Vulkan (Film)

Vun Wikipedia
Zur Navigation springen Zur Suche springen
Filmdaten
Plattdüütsch Titel:
Originaltitel: Vulkan
Düütsch Titel: Vulkan
Produkschoonsland: Düütschland
Johr vun’t Rutkamen: 2009
Läng: 180 Minuten
Originalspraak: Düütsch
Öllersfreegaav in Düütschland: FSK 12
Filmkru
Speelbaas: Uwe Janson
Dreihbook: Alexander M. Rümelin
Produkschoon: Sebastian Werninger
Nikolaus Krämer
Musik: Nikolaus Glowna
Siggi Mueller
Kamera: Philipp Sichler
Snitt: Florian Drechsler
Günter Heinzel
Szenenbild: Matthias Kammermeier
Kledaasch: Julia Hillerich
Dorstellers

Vulkan is de Titel vun en düütschen Katastrophenfilm ut at Johr 2009, de as tweedeeligen Feernsehfilm vun RTL an’n 18. un 19. Oktober 2009 to’n eersten mol wiest worrn is. Dat Dreihbook is vun Alexander M. Rümelin schreven worrn un baseert op en Infall un Geschicht vun Nikolaus Krämer. Produzeert weer de Film vun Zen Productions un teamWorx, in de Hööftrullen spelen Matthias Koeberlin, Katharina Wackernagel un Yvonne Catterfeld.

Inholt[ännern | Bornkood ännern]

De Film befaat sik mit dat Utbreken vun en Vulkan in de Eifel un woans de Inwahners vun de fiktiven Stadt Lorchheim eerst nich wohrhebben wüllt, dat en Katastrooph op jem daal kummt un naher openanner losgaht, as dat üm jemehr Överleven geiht. In’n eersten Deel warrt de Figuren mit jemehr Alldags-Lasten vörstellt, wiel de tweete Deel de Katastrooph un ehr Utwirken.

Lorchheim is en Oort in de Neeg vun’n Lorchheimer See, in den Gasblasen vun’n Grund opstiegen doot. Dör dat Gas fallt sogor en Swemmersche in Ahnmacht, kort later blifft en hele Hood Schaap doot, as dat Kohlenstoffdioxid in gröttere Mengde ok dör Reten in de Eer opstiggt. Man de Lüüd in Lorchheim sünd veel to dull mit sik sülvst un jemehr Lasten befaat, as dat se marken deen, dat en grote Katastrooph op jem tostüert. Dor sünd to’n Bispeel de jungen Lüüd üm Maggi, de jemehrn Spaaß doran hebbt, den Sünnerling Walter Röhricht, en stäädtschen Ordnunsgbeamten, to veralbern, oder de Bankkoopmann Gerhard Maug, de sien Lasten mit dat Geld hett, vunwegen dat sien Fro un sien Dochter op groten Foot leevt. So hett jeedeen hett sien egen Sorgen, un keeneen maakt sik en Kopp üm den Vulkan.

De Seismoloogsche Damiela Eisenach is de eenzige, de dat Opduken vun Eerdbeven ünner de Eifel eernst nehmen deit un den Verdacht hett, dat de slapene Vulkanismus in dat Rebeet wedder togang kummt. Se fohrt för wietere Ünnersöken in de Eifel un kann den ehmolgen Führwehrmann Michael Gernau vun de Gefohr övertügen. Man, de Börgermeester, de Landraad, de Inwahners un sünners ok de tostännigen Lüüd vun’n Katastrophenschuul geevt nich vel dorop, wat de Wetenschopplersche seggt. Ok nich, as dat eerste gröttere Eerdbeven Schaden bringen deit. As se vun de Gefohr apentlich vertellt kriggt se sik ok noch mit ehrn Professer in de Wull, de op de annern Siet aver so deit, as wenn he sülvst de Ünnersöken vörandreven harr.

Alleen Gernau versöcht de Tostännigen wieter to övertügen. Üm sien Bruut Andrea in Sekerheit to bringen deit he sogor so as wenn he wat vun de Seismoloogsche will. Andrea geiht dorophen na Frankfurt, woneem se studeeren will. De Teken warrt düütlicher un denn blifft sogor en wieteren Swemmer in ’n See doot, as em en hitte Gasblaas tofaten kriggt. Wietere Eerdbeven un Reten duukt in de Eer op. Opletzt künnt ok de Offiziellen de Gefohr nich mehr wegsnacken. Lorchheim schall nu vun de Bundswehr rüümt warrn. Man för en Evakueren is dat al to laat: noch wiel de eerste Konvoi vun Bussen ünnerwegens is, kummt dat to en Explosion in’n See. En hitte Dampwulk breedt sik op’n Slag ut un wült allns daal, wat er in’n Weg kummt. Lorchheim kummt noch goot dorvun af wegen de Laag in en Daal, man, wietere Utbröök folgt un wannelt de Stadt un dat Ümland in en Katastrophenrebeet dat vun Füer un Aschen drapen warrt.

