Clint Eastwood

Vun Wikipedia
Wesseln na: Navigatschoon, Söök
Clint Eastwood in’t Johr 2005

Clinton Eastwood jr. (* 31. Mai 1930 in San Francisco, Kalifornien, USA) is en US-amerikaansche Schauspeler, Filmproduzent, Speelbaas, Komponist un Politiker.

Clint Eastwood weer johrelang ünner de spoodrieksten Schauspelers in de helen Welt, bekannt as Western- un Actionheld, de tomeist wenig snacken de. Eastwood tellt vundaag to de beropensten un renomeertsten Filmspeelbasen un -produzenten. He hett – 1993 un 2005 – tweemol den Oscar as Besten Speelbaas kregen un weer as Produzent togliek beid mol ok mit den Oscar för den Besten Film ehrt.

Leven[ännern | Bornkood ännern]

Clint Eastwood weer boren as Söhn vun den Bookholler Clinton Eastwood un sien Fro Ruth. Wiel de Tiet vun de „Great Depression“ weer sien Vadder dwungen, as Tankwart to arbeiden un töög mit sien Familie dör dat Land op de Söök na Arbeit. Clint hett tietwies bi sien Oma wahnt, de in Sunol en Höhnerhoff bedreven hett. Opletzt hett sik de Familie in Oakland daallaten. Eastwood, de as en beten in sik torüchtogen un schüchtern gellt hett, hett teihn verscheeden Scholen besocht un hett 1948 denn sien College-Studium afbroken. Ünner annern hett he as Holtfäller, Tankwart un Lagerarbeiter sien Geld verdeent.

1951 is Eastwood in de US Army intogen worrn un weer na Ford Ord versett, woneem he twee Johr lang as Swemmschoolmeester arbeit hett. As Soldat hett he David Janssen kennen lehrt, de later den David Kimble in de Reeg The Fugitive speelt hett. Janssen hett den goot utsehnden un athletischen Eastwood vörslahn, he schüll dat mol as Schauspeler in Hollywood versöken.

Vun 1953 bit 1980 weer Eastwood mit Maggie Johnson verheiraadt un harr mit ehr twee Kinner: Kyle Eastwood (*1968) de as Jazz-Bassspeeler Spood hett un Alison Eastwood (*1972), de ok Schauspeel maken deit un in en poor Filmen vun ehr’n Vadder to sehn weer.

Twüschen 1975 un 1988 hett Eastwood mit de Schauspelersche Sondra Locke tohopen leevt, de in disse Tiet in söss vun sien Filmen mitspeelt hett. 1996 hett he in tweete Eh de Feernsehjournalistin Dia Ruiz (*1965) heiraadt un is in’t sülve Johr Vadder vun sien Dochter Morgan woorn. Ut sien Ehn un Leevschoppen hett Eastwood tohopen fief Döchter un twee Söhnen.

Eastwood hett 1986 op sik opmarksom maakt, as he sik in sien Heimatoort Carmel to’n Börgermeester wählen laten hett. Dissen Posten hett he bit 1988 utövt. Eastwood is Liddmaat vun de Republikaansche Partei un hett ünner annern de Kandidaturen vun Richard Nixon un Ronald Reagan to’n Präsidenten ünnerstütt. Ofschoonst he den Irakkrieg aflohnen de un dat för en groten Fehler hollen deit, gellt he liekers ok as Ünnerstütter vun Präsident Georg W. Bush. Eastwood gellt as stark harthörig, liekers driggt he vör all Lüüd keen Hörapparat, wovun sik toletzt ok de Reporters bi de Pressekonferenz op de 57. Berlinale övertügen kunnen.

Wark[ännern | Bornkood ännern]

De Anfäng[ännern | Bornkood ännern]

Mitt vun de 1950er Johren hett Eastwood bi Universal Pictures vörsnackt un dor en poor Proovopnahmen maakt. dor kreeg he toeerst en Verdrag vör’n half Johr un Schauspelünnericht. Af 1955 harr he toeerst ganz lütte Rullen, as to’n Bispeel in den Monsterfilm Revenge of the Creature, wo he as Laborassistent to sehn weer. In den Horrorklassiker Tarantula speel he en vun de Piloten, welke de muteerte Riesenspinn mit Napalm bombadeert hebbt – achter sien Pilotenmask weer he aver nich mol künnig to maken. Ok in’t Feernsehn harr he to de Tiet lüttere Rullen.

