Trochel

Wapen/Flagg	Koort
Basisdaten
Bundsland: Neddersassen Landkreis: Rodenborg Samtgemeen: Bootel Gemeen: Brookel
Inwahners:
Postleettall:	27386
Vörwahl:	04266
Geograafsche Laag:	53° 5′ N, 9° 33′ O

De Trochel is en Holt in’n Landkreis Rodenborg un in’n Besitt von de Neddersassischen Landsforsten. Fröher weer dat ok en Riddergood.

Geografie

Dör den Süden von’n Trochel flütt de Wiedau un en Stück na Noorden to flütt de Veers. Dat Good Trochel liggt an’n Trochelbeek, de in de Wiedau münnt.

De Öörd ümto sünd Hemslingen un Söhlingen in’n Oosten, Moordörp in’n Süüdoosten, Bellen, Roosbrook un Nee-Bretel in’n Süden, Bootel in’n Süüdwesten un Brookel in’n Noordwesten.

Historie

Trochel kummt toeerst 1220 as Trochle in en Oorkunn vör, in de de Bischop von dat Bisdom Veern, Iso, dat Lehn över den Hoff Trochel an de Ridders Friedrich un Heinrich von Trochle geven hett.

Fröher weer dat Land vör allen Heid un deelwies Moor. Eerst as dat Good Trochel 1880 in’n Besitt von’n Prüßen övergahn is, is dat Land opforst worrn.

In’n Eersten Weltkrieg sünd 2 Soldaten ut Trochel fullen oder vermisst.

De dree Meter hoge Lustbarg is en oold Hünengraff, dat 1961 wetenschoplich ünnersöcht worrn is.

Bet to Anfang von dat 18. Johrhunnert hett dat in Trochel twee Hööv geven. De Göder hebbt de Familie Zahrenhusen tohöört. Christian von Zahrenhusen is 1702 ahn Söhns doodbleven. Na em hett dat Balthasar von Zahrenhusen kregen. De twee Hööv sünd denn in een tohoopleggt worrn. Dat Good hett en Tied lang toeerst de Familie von Lützow un de Familie Kielmansegg tohöört. De Familie Kielmannsegg hett dat denn an 1762 de Familie Scheither verköfft.

To Anfang von dat 19. Johrhunnert hett dat Good de Familie Lameyer tohöört. Nadem Friedrich Lameyer 1824 doodbleven is, müss sien Weetfro Margaretha, borene Wieting, dat Good 1826 an Kriegsraad von Hattörp verköpen. Dat harr to disse Tied en Grött von 1864 Morgen.

Adolf von Hattörp hett dat Good denn 1876 an den Brennereebesitter Carl Hesse verköfft.

In de Franzosentied von 1810 bet 1814 hett de Oort to de Mairie Rodenborg in’n Kanton Rodenborg höört. Dat Rebeed hett in disse Tied 1810 to dat Königriek Westfalen un von 1811 bet 1814 to dat Franzöösche Kaiserriek ünner Napoleon höört.

De Oort hett vör 1885 to dat Amt Rodenborg in’t fröhere Hertogdom Veern tohöört. Na 1885 weer dat in’n Kreis Rodenborg. 1977 is dat Deel von’n ne’en grötteren Landkreis Rodenborg worrn.

De Oort is later Deel von de Gemeen Brookel worrn.

Inwahnertall

Johr	Inwahners
1812-00-001812	34
1824-00-001824	10 Füürsteden
1848-00-001848	75 Lüüd, 8 Hüüs
1910-12-011. Dezember 1910	33

Religion

Trochel is evangeelsch-luthersch präägt un höört to dat Kaspel von de Hillig-Krüüz-Kark in Brookel.

Kultur

En Denkmaal för de Fullenen ut de twee Weltkrieg’ steiht in Brookel obi de Kark.

Weertschop un Infrastruktur

Verkehr

Dat Good Trochel liggt an de Kreisstraat 210, de in’n Süden över Bellen un Roosbrook bi Visselhöövd an de Bundsstraat 440 ran geiht. In’n Noorden münnt de K 210 in de B 71.

Dör den Noorden von’n Trochel geiht de B 71 dör, de in’n Westen na Heemsbünnen un Rodenborg geiht un in’n Süüdoosten na Neenkerken un Soltau.

Scholen

Kinner ut Trochel gaht op de School an’n Trochel in Brookel na Grundschool. De School hett dissen Naam 2010 kregen.