Trinidad un Tobago

Vun Wikipedia
Republic of Trinidad and Tobago
Republik Trinidad un Tobago
Flagg vun Trinidad un Tobago Wapen vun Trinidad un Tobago
(Flagg) (Wapen)
Wahlspröök: „Together we aspire, together we achieve“
Engelsch, „Tohopen streevt wi, tohopen kriegt wi dat hen“
Natschonalhymne: Forged From The Love of Liberty
Woneem liggt Trinidad un Tobago
Hööftstadt Port-of-Spain
10° 40′ N, 61° 30′ W
Gröttste Stadt Port of Spain
Amtsspraak Engelsch
Regeren
Präsident
Premierminister
Parlamentaarsche Republiek
Paula Mae Weekes
Keith Rowley
Sülvstännigkeit

31. August 1962 vun dat
Vereenigte Königriek

Grött
 • Allens
 • Water (%)
 
5128 km²
? %
Inwahnertall
 • 2020 afschätzt
 • Inwahnerdicht
 
1.399.490[1]
258,2/km²
Geldsoort 1 Trinidad-un-Tobago-Dollar
= 100 Cent ([[ISO 4217|]])
BBP 20.700 Mio. US$ (90.) $ (2007)

15.905 US$ (39.) $ je Kopp

Tietzoon UTC (UTC-4)
Internet-TLD .tt
ISO 3166 TT
Vörwahl ++1 (868) kiek NANP
Koort vun dat Land
Koort vun dat Land

De Republiek Trinidad un Tobago (engelsch Republic of Trinidad and Tobago) is en Inselstaat in den Süüdosten vun de Karibik, vör de Küst vun Venezuela. He besteiht ut twee grote Eilannen un en ganzen Hümpel vun lüttjere Eilannen. De gröttste Insel is Trinidad. Tobago is veel lüttjer un dor wahnt ok minner Lüde up. Beide Inseln höört to de Inseln över den Wind un dor ok to de Lüttjem Antillen mit.

Geschichte[ännern | Bornkood ännern]

Man wenig is bekannt över de Geschichte vun de Eilannen, ehr Christoph Kolumbus jem an'n 31. Juli 1498 funnen hett. He hett Trinidad na de Dreeenigkeit nömmt (up Spaansch: Trinidad). Tobago hett vun em den Naam Bella Forma (schöne Figuur) kregen. Later is de Naam ännert wurrn in Tobago, wohrschienlich hett dat mit den Tabak to doon.

Toeerst hefft de Spaniers sik up de Eilannen ansiedelt, man de Wohnstäen up beide Eilannen weern man minne un schraa. 1652 hett dat Hartogdom Kurland un Semgallen en Kolonie vun de Inseln maakt. De Nedderlannen hefft jem 1655 erovert, man dat duer nich lang un Kurland kreeg jem torüch. In dat 18. Johrhunnert hett dat Königriek Grootbritannien beide Inseln in'e Hand kregen un 1889 sünd se tohopenföögt wurrn to de eene Kolonie Trinidad un Tobago. Na den Tweeten Weltkrieg hefft de USA dor Stüttpunkte för ehre Marine up boot un 1958 sünd de Eilannen as Deel vun de Westindische Föderatschoon unafhängig wurrn. Düsse Bundsstaat is avers slank wedder uplööst wurrn un de unafhängige Natschoon Trinidad un Tobago is 1962 grünnt wurrn. To'n Anfang vun dat 21. Johrhunnert is dat Land een vun de weeligsten Länner in de Karibik. Sunnerlich is dat to danken an den Afbo vun Eerdööl un Eerdgas. Ok de Tourismus schall grötter weern un wasst al, sunnerlich up Tobago.

Geographie[ännern | Bornkood ännern]

Dat Land vun de Eilannen besteiht sunnerlich ut Siedland, man de hööchste Punkt vun dat Land, de El Cerro del Aripo, is doch 940 m hooch. Up de Inseln regeert en Tropenklima mit en Regentied in de tweete Hälfte vun dat Johr. Anners, as annere Eilannen in de Karibische See, hefft Trinidad un Tobago nich veel to kriegen mit Tropenstörme. De Mehrheit vun de Inwahners wahnt up Trinidad. Dor sünd ok de meisten un wichtigsten Städer, un ok de Hööftstadt Port of Spain liggt dor. De gröttste Oort up Tobago is Scarborough.