As sien Verdrag 1957 vun Universal nich verlängert worrn is, müss Eastwood denn eerstmol wedder as Swemmschoolmeester arbeiten. He keem finanziell in Not, as sien Fro denn ok noch eernsthaft krank weer. In dat Johr weer he för korte Tiet bi de Filmsellschop RKO Pictures ünner Verdrag, de sik kort dorna aver ut dat Filmgewarf torüchtöög. 1959 keem he denn bi’t Feernsehn ünner un hett dor in de langtietige Westernreeg Rawhide (dt.: Tausend Meilen Staub) den Cowboy Rowdy Yates speelt. Bit 1965 speel he disse Rull in 217 Folgen.

De Dörbrook[ännern | Bornkood ännern]

De italiensche Speelbass Sergio Leone weer 1964 an’t rüsten för sien Western Per un pugno di dollari (dt.: Für eine Handvoll Dollar), de he mit wenig Penunsen ümsetten müss. Dat Geld reck nich för en vun de groten Hollywood-Stars as Henry Fonda oder James Coburn, so dat sik Leone na en anneren Schauspeler ümkieken müss, denn he ok betahlen künn. Dorbi keem he op den Feernsehschauspeler Eastwood, den he anvn End för 15.000 US-Dollar ünner Verdrag nöhm. He speelt dorin en Aventüerer, de sik in en lütte Stadt bi twee Clans, de in’n Striet leegt, as Revolerschütt anbüdd, üm jem beid gegenenanner uttospelen.

De Film gell toeerst as fraagwöördig un weer vun de Kritikers slecht maakt oder gor nich eerst acht. Man, de Film harr in de Kinos bannig veel Spood un bröch unvermodens veel Geld in. Dormit füng de Bülg vun de Italo-Western in de 1960er Johren an, de eenige Hunnert Filmen tostannen brocht hett. In de Rull as zyynsch Frömden ahn Naam, de in en Poncho sien Gegners anmakend lösig gegenöverpeddt, steeg Eastwood op to en Ikone vun de Popkultur. Tallriek Westerndorstellers hebbt sik in de nafolgend Johren an dissen Charaktertyyp orienteert.

In den Nafolgerfilm Per qualche dollaro in più (dt.: Für ein paar Dollar mehr) speel Eastwood noch mol en nich raseerten Revolerheld un Koppgeldjager, de tohopen mit en „Kolleeg“ en Gaunerbande utbörden deit. De finanzielle Spood vun den Film geev Leone de Möglichkeit 1966 den opwännigen Western Il Buono, il brutto, il cattivo (dt.: Zwei glorreiche Halunken) ümtosetten. Al wedder weer Eastwood in’n Poncho as Koppgeldjager to sehn un möök sik op de Jadg na en Goldschatz, de in’n Börgerkrieg verloren gahn weer. Leones drüdde Western weer en düchtigen Kassenspood un is över de Johren to en geern sehn Kultfilm worrn. In de Internet Movie Database warrt he an’n veerte Steed in de List vun de Besten Filme föhrt un gellt dor as de beste Western, de jemols dreiht worrn is (Stand: Dezember 2007).

Man, na „Per qualche dollaro in più“ weern sik Leone un sien Hööftdorsteller Eastwood nich mehr ganz gröön, so dat sik de Speelbaas för sien neegsten Film Once Upon a Time in the West (dt.: Spiel mir das Lied vom Tod) Charles Bronson as ne’en Hööftdorsteller söcht hett. Man vör Leones Dood 1990 hebbt sik beid woll wedder verdragen. 1992 hett Eastwood den Film Unforgiven ünner annern ok in Leones Andenken dreiht.

Spood in Hollywood[ännern | Bornkood ännern]

Ofschoonst Clint Eastwood dör sien Italowesterns teemlich populär worrn is, hett dat en ganze Tiet duert, bit he ok in sien Heimatland as Schauspeler Foot faten künn. De grote Spood vun „Per qualche dollaro in più“ hett dat denn aver möglich maakt, dat Eastwood sik ok in Hollywood dörsetten künn.

