Wümm (Dörp)

Wapen/Flagg	Koort
Basisdaten
Bundsland: Neddersassen Landkreis: Horborg Samtgemeen: Töst Gemeen: Wist
Inwahners:
Postleettall:	21255
Vörwahl:	04182
Geograafsche Laag:	53° 15′ N, 9° 37′ O

Wümm (hoochdüütsch Wümme) is en Dörp in de Gemeen Wist (Samtgemeen Töst) in’n Landkreis Horborg, Neddersassen.

Geografie

Dör dat Dörp Wümm flütt de Wümm un de Oost dör, de hier blots en poor hunnert Meter uteneen sünd. Later flütt de Wümm aver na de Werser hen un de Oost na de Elv. Dat Rebeed billt also de Waterscheed twüschen Elv un Werser. Na Westen to liggt dat Naturschuulrebeed Ekelmoor.

De Naveröörd sünd Avensermoor in’n Noorden, Wist in’n Noordoosten, Töst-Land, Riepshoff un Dreehusen in’n Oosten, Königsmoor in’n Süüdoosten, Stemmerfeld un Stemmen in’n Süüdwesten un Kalf un Zittens in’n Noordwesten.

Een von de Hüüs in Wümm liggt as Exklaav in dat Rebeed von de Gemeen Töst (Oortsdeel Töst-Land).

Historie

Verwaltungsgeschicht

De Oort hett vör 1852 to de Vaagdie Töst in dat Amt Horborg tohöört. 1852 is de Vaagdie Töst in dat Amt Mesborg wesselt, dat 1859 denn in dat Amt Töst ümwannelt worrn is. Na 1885 weer dat in’n Kreis Horborg. 1932 is dat Deel von’n ne’en, grötteren Kreis Horborg worrn.

Wümm is siet dat 19. Johrhunnert Deel von de Gemeen Wist.

Inwahnertall

Johr	Inwahners
1848-00-001848	65 Lüüd, 9 Hüüs
1871-12-011. Dezember 1871	120 Lüüd, 18 Hüüs

Religion

Wümm is evangeelsch-luthersch präägt un höört to dat Kaspel von de Johannes-de-Döper-Kark in Töst.

För de Kathoolschen is de Hillig-Hart-Kark in Töst tostännig, de siet 1. November 2014 to de Karkengemeen St. Petrus in Bookholt tohöört.

Kultur

Verenen

De Laienspeelgrupp Wümm-Königsmoor is an’n 21. Dezember 1948 grünnt worrn.

Weertschop un Infrastruktur

Verkehr

Wümm liggt an de Bundsstraat 75, de in’n Süüdwesten na Lauenbrüch, Scheeßel un Rodenborg löppt un in’n Noordoosten na Wist, Töst un Bookholt. Na Süüdoosten geiht von de B 75 de Kreisstraat 23 af, de över Königsmoor na Wessloh löppt.

De nächste Autobahn is de Autobahn 1 (Afsnidd Hamborg–Bremen). De Opfohrt 46 Heidenau liggt so 15 Kilometer in’n Noordoosten von Wümm.

De nächsten Bahnhööv sünd so bi negen Kilometer weg an de Bahnlien Hamborg–Bremen de Bahnhoff Lauenbrüch in’n Süüdwesten un de Bahnhoff Töst in’n Noordoosten.

Scholen

De Kinner ut Wümm gaht na de Grundschool Wist. Na de Grundschool gaht de Kinner normalerwies in Töst na School, op de Hauptschool Töst, de Realschool Töst oder dat Gymnasium Töst.

Literatur

• Grete Matthies, Walter Bostelmann: Wistedt, Quellen, Wümme: Geschichte und Geschichten. 1990