se en araabschen Mann, dat se em in Berlin al mol sehn hett un he achter den Roov steken deit. Mit Hülp vun ehr technisch Weten över den Fleger simuleert se en Luftdruckaffall un lööst dat Rutfallen vun de Suerstoffmasken ut. In de Kopplosigkeit kann se utneihn un kummt in’n Frachtruum, woneem se na ehr Dochter söcht. Carson finnt ehr aver un leggt ehr nu Handschellen an, dat se keen Blödsinn mehr maken kann. In de Twüschentiet sett de Kaptein to en Twüschenlannen in Neefundland an, üm Kyle lostowarrn. Nu stellt sik aver rut, dat in Wohrheit de Sky Marshall un een vun de Stewardessen en Erpessung plaant hebbt un se dat Kind benüsselt in’n Avionik-Ruum versteken hebbt, ümdat Kyle denn as psychopaathsche Verbrekersche dorsteiht.

Carson övertüügt den Kaptein, dat Kyle en Flegerroov plaant hett un se 50 Millionen Dollar Löösgeld foddert hett. Wenn dat Geld nich kummt, wull se en Sprengsatz tünnern, de in’n Avionik-Ruum versteken is. De Kaptein geiht op de Foddern in, üm den Fleger nich in Gefohr to bringen. As Kyle wedder mit den Kaptein tosamendrapen deit, hett he de Snuut vull un snackt ehr op at Löösgeld an. Nu warrt Kyle de Wohrheit kloort, dat Carson dorachter stickt. De Fleger warrt rüümt un all Passageren un dat hele Personal mööt rut gahn. Man, Kyle kann dorför sorgen, dat Carson an Boord blieven mutt. Mit en Füürlöscher kann se den Sky Marshall överwinnen un jüst so ok de Stewardess. So kriggt se den Utlöser för den Sprengsatz in de Hannen. Se finnt ehr bewusstlose Dochter in den eenzigen Ruum, in den se noch nich weer: in’n Avionik-Ruum. Opletzt tünnert se de Sprengladung un bringt so Carson üm, de vörher noch togeven hett, dat he ehrn Ehmann an de Siet maakt harr un se wegen ehr Weten üm de Flegers as Opper utsöcht weer. Se kummt na de Explosion mit ehr Dochter na buten un warrt dor vun den verbaasten Kaptein andrapen, de sik dorophen bi ehr entschulligen deit.

Kritik[ännern | Bornkood ännern]

De Kritiken weern teemlich mischt. Ofschoonst dat Loov för de Schauspelers geev, weer de Geschicht tomeist as nich to glöven afdoon.

  • De Berliner Morgenpost schreev, dat de Film över wiete Strecken teemlich spannend weer, wat för allen an dat Speel vun Jodie Foster un de Kameraarbeit vun Florian Ballhaus liggen de. Dat Dreihbook dorgegen möök düchtig Loopings, de keen Fleger vun disse Grött mitmaken künn. Kritiseert weer vör allen de Ümgang mit den araabschen ‚Verdächtigen‘ an’t Enn, wat en Fall för de UNO weer.
  • Der Tagesspiegel meen, dat de Film in de eersten Hälft veel verspreken de un as intensiven Psychothriller losgüng un en poor unvermoodt Wennen harr so as Hitchcock sien „Eine Dame verschwindet“. Man, denn schien dat as harr man ut de opboeten Spannung twüschen de Paranoia vun en Fro un en mööglich Verbreken blots noch en Nootutstieg över Actioninale funnen, dat afsluut nich de glöven weer.
  • Dat Lexikon vun’n internatschonalen Film kritiseer ok den swacken Plot, de as Vörwand för en virtuos inszeneerten Thriller deen, in den sik de Technik vun’n Fleger un vun de Filmmakers as Sinn alleen versülvststännigen deit

Utteken[ännern | Bornkood ännern]

De Film weer tosamen för söven Filmpriesen vörslahn. Uttekent weer he mit twee dorvun:

  • 2006: mit den ASCAP Award in de Kategorie Tob Box Office Films för James Horner
  • 2006: mit den HPA Award in de Kategorie Outstanding Audio Post – Feature Film för Dave McMoyler, Michael Minkler, Myron Nettinga, Soundelux

Produkschoonsachtergrund[ännern | Bornkood ännern]

De Film baseert op en Infall vun den Dreihbookschriever Peter A. Dowling ut dat Johr 1999. Na de Terroranslääg vun’n 11. September is de Dreihbookschriever Billy Ray dortohalt worrn. Dat Skript is dorna överarbeit worrn, un de Idee, dat Terroristen an Boord wesen schülln, is ut de Geschicht rutnahmen worrn. Schwentke is as Speelbaas nahmen worrn, nadem he sik mit den Thriller Tattoo en Naam maakt harr.

De Dreiharbeiten güngen an’n 20. September 2004 los. Dreiht weer ünner annern in Berlin, Los Angeles un op den Flaaghaven Leipzig/Halle. För den Dreih sünd dusende Statisten bruukt worrn, ünner de sik Schwentke 150 för dat Böverdeck un 300 för dat Hööftdeck vun’n Fleger utsöcht hett.

De gröttste Deel vun de Geschicht speelt an Boord vun den fiktiven Fleger E-474. Dat is de eerste dubbelstöckige Fleger, de as funkschonal Filmset opboet worrn is. De Binnenruum weer 36 m lang. De Samtlang vun de Kebien weer 75 m lang un is vun en högeret Grundgerüst vun 100 m Läng stbiliseert worrn. Ok dat Cokcpit weer för de Dreiharbeiten konstrueert. De Trickeffekten hebbt den Fleger mitinslaten, de alleen dör künstliche CGI-OPnahmen realiseert worrn. Butendem is en Modell vun de E-474 in’t Maat 1:10 maakt worrn, dat an en Gerüst in de Luft böhrt warrn künn. So künn ut verscheden Winkels filmt warrn, üm den Start un dat Lannen to simuleren.

De Film is an’n 23. September 2005 in de USA anlopen un hett dor an’t eerste Wekenenn 24,6 Millionen US-Dollar inspeelt. Twee Weken lang weer de Film op’n eersten Platz vun de US-Kinocharts. In Düütschland lööp de Film toeerst an’n 20. Oktober 2005 un hett ok hier dree Weken lang de Kinocharts anföhrt.

Amerikaansche Flaagpersonal-Verbännen hebbt in de USA to’n Boykott vun den Thriller opropen, vun wegen dat de Geschicht keen goot Licht op dat Personal an Boord smieten de. In Anlehnen an den Flegerroov un de Attendaten op dat World Trade Center un dat Pentagon in’t Johr 2001 weer man bang, dat de Film Misstroen bi de Flaaggäst tügen künn.

Weblenken[ännern | Bornkood ännern]