1968 speel he in den Western Hang ’Em High en angeevlichen Veehdeef, de jüst so even an sien Henrichten vörbikummt. In’t glieke Johr güng sien spoodriek Tosamenarbeit mit den Speelbaas Don Siegel los: In den Actionkrimi Coogan’s Bluff stell he en Provinzsheriff dor, de in New York Schandaal möök. Kummedie-Andelen wies Eastwood ok in den Western Two Mules for Sister Sara, in den he gegen sien Willen Opasser för en vörgeevliche Nonn speelen de. In’t Westernmusical Paint Your Wagon speel he sogor en singenden Goldsöker.

Ofschoonst he End vun de 1960er Johren as groten Star al düchtig bekannt weer, leet he de Hööftrull in den Kriegsfilm Where Eagles Dare vör sien Kollegen Richard Burton. In den Actionfilm sünd de beiden in en Alleengang gegen de düütsche Wehrmacht to sehn. Ok in den Film Kelly’s Heroes speel Eastwood en Actionsheld in’n Tweeten Weltkrieg. Ok de beiden Filmen harrn groten Spood.

1968 hett Eastwood sien Filmprodukschoonssellschop Malpaso Production grünnt.

De 1970er un 1980er Johren[ännern | Bornkood ännern]

De endgelltige Dörbrook, de em to’n Superstar maakt hett, keem Afang vun de 1970er Johren. Ünner Speelbaas Don Siegel speel he 1971 de Titelrull in den Film Dirty Harry. Dor is he de Polizeiinspekter Harry Callahan, de in San Francisco en psychopaatheschen Reegenmöörder jagt. De Film harr ok düchtig Spood un hett ut de Figur Dirty Harry en ne’e Kultfigur maakt, man dat geev veel Diskussion üm den Film, wieldat Eastwood dorin mit twiefelhafte Methoden gegen Verbrekers vörgeiht.

Eastwood tellt nu lange Tiet to de spoodrieksten Filmschauspelers. 1973 un 1976 weer he nochmol in de Rull as Dirty Harry to sehn un speel Rullen in verscheeden Actionfilmen un Western op. In de Actionkummedie Every Which Way But Loose, de ok veel Spood harr, speel he an de Siet vun en unberekenboren Orang-Utan. En letzt mol ünner Don Siegel speel Eastwood 1979 in den Gefängnisthriller Escape from Alcatraz, wo he den Utbreker Frank Morris dorstell, den eenzigen Fangenen, de dat henkregen hett, vun’t Gefängniseiland Alcatraz uttoneihn.

Eastwood hett 1971 mit den Psychothriller Play Misty for Me de Regie övernahmen. Dorna hett he ünner annern den laten Western The Outlaw Josey Wales ümsett, wo he en ehmoligen Buern speelt, den sien Familie ümbrocht worrn is. Wiel sien Anliggen, dorför Torüchtobetahlen, dörleevt he en epische Odyssee. De Film gellt as Klassiker in sien Genre. Butendem weer Eastwood Speelbaas bi eenige Actionenfilmen.

Ok in de 1980er Johren speel Eastwood faken in Western un Actionfilmen, un faken weer he gliektietig ok Speelbaas. So speel he 1982 in Firefox en Kamppiloten, de en russ’schen Jet roven deit. In den Actionthriller Tightrope jagt he en Reegenmöörder in New Orleans (mit sien dormols twölfjohren Dochter Allison Eastwood in een vun de Hööftrullen). Mit Pale Rider hett he 1985 ok noch mol en Western dreiht, un twee wietere irty-Harry-Filmen keemen in de 19080er Johren ok rut.

As Speelbaas weer Eastwood to de Tiet jümmer mehr an künstlerische Warken intresseert, de nich unbedingt op de Massen an Tokiekers af weern. Sien Spood as Action-Star hebbt em de Freeheit inbrocht, lüttere Filmen as Bronco Billy oder Honkytonk Man mit sien Söhn Kyle un Alexa Kenin to maken, in de he den American Way of Life achterfragen deit. 1988 hett he de Filmbiografie Bird över dat Leven vun den Jazzmusiker Charly Parker dreiht. De harr nich veele Tokiekers, weer aver vun de Kritik düchtig loovt. Eastwood weer sülvst sien Leven lang groten Anhanger vun’n Jazz un hett af 1980 ok af un an sülvst as Komponist to de Filmmusik mit bidragen.