De Krisenstaff tütt sik in en sekere Anlaag torüch, vun wo ut de Reddensarbeiten stüert warrt. Eisenach gifft ehrn wetenschopplichen Raat dorto un helpt de Utwirken vun’n Vulkan to taxeeren. In Lorchheim versöcht Gernau de Överlevenen to organiseeren un in Sekerheit to bringen. Man, de Geföhlen kaakt över, un so kummt dat to Striet un schiere Gewalt ünner de Inwahners. Gernau verstickt sik mit Gerhard un Paula Maug un Röhricht in en Felsenkeller, wiel annere Inwahners sik to Foot op’n Weg maakt, üm ut dat Katastrophenrebeet ruttokamen. De Krisenstaff hett Lorchheim intwüschen al opgeven, wiel Eisenach versöcht, dor noch Redders hentoschicken, vunwegen dat se sik mit Gernau verbunnen föhlt.

Foorts geiht dat aver ok dör de Narichten, wat in de Eifel los is. Andrea Matting maakt sik dorüm op’n Weg in de Eifel üm na Gernau to kieken. Op’n Weg warrt se vun Phil Friedrichs mitnahmen, den sien Fro in de Eifel Urlaub maakt hett. Se umgaht de Stratensparrn un begeevt sik sinnlos in Levensgefohr. Intwüschen warrt de Laag in den Felsenkeller in Lorchheim sworer, as jem dat Water utgeiht. Gernau geiht los, üm Nehrmiddel to halen un höört in de Stadt de Stimm vun Eisenach ut’n Funk vun en Führwehrfohrtüüch. So kann he ehr vertellen woneem se sünd un dat se en Heevschruver schicken schall, wat se op egen Fuust denn ok deit. As de Felsenkeller anfangt mit Lava vulltolopen, künnt se sik jüst noch redden un warrt denn vun den Heevschruver opnahmen. Op’n Weg torüch seht se ut de Luft Matting un Friedrichs, de vun de Lavaströöm inslaten worrn sünd. Gernau bringt den Fleger to’n Lannen, üm ok jem to redden. Man, för den Heevschruver sünd dat to veel Lüüd. Gernau blifft dorüm torüch, dat de annern sik redden künnt. För em sülvst gifft dat keen Hapen mehr – he kummt in de Lava üm.

Kritik[ännern | Bornkood ännern]

De Film is vun de Kritik mit verschedene Ansichten opnahmen worrn. Dat Dorstellen vun de Reakschoon un dat Verhollen vun de Minschen is loovt worrn[1], wiel Welt online schrifft, dat bi den Film keen richtige Spannung opkamen de, man sik de Tokieker schön gruseln künnt[2]. Anners schreev Julian Miller op Quotenmeter.de, de vun den Inholt nich övertüügt weer un över de deelwies maue Dramaturgie klaag. Ok wenn de Film goot ünnerholen de, weern de dorstellten Emotschonen teemlich afgrepen[3].

Utteken[ännern | Bornkood ännern]

De Film weer för twee Feernsehpriesen nomineert, hett aver beide nich winnen künnt:

Achtergrund[ännern | Bornkood ännern]

Deelen vun’n Film sünd in de Eifel ründ üm den Laacher See dreiht worrn. De Öörd, woneem de Film speelt, sünd utdacht. As Kulisse för dat fiktive Lorchheim weer de Stadt Bad Münstereifel nahmen. De Felsenkeller, in den sik eenige Lüüd redden doot, liggt in Mendig, sien Ingang weer aver ok in Bad Münstereifel. All Szenen de op’n See speelt, weern an’t Pulvermaar bi Gillenfeld opnahmen. Dorto kemen verschedene Öörd för Binnenopnahmen, de in Rüüm över Düütschland verdeelt dreiht worrn sünd. De Produkschoon hett alltohopen üm un bi negen Millionen Euro köst. Alleen de Reekner-Effekten hebbt een Million köst.

Dat in de Eifel en Vulkan utbreken künn, is ut geoloogsch Sicht mööglich. De Vulkanfeller gellt noch nich as doot, ofschoonst de letzten Utbröök al mehrere dusend Johren torüch leegt. De Vulkan ünner’n Laacher See harr sien letzten Utbröök to’n Bispeel vör ruchweg 13.000 Johren. In de Geologie is dat en korte Tiet, man dat oder wanneer de Eifel-Vulkanismus wedder aktiv warrt is nich vörrut to seggen.

Borns[ännern | Bornkood ännern]

  1. Vulkan (RTL): Der Weiße Hai im Lava-Bad vun Peter Huber op diepresse.com vun’n 19. Oktober 2009, afropen an’n 20. Oktober 2009
  2. RTL lässt die Eifel in die Luft fliegen| vun Torsten Thissen op Welt online vun’n 16. Oktober 2009; afropen an’n 20.Oktober 2009
  3. Die Kritiker: «Vulkan» von Julian Miller op Quotenmeter.de vun’n 16. Oktober 2009; afropen an’n 20.Oktober 2009
  4. Nomineertenlist vun’n Adolf-Grimme-Pries

Weblenken[ännern | Bornkood ännern]