Magnum Force

Vun Wikipedia
Filmdaten
Plattdüütsch Titel:
Originaltitel: Magnum Force
Düütsch Titel: Dirty Harry II – Calahan
Produkschoonsland: USA
Johr vun’t Rutkamen: 1973
Läng: 118 Minuten
Originalspraak: Engelsch
Öllersfreegaav in Düütschland: FSK 16
Filmkru
Speelbaas: Ted Post
Dreihbook: Harry Julian Fink
Rita M. Fink
John Milius
Michael Cimino
Produkschoon: Robert Daley
Musik: Lalo Schifrin
Kamera: Frank Stanley
Snitt: Ferris Webster
Kledaasch: Glenn Wright
Jules Melillo
Dorstellers

Magnum Force (op plattdüütsch so veel as: „Magnum-Gewalt“ – kann in Anlehnen an’t eng. Magnum opus för „Meesterwark“ ok as „Meester-Strietmacht“ interpreteert warrn; dt. Titel: Dirty Harry II – Calahan) is de Titel vun en Actionfilm vun den Speelbaas Ted Post ut dat Johr 1973. Jüst so as in den eersten Deel vun de Filmreeg, speel wedder Clint Eastwood de Hööftrull vun den Polizei-Inspekter Harry Callahan.

Inholt[ännern | Bornkood ännern]

In San Francisco passeert en Reeg vun Moorden, bi de deelwies hoochrangige Verbrekers an de Siet maakt warrt. Bi een vun disse Henrichten blifft ok en Polizist dood, de en Fründ vun Inspekter Harry Callahan weer. Em kummt de Verdacht, dat de Möörders ut de Regen vun’t San Francisco Police Department kamt. Callahan fallt dorbi sünners en Koppel vun junge Motorradpolizisten op, de mit de Lynchmoorden to doon hebben künnen. Bi’n Akschoon gegen de Mafia, de in en blödige Scheeteree ennt, nadem en Unbekannten jem över Telefon wohrschaut hebbt, warrt een vun jem dootschaten. Man Harry glöövt, dat de blots as Buernopper deen, üm den Verdacht vun de Grupp aftolenken. Den Bewies för sien Theorie finnt he bi en Scheetwettstriet vun de Polizei, bi den he sik de Deenstwapen vun een vun de Kollegen, de he in Verdacht hett, utleht un later de Kugel, de he afschaten hett, mit de verglieken lett, de an de Daatöörd funnen weern. Dorbi kummt rut, dat se ut de glieken Wapen kamt.

Kort na den Wettstriet nimmt de Polizei-Bande Kuntakt op to Callahan un foddert em op, bi jem mittomaken. He lehnt af un finnt dorophen en Bomb in sien Breefkasten. He markt dat noch rechttietig un kann de Bomb afstellen. Man, he kriggt dat nich mehr rechttietig hen, sien Partner to wohrschauen. De warrt dat Opper vun de Bomb. Callahan sien Baas, Lt. Briggs, holt em persönlich af un lett em dat Auto fohren, vunwegen dat he sik de Bomb nauer ankieken will, de he sekerstellt hett.

Op’n Weg in’t Police Department drauht Briggs em denn aver mit sien Revolver un gifft em so to verstahn, dat he mit de legen Motorrad-Cops ünner een Deek steken deit. De Bande folgt jem intwüschen ok al op jemehr Motorrööd. Callahan kummt Briggs aver bi un kann em wiel de Fohrt ut dat Auto smieten. Bi de Verfolgungsjagd, de bit in’n Haven föhrt, kamt de annern Lüüd vun de Motorrad-Bande na un na üm. As he torüch na sien Auto geiht, steiht wedder Briggs vör em un richt sien Wapen op em. As he instiggt, vertellt he Callahan, dat he em de Schuld för de Moorden un för den Dood vun de Polizisten anlasten warrt. Wegen den Roop vun em as „Dirty Harry“ warrt man em dat ok glöven. Man, Briggs kummt dormit nich dör: heemlich harr Callahan de Bomb ut sien Breefkasten wedder scharp maakt un in’t Auto versteken. De Bomb explodeert un ritt Briggs in’n Dood.

Kritik[ännern | Bornkood ännern]

  • Martin Soyka schreev op filmstarts.de, dat de Film al vun sien Thema her nich an den Vörgängerfilm ranrecken künn. Güng dat in’n eerstehn Film noch üm de vigeliensche Fraag: „dröff man en Verbreker Gewalt andoon, wenn dat dorüm geiht, en Minschenleven to redden?“ geiht dat hier blots noch dorüm, wat de Polizist de Legen finnen un utschalten kann. De Geschicht geev faken Grund för en ordige Scheeteree, op wat een vun so en Film man ok luren de. Dormit weer dat Klassenteel vun den Film raakt worrn.[1]

Achtergrund[ännern | Bornkood ännern]

As Speelbaas weer toeerst Clint Eastwood sülvst vörsehn, de aver aflehnt hett.

Anners wat[ännern | Bornkood ännern]

In’t Fröhjohr 1974 is dat to en sünners gresigen Roovmoord kamen, de de Apentlichkeit vun de USA schockeert hett. Dree US-amerikaansche Soldaten hebbt en Hi-Fi-Laden överfallen un dorbi fief Börgen nahmen. Se hebbt de Börgen dwungen Rohrreiniger to drinken. Dree vun de Börgen sünd doodbleven. Twee vun de Verbrekers hebbt vör Gericht utseggt, dat se jümmer wedder den Film Magnum Force sehn harrn, in den ok en Szeen binnen weer, wo en Fro dwungen warrt fletigen Afflussreinige to drinken un dorbi doodblifft[2][3]. De beiden Hööftdäders weern to’n Dood veroordeelt un henricht.

Borns[ännern | Bornkood ännern]

  1. Filmkritik op filmstarts.de, afropen an’n 25. April 2014
  2. Gary Kinder: Victim: The Other Side of Murder, 1982, Dell Publishin, ISBN 0-385-29105-1
  3. John Douglas, Mark Olshaker: The Anatomy of Motive: The FBI’s Legendary Mindhunter Explores the Key to Understanding and Catching Violent Criminals, 1999, Scribner, ISBN 0-684-84598-9

Weblenken[ännern | Bornkood ännern]