The Fourth Protocol (Film)

Filmdaten
Plattdüütsch Titel:	—
Originaltitel:	The Fourth Protocol
Düütsch Titel:	Das vierte Protokoll
Produkschoonsland:	Grootbritannien
Johr vun’t Rutkamen:	1987
Läng:	114 Minuten
Originalspraak:	Engelsch
Öllersfreegaav in Düütschland:	FSK 16
Filmkru
Speelbaas:	John Mackenzie
Dreihbook:	Frederick Forsyth George Axelrod Richard Burridge
Produkschoon:	Timothy Burrill
Musik:	Lalo Schifrin
Kamera:	Phil Meheux
Snitt:	Graham Walker
Szenenbild:	Allan Cameron
Kledaasch:	Tiny Nicholls
Dorstellers
Michael Caine: John Preston Pierce Brosnan: Major Petrofsky Ned Beatty: General Borisov / Pavel Petrovich Joanna Cassidy: Irina Vassilieva Julian Glover: Brian Harcout-Smith Michael Gough: Sir Bernard Hemmings Ray McAnally: General Karpov Ian Richardson: Sir Nigel Irvine Anton Rodgers: George Berenson Betsy Brantley: Eileen McWhirter Matt Frewer: Tom McWhirter

The Fourth Protocol (op plattdüütsch so veel as „Dat veerte Protokoll“; dt. Titel: Das vierte Protokoll) is en britischen Thriller ut dat Johr 1987 mit Michael Caine un Pierce Brosnan. De Titel baseert op en fiktiv geheem Tosatzprotokoll to’n Atomwapensparrverdrag vun 1968, mit dat sik de Atommächt in de Plicht begevenhebbt, atomare Wapen blots dör normale militäärsche Middel as Flegers oder Raketen in’t Teel to bringen, un nich to’n Bispeel op’n Frachtweg.

Dat Dreihbook baseert op den Roman „The Fourth Protocol“ vun Frederick Forsyth, den he 1984 rutbröcht hett. Schreven weer dat Dreihbook vun Forsyth sülvst mit Hülp vun Richard Burridge un George Axelrod. Dreiht weer de Film an Öörd in Finnland un England. In de US-amerikaanschen Kinos hett he ruchweg 12,4 Millionen US-Dollar inspeelt.

Inholt

De britische Agent Preston is in den Fall Berenson ünnerwegens, de Geheempaperen vun de NATOverswinnen laten hett. Dorbi leggt he sik ok mit sien Baas an, hett aver Spood mit sien Vörgahn un kriggt ok den Middelsmann tofaten. So warrt de Geheemdeenst gewohr, dat de Dokumenten an de Sowjetunion gahn sünd. Mit de Informatschonen hett de KGB-Viez achter den Rüch vun sien Baas, General Karpov, en Plaan utklamüstert: De KGB-Major Petrofsky kriggt vun em den geheemen Opdrag, en Atombomb op en Luftwapenstüttpunkt in Grootbritannien to tünnern. De enkelten Kumponenten för de Bomb schüllt vun verschedene Baden op’n Seeweg in dat Land smuggelt warrn, woneem de Major den Sprengkopp denn tosamensetten schall. Foorts maakt se de Major op’n Weg un söcht sik en Huus in de Neeg vun den US-amerikaanschen Stüttpunkt Baywaters.

Een vun de Baden warrt bi en illegalen Landgang aver in en Unfall verwickelt un blifft dorbi dood. Dat Bodeel, dat he bi sik hett, warrt dorbi opdeckt. Preston, den sien sien Baas em na’t Afdeel för Havens un Flaagplätz versett hett, fangt na natoforschen. Man, ok General Karpov warrt gewohr, dat in sien Institutschoon wat aflopen deit, wat för em geheem hollen warrt. Ok he fangt an, sik ümtohöörn un kummt achter den Plaan mit de Bomb, kann aver nix dorgegen doon. Petrofsky versöcht in de Twüschentiet mööglichst wenig optofallen un sammelt na un na de Kumponenten tohopen. He kriggt Hülp vun Irina Vassilieva vun de Ro’en Armee, de sik mit den Bo vun Atombomben utkennt.

Beid hebbt se verdeckt den Opdrag kregen, den annern ümtobringen, dat keen vun de Mitweters an’t Leven blifft: Vassilieva stellt den Tiettünnerer so in, dat Petrofsky in de Luft flüggt foorts wenn he de Bomb scharp maakt, wiel he ehr na’n Bislaap in’t Bett dootscheten deit. Intwüschen finnt Preston en Spoor, de em na en Oort in de Neeg vun den Luftwapenstüttpunkt föhrt, woneem de Sowjet-Agenten de Bomb fardig boet hebbt. Preston foddert en SAS-Eenheit an, mit de he dat Huus störmen deit, kort vördem Petrofsky de Bomb tünnern kann. Dat kummt to en Gefecht, bi dat ok de Major doodschaten warrt. An’t Enn stellt sik rut, dat de Spoor na Petrofsky vun General Karpov leggt worrn is, de dorför Informatschonen kregen hett, üm sien egen Positschoon in de Sowjetunion to fastigen.

Kritiken

• De Tietschrift Variety loov dat Speel vun Michael Caine as Spionaaschafwehr-Fackmann, ofschoonst de Rull sien Künnen nich richtig utreizen de.

• Roger Ebert hett de Rull mit Harry Palmer ut The Ipcress File vergleken, de ok vun Caine speelt weer.

• De Film-Dienst schreev över den Film as en Bestseller-Verfilmen, de de Vörlaag to en eenfacke Action- un Agentengeschicht afflachen leet, as se begäng weer. De klass’schen Elementen vun’t Genre, as Draun, Verdacht un strukturelle Gewalt weern woll beropen, aver nich in Szeen sett.

Utteken

De Film hett keen Priesen wunnen, weer aver in’t Johr 1987 op dat italieensche Mystfest in de Kategorie Best Film vörslahn.

Weblenken

• The Fourth Protocoll in de Internet Movie Database (engelsch)
• Kritiken to’n Film op Rotten Tomatoes