Enn vun de 1980er Johren is Clint Eastwood in Frankriek mit en Ehren-César för sien Levenswark uttekent worrn.

Dat Laatwark af 1990[ännern | Bornkood ännern]

Clint Eastwood op de Berlinale 2007

Twüschen 1988 un 1990 is de Karriere vun Eastwood en beten inbroken, as he kort na’nanner mehrere finanzielle Flops hett, as Pink Cadillac oder White Hunter Black Heart un annere. Man, dorna künn he sien Loopbahn wedder op de Reeg bringen, wieldat he ok anfüng, de Bandbreed vun sien Rullen to vergröttern un sien egen Öller op sülvstironische Wies de verarbeiten. Siet dem is Eastwood regelmatig in spoodrieke Filmen wo sehn, wat bit dorhen kuum en Schauspeler in dat Öller torecht kregen hett.

1993 hett he in den Thriller In the Line of Fire ünner Wolfgang Petersen as Speelbaas en öllernden Secret Service Agenten speelt, de en Anslag op’n Präsidenten hinnern kann. Dat weer de bit hüüt gröttste finanzielle Spood för Eastwood. Dorvör harr he 1992 ünner egene Regie in den pessimistischen Laatwestern Unforgiven en ehmoligen Revolverhelden speelt un harr dormit bi Tokiekers un Kritikers övermatigen Spood. För dissen Film is he düchtig Acht worrn un weer dorvör ok mit sien eersten beiden Oscars as Speelbaas un as Produzent uttekent. För sien Wark as Filmproduzent weer he 1994 mit den Irving G. Thalberg Memorial Award ehrt.

Siet 1993 hett Clint Eastwood blots noch in Filmen mitspeelt, bi de he ok sülvst Speelbaas weer, so 1993 in A Perfect World blangen Kevin Costner oder 1995 as 65-johrigen romantischen Leevsten vun Meryl Streep in den Film The Bridges of Madison County. In den tweeten Halfpart vun de 1990er Johren produzeer he de beiden Thrillers Absolute Power un True Crime, wovun de tweete Esatwoods gröttste Flop woorn is. Gode Kritiken kreeg he 1997 as Speelbaas vun dat künstlerisch Drama Midnight in the Garden of Good and Evil, in den dat üm de Moord an en Homosexuellen geiht. Sülvst mitspeelt hett he dorin aver nich.

In de Twüschentiet 70 Johr oolt speel Eastwood 2000 in den kummediantischen Speelfilm Space Cowboys en ollen Astronauten, de op sien ollen Daag unvermodens in’n Weltruum flegen mutt. Ok disse Film mit grote Besetten vun wietere Ooltstars haar veel Spood. Jüst so ok 2003 mit dat düstere Drama Mystic River, för den he Speelbaas weer.

2005 weer he de grote Winner vun de Oscar-Verlehen un kreeg dor för sien Boxerinnen-Drama Million Dollar Baby noch mol een Oscar as Beste Speelbaas. Un ok as Mitproduzent weer he ehrt, as ok de Oscar för den Besten Film an dit Wark vergeven weer. Hilary Swank un Morgan Freeman kregen ok Oscars as Beste Hööftdorstellersche btw. Best Nevendorsteller. As Speelbaas hett Eastwood 2006 en groot Projekt ümsett: He dreih twee Filmen öevr en Slacht in’n Pazifikkrieg. Een, Flags of Our Fathers weer ut amerikaansche Sicht anleggt, de annere Letters from Iwo Jima wies de Vörgäng ut japaansche Sicht. De tweete harr grötteren Spood un weer ok för veer Oscars nomineert.

Op de Berlinale 2007 hett Eastwood, de in sien leteten Filmen nich mehr as Dorsteller to sehn weer, ankünnigt ok wieterhen as Speelbaas arbeiten to wullen.

Tosamenfaten[ännern | Bornkood ännern]

Clint Eastwood hett siet 1964 in 44 Filmen de Hööftrull speelt un siet 1968 weer he 21 mol op de List vun de 10 kommerziell spoodrieksten Schauspelers to finnen, de eenmol in’t Johr vun Quigley Publications tosamenstellt warrt. Blots John Wayne is vun disse List noch fakener opföhrt worrn, neemlich 25 mol. Na Quigley weer he twüschen 1972 un 1993 de kommerziell spoodriekste Schauspeler (wenn een de inspeelten Innahmen tohopenrekent).

