Atomtall
De Atomtall gifft in de Chemie un in de Atomphysik an, woveel Protonen sik in en Atomkarn tosamfinnt. As de Protonen positiv opladt sünd, warrt dorto ok Karnladungstall seggt. De Protonentall in den Karn is normalerwies lieks groot as de Elektronentall in de Hüll, as en Atom na buten neutral is. Afkört warrt de Tall mit dat Symbol Z schreven.
Atomen mit de lieke Atomtall höört to dat glieke cheemsch Element und verhollt sik bi cheemsch Reaktschoonen op de lieke Oort un Wies. De Atomtall warrt deswegen ok för dat Inornen in dat Periodensystem bruukt. Wenn dat nipp un nau maakt warrn schall, warrt de Atomtall links ünnen blangen dat Symbol von en Element schreven, t. B.: 6C (Kohlenstoff). Aver normalerwies warrt dat weglaten, wiel dat Element sülvst jo eendüdig mit een Atomtall tohopenhangt.
Atomen, de liek sünd von de Atomtall, aver ünnerscheedliche Massentallen hebbt, warrt as Isotopen betekend. De Ünnerscheed kummt dorvon, dat nich jümmers glieks veel Neutronen in den Atomkarn binnen sünd. De Neutronentall kann man ganz licht utrekent warrn, indem man die Atomtall von de Massentall aftreckt. De Massentall warrt üblicherwies links baven blangen dat Symbol schreven, t. B.: 12C (Kohlenstoff).