Copernicium

Copernicium is en künstlich cheemsch Element mit de Atomtall 112 un dat Atomteken Cn. Dat Element tellt to de Transactinoiden un warrt ok as Eka-Quecksülver betekent. Copernicium steiht in de 12. Grupp vun dat Periodensystem un warrt dorüm to de Övergangselementen rekent. Opstunns is över de cheemsch un physikaalsch Egenschoppen noch nich veel bekannt.

Opdecken

Copernicium is an’n 9. Februar 1996 to’n eersten mol tüügt worrn, neemlich bi de Sellschop för Sworionenforschen (GSI) in Darmstadt, de Atomkarns vun Zink un Blie to’n Fusioneeren bröcht hebbt:^[1]

\,_{30}^{70}\mathrm {Zn} +\,_{\ 82}^{208}\mathrm {Pb} \to \,_{112}^{278}\mathrm {Cn} ^{*}\to \,_{112}^{277}\mathrm {Cn} +\,_{0}^{1}\mathrm {n}

Dat Element is an’n 10. Juni 2009 offiziell bestätigt worrn.^[2] De Naam Copernicium, de vun de GSI vörslahn weer, is an’n 19. Februar 2010 annahmen worrn.^[3] Bit dorhen harr dat Element den vörlöpigen Naam Ununbium, wat ut dat latiensche un „een“ un bi „twee“ tosamensett weer un de enkelten Tiffern vun de Tall 112 weddergifft.

Utforschen

Över dat Element is noch nich veel bekannt, wiel eerst en poor wenige Atomen dorvun tüügt worrn sünd, de gau wedder verfallen sünd. Vun de Laag in’t Periodensystem müss Copernicium en Metall wesen, man vun wegen den relativistischen Effekt weer spekuleert, dat sik Cn villicht mehr as en Eddelgas verhollt. Doröver warrt bi de Wetenschopplers aver noch veel diskuteert.

Na Pressemitdeelen vun dat Paul-Scherrer-Institut hebbt de letzten Experimenten wiest, dat sik dat künstliche Element woll doch mehr as en Metall verhollen deit.^[4] De Egenschoppen künnen dorna mit Quecksülver to verglieken wesen.^[5] Man dat Ergeevnis is ok blots vun twee Atomen vun dat Isotop ²⁸³Cn afleidt worrn. Dit Isotop weer tüügt dör Beschuss vun ²⁴²Pu mit ⁴⁸Ca, wobi toeerst ²⁸⁷Fl entsteiht, dat denn dör Alphaverfall in dat beobachte Isotop övergeiht.^[6]

Bornen

↑ S. Hofmann, V. Ninov, F. P. Heßberger, P. Armbruster, H. Folger, G. Münzenberg, H. J. Schött, A. G. Popeko, A. V. Yeremin, S. Saro, R. Janik, M. Leino: "The new element 112", in: Z. Phys. A, 1996, 354, S. 229–230; Abstract.
↑ Chemie: Schwere Jungs aus Hessen Ralf Nestler in Der Tagesspiegel, 11. Juni 2009.
↑ Das neueste Darmstädter Element heißt „Copernicium“ Echo Online, 19. Februar 2010.
↑ Bulletin Nuklearforum Schweiz, 29. Juni 2006, S. 9
↑ Gerber, Beat (31. Mai 2006). Superschweres Element 112 chemisch untersucht – Experimentell auf der Insel der künstlichen Elemente gelandet. Informationsdienst Wissenschaft. Afropen an’n 25. Januar 2009.
↑ R. Eichler et al.: Chemical characterization of element 112. Nature, Vol. 447, 72-75, 3. Mai 2007