Opstunns is Clint Eastwood de öllste Speelbaas, de jemols en Oscar för sien Regie kregen hett. As he för Million Dollar Baby ehrt worrn is, weer he 74 Johr. Butendem is he de eenzige Hollywoodstar, de as SPeelbaas un as Produzent tweemol mit den Oscar uttekent worrn is. As Speelbaas is he för sien effektive Arbeit bekannt. Faken slutt he sien Dreiharbeiten fröher af, as dat plant weer. Mit sien 76 Johr weer he experimenteerlustiger as jemols vördem, stell Franz Everschor 2006 in’n film-deenst fast.

Ünner Eastwood as Speelbaas hebbt opstunns acht Schauspelers en Oscar kregen. He hett siet 1971 27 Speelfilmen un dree Feernseh- un Dokumentarfilmen ümsett. Un siet 1982 hett he 21 Speelfimen un veer Dokumentarfilmen produzeert. Bi mehr as 14 Filmen weer he Komponist, Texter oder Singer an de Filmmusik bedeeligt.

Mit de Johren is Eastwood to en vun de populärsten Stars weltwiet worrn un warrt generatschonenövergriepend as Kultfigur un Ikone acht. As stillen Actionheld mit sien markant Gesicht tütt he veel Lüüd an. Bekannt is he vör allen dorför, mit unbewegt Mien zynischen Snack vun sik to geven („Make my Day“, „Do you feel lucky, Punk?“)

Dat Ansehn vun Eastwood as harden Revolverhelden weer vör allen in de 1970er Johren veel diskuteert. De influssrieke Filmkritikerin Pauline Kael hett em regelmatig scharp angrepen un segg sien Filmfiguren en reaktschonär un minschenverachtend Instellen na, wat Eastwood jümmers scharp torüchwiest hett. In’n Loop vun de Johren un mit tonehmend Öller weer sien Rullengestalten aver düüdlich sachter un mit mehr Sülvstironie.

Filmografie (Utwahl)[ännern | Bornkood ännern]