Wie de Inseln för de Verwaltung indeelt sünd[ännern | Bornkood ännern]

Trinidad un Tobago is för de verwaltung unnerdeelt in negen Regionen, dree Boroughs (Arima, Chaguanas un Point Fortin) un twee Städer (Port of Spain un San Fernando).

Politiek[ännern | Bornkood ännern]

Hööft vun den Staat vun Trinidad un Tobago is de Präsident. De warrt wählt vun dat Parlament. Düt Parlament besteiht ut twee Kammern, dat sünd de Senat mit 31 Sitte un dat Afordentenhuus mit 36 Sitte. De Liddmaten vun den Senat weert beropen dör den Präsidenten un de Afordenten för dat Afordentenhuus weert wählt all fiev Johre vun de Wahlbörgers vun dat Land. De Ministerpräsident, de dat Hööft vun dat Afordentenhuus is, warrt vun den Präsidenten beropen. Normolerwiese is dat de Baas vun de gröttste polietsche Partei.

Inwahners[ännern | Bornkood ännern]

Wie de Inwahnertahl vun Trinidad un Tabago wussen is.

De Inwahners vun Trinidad weert up Nedderlannsch Trinidadianers, man up Düütsch Trinidaders nömmt. De twee gröttsten Inwahnergruppen sünd de Nakamen vun Slaven ut Afrika (39,5 %) und vun Verdragsarbeiders ut Brittsch-Indien (40,3 %). Ut düsse Grupp stammt ok de weltwiet bekannte Schriever un Winner vun den Nobelpries för Literatuur, V.S. Naipaul, de avers midderwielen en Börger vun dat Vereenigte Königriek wurrn is. De Rest vun de Inwahners sünd Minschen vun ganz unnerscheedliche Afkumst.

Gloven[ännern | Bornkood ännern]

Dat gifft verschedene Religionen up Trinidad un Tobago. De beiden gröttsten sünd de Röömsch-kathoolsche Kark un de Hinduismus. De Anglikaansche Kark un de Islam sünd wat minner groot.

Spraken[ännern | Bornkood ännern]

Amstsprake is Engelsch. An’n meisten snackt warrt up de Inseln avers Engelsch-Kreoolsch in unnerscheedliche Dialekte. En lüttjere Antahl vun Hindustaners snackt ok Karibisch Hindustani („Hindi“) in sien lokalen Dialekt. Patois warrt nich mehr veel snackt. De Overheid müch geern, datt de Lüde mehr Spaansch lehrt, vunwegen datt Trinidad un Tobago vör de Küst vun Süüdamerika liggt, wo de Lüde Spaansch snackt.

Kultuur[ännern | Bornkood ännern]

Trinidad un Tobago sünd bekannt as Heimaat vun de Calypso-Musik un ok för de Musik vun de „steel pan“. Vunwegenden unnerscheedlichen Achtergrund in Kultuur un Gloven gifft dat up de Eilannen dör dat ganze Johr hen allerhand Feste un Zeremonien. Dat Tohopenstötten vun de Indische Kultuur mit den Calypso hett de Soca-Musik tostanne bröcht, wat en festlichen Danz-Stil is.

Weertschop[ännern | Bornkood ännern]

De Haben vun de Hööftstadt Port of Spain

Trinidad un Tobago warrt bekeken as boven de Maten goot för Investments vun internatschonale Unnernehmen ut dat Utland. In de lesten veer Johre is sunnerlich de Sektor Eerdgas gau wussen. Ok de Tourismus speelt en Rull, man keen so grote, as up annere Eilannen in de Karibik. De Weertschop profiteert vun en minne Inflatschoon un en överscherigen Hannel.

Belegen[ännern | Bornkood ännern]

  1. https://data.worldbank.org/indicator/SP.POP.TOTL