Johr Titel Funkschoon Synchroonsnacker
1955 Revenge of the Creature
dt.: Die Rache des Ungeheuers
Schauspeler  
1955 Tarantula Schauspeler Gerd Duwner
1957 Escapade in Japan
dt.: Verschollen in Japan
Schauspeler  
1964 Per un pugno di dollari
dt.: Für eine Handvoll Dollar
Schauspeler Klaus Kindler
1965 Per qualche dollaro in più
dt.: Für ein paar Dollar mehr
Schauspeler Klaus Kindler
1966 Il Buono, il brutto, il cattivo
dt.: Zwei glorreiche Halunken
Schauspeler Gert-Günther Hoffmann
1968 Coogan’s Bluff
dt.: Coogans großer Bluff
Schauspeler Michael Cramer
1968 Hang ’Em High
dt.: Hängt ihn höher
Schauspeler Gert-Günther Hoffmann
1968 Where Eagles Dare
dt.: Agenten sterben einsam
Schauspeler Herbert Stass
1969 Kelly’s Heroes
dt.: Stoßtrupp Gold
Schauspeler Michael Chevalier
1969 Paint Your Wagon
dt.: Westwärts zieht der Wind
Schauspeler Rolf Schult
1970 Two Mules for Sister Sara
dt.: Ein Fressen für die Geier
Schauspeler Rolf Schult
1970 Play Misty for Me
dt.: Sadistico
Schauspeler,
Speelbaas
Rolf Schult
1971 Dirty Harry Schauspeler Rolf Schult
1973 Magnum Force
dt.: Dirty Harry II – Callahan
Schauspeler Klaus Kindler
1974 Thunderbolt and Lightfoot
dt.: Den Letzten beißen die Hunde
Schauspeler Klaus Kindler
1974 The Eiger Sanction
dt.: Im Auftrag des Drachen
Schauspeler,
Speelbaas
Michael Cramer
1975 The Outlaw Josey Wales
dt.: Der Texaner
Schauspeler,
Speelbaas
Klaus Kindler
1976 Dirty Harry III – The Enforcer
dt.: Dirty Harry III – Der Unerbittliche
Schauspeler Klaus Kindler
1979 Escape from Alcatraz
dt.: Flucht von Alcatraz
Schauspeler Klaus Kindler
1981 Firefox Schauspeler,
Speelbaas,
Produzent
Klaus Kindler
1983 Sudden Impact
dt.: Dirty Harry kommt zurück
Schauspeler,
Speelbaas,
Produzent
Klaus Kindler
1984 City Heat
dt.: City Heat – Der Bulle und der Schnüffler
Schauspeler Klaus Kindler
1985 Pale Rider
dt.: Pale Rider – Der namenlose Reiter
Schauspeler,
Speelbaas,
Produzent
Klaus Kindler
1986 Heartbreak Ridge Schauspeler,
Speelbaas,
Produzent,
Komponist
Klaus Kindler
1988 The Dead Pool
dt.: Das Todesspiel
Schauspeler Klaus Kindler
1988 Bird Speelbaas,
Produzent
1989 Pink Cadillac Schauspeler Klaus Kindler
1990 White Hunter Black Heart
dt.: Weißer Jäger, schwarzes Herz
Schauspeler,
Speelbaas,
Produzent
Klaus Kindler
1990 The Rookie
dt.: Rookie – Der Anfänger
Schauspeler,
Speelbaas
Klaus Kindler
1992 Unforgiven
dt.: Erbarmungslos
Schauspeler,
Speelbaas,
Produzent
Klaus Kindler
1993 In the Line of Fire
dt.: In the Line of Fire – Die zweite Chance
Schauspeler Klaus Kindler
1995 The Bridges of Madison County
dt.: Die Brücken am Fluss
Schauspeler,
Speelbaas,
Produzent,
Komponist
Klaus Kindler
1997 Absolute Power Schauspeler,
Speelbaas,
Produzent,
Komponist
Klaus Kindler
1999 True Crime
dt.: Ein wahres Verbrechen
Schauspeler,
Speelbaas
Klaus Kindler
2000 Space Cowboys Schauspeler,
Speelbaas,
Produzent
Klaus Kindler
2002 Blood Work Schauspeler,
Speelbaas,
Produzent
Joachim Höppner
2003 Mystic River Speelbaas,
Produzent,
Komponist
2004 Million Dollar Baby Schauspeler,
Speelbaas,
Produzent
Joachim Höppner
2005 Flags of Our Fathers Speelbaas,
Produzent
2006 Letters from Iwo Jima Speelbaas,
Produzent
2008 Changeling Speelbaas,
Produzent,
Komponist
2008 Gran Torino Speelbaas,
Dorsteller,
Produzent
Jochen Striebeck
2009 Invictus
dt.: Invictus – Unbezwungen
Speelbaas,
Produzent,
Komponist
2010 Hereafter
dt.: Hereafter – Das Leben danach
Speelbaas,
Produzent
2011 J. Edgar Speelbaas,
Produzent
2012 Trouble with the Curve
dt.: Back in the Game
Dorsteller,
Produzent
Jochen Striebeck

Utteken[ännern | Bornkood ännern]

Dat Clint Eastwood bannig veel Spood harr mit sien Filmarbeit, kann een ok an sien Filmpriesen sehn. Opstunns is Eastwood mit 98 Filmpriesen ehrt worrn un weer tohopen mehr as 150 mol nomineert. Dorünner sünd ok de wichtigsten Filmpriesen wesen, allen teihn mol weer he för den Oscar nomineert, veer dorvun hett he wunnen un dorto noch en Sünnerutteken:

Ok bi de Golden Globes hett he eenige afrümt. Söven mol weer he nomineert un hett dorvun dree Priesen winnen künnt. Bito is he mit twee Sünnerpries ehrt worrn:

Butendem hett Eastwood weltwiet vele Filmpriese un annere Utteken kregen . En Utwahl dorvun:

Literatur[ännern | Bornkood ännern]

Weblenken[ännern | Bornkood ännern]

Commons-logo.svg Clint Eastwood. Mehr Biller, Videos oder Audiodateien to’t Thema gifft dat bi Wikimedia